Azərbaycan Dövlət Su Ehtiyatları Agentliyi-nin Xaçmaz Su İstismarı İdarəsinin əməkdaşı Rəhmani Nəsirov iddia edir ki, yaxın zamanda keçirdiyi “ağ xətt” əməliyyatından sonra xəstəlik vərəqəsinin (bülletenin) 1 gün gec açılması səbəbindən 4 ay əməkhaqqını ala bilməyib.

Onun sözlərinə görə, məsələ ictimailəşdirildikdən cəmi 2 gün sonra problem aradan qaldırılıb və ödəniş məsələsi öz həllini tapıb.

Bakunews.az-ın əldə etdiyi məlumata əsasən, sözügedən videodan sonra Xaçmaz Rayon Mərkəzi Xəstəxanası-nda daha əvvəl oxşar problemlə üzləşmiş digər vətəndaşların da məsələsi qısa müddətdə həll olunub.

Əgər problemin həlli bu qədər operativ və sadə idisə, niyə vətəndaşlar aylarla gözləməli olub?

Ayın 30-da evə buraxılan xəstə necə 24-də “çıxış alır”?

Rəhmani Nəsirov bildirir ki, xəstəxanadan ayın 30-u evə buraxılıb və buna uyğun olaraq bülleten 28-dən 30-na qədər uzadılmalı idi.

Onun iddiasına görə, Xaçmaz Su İstismarı İdarəsinin rəis müavini Teyyub Sultanovun göstərişi ilə xəstəxananın direktoru Səyyaf Tağıyev tərəfindən bülleten 28-i uzadılmaq əvəzinə 24-ü tarixlə bağlanıb.

İddia olunan sənədlərə əsasən, faktiki olaraq 30-u evə buraxılan şəxsin tibbi sənədlərində 30-u tarixlə çıxış göstərilməsinə baxmayaraq, elektron qeydiyyatda 24-ü tarixlə bağlanması suallar doğurur.

Əgər təqdim edilən sənədlər doğrudursa, bu halda tarix uyğunsuzluğu hansı prosedurla izah edilə bilər?

R.Nəsirov bununla kifayətlənmədiyini, xəstəxanada kanalizasiya çəkilişi ilə bağlı tender sənədlərində göstərilən məbləğlərin necə xərcləndiyi barədə növbəti videomüraciətdə açıqlamalar verəcəyini də bildirib.

Sözügedən video müraciəti və xəstəlik tarixçəsi ilə bağlı sənədi yazıya əlavə edirik.