Şahbuz rayonunun ucqar kəndi olan Gömrü sakinləri marşrut problemindən şikayət edirlər. Bu kəndə gün ərzində cəmi bir marşrut işləyir. Həmin marşrut səhər saat 8-də Naxçıvan şəhərinə yola düşür, günorta saat 3-də isə oradan geri qayıdır.

Sakinlər bu intervalın çox uzun olduğunu, evə gec çatdıqları üçün təsərrüfat işləri ilə məşğul ola bilmədiklərini deyirlər:

“Naxçıvan şəhərinə adətən bir neçə saatlıq iş üçün gedirik. Saat 11–12-yə işimizi bitiririk. Məcbur qalıb 3–4 saat gözləyirik ki, marşrutumuz yola düşsün. Çünki kəndimiz elə bir yerdədir ki, başqa marşrutlardan istifadə etmək mümkün deyil. Qış aylarında vəziyyət daha da çətinləşir. Evə çatana qədər hava qaralır, təsərrüfat işlərimizi görə bilmirik. İkinci marşrutun açılması və ya marşrutun şəhərdən 1–2 saat tez çıxması üçün dəfələrlə Nəqliyyat Nazirliyinə müraciət etmişik, amma nəticəsi olmayıb.”

Kəndin yeganə marşrut avtobusunun sürücüsü Zakir Əlipənahov da deyir ki, problemlə bağlı nazirliyə dəfələrlə müraciət etsə də, nəticə əldə olunmayıb:

“Nazirlik qrafiki elə tərtib edib ki, şəhərdən rayona ən gec qayıdan marşrut bizimkidir. Yolun uzunluğunu, qar və buzu nəzərə almırlar. Hazırda kənd yollarına bir metrə yaxın qar yağıb. Axşam saatlarında don artır, avtobusu idarə etmək çətin olur. Sərnişinlər də avtobusda saatlarla gözləməli olur. Nazirliyə neçə dəfə xahiş etmişəm ki, heç olmasa bir saat qabağa çəkilsin, saat 2-də çıxaq. Deyirlər ki, mümkün deyil. Nə kənd camaatını, nə də biz sürücüləri nəzərə alırlar.”