Şabran rayon sakini Rüstəmova Gilabxanım qaz sayğacı və ödənişlərlə bağlı problemlə üzləşdiyini bildirir. Onun sözlərinə görə, son aylarda qaz sərfiyyatı ilə yazılan məbləğ arasında ciddi uyğunsuzluq yaranıb.

Tribuna.az xəbər verir ki, şikayətçinin sözlərinə görə, evlərində yalnız “dörd göz” adlanan qaz sobasından istifadə olunur və ailə az saylı olduğu üçün aylıq qaz sərfiyyatı adətən 5–6 manat civarında olur. İstilik sistemi isə elektriklə işləyir.
“Artıq bir neçə aydır ki, “Azəriqaz” abonentlərə qəbz təqdim etmir. Nə qədər qaz yazıldığını dəqiq bilmirik. Halbuki 20 ildir ki, mənim evimdə qaz sərfiyyatı təxminən eyni olur. Amma son aylarda səbəbsiz şəkildə borc 15–16 manat göstərilir”, – deyə Rüstəmova Gilabxanım bildirir.

Onun sözlərinə görə, sayğac göstəriciləri də şübhə doğurur. Belə ki, təxminən 10 gün əvvəl sayğacda 4346 göstəricisi qeydə alınıb. Lakin bu gün sayğaca baxarkən göstəricinin 4345 olduğunu görüb.
“Bu müddətdə qazdan demək olar istifadə etməmişəm. Maraqlıdır ki, sayğacın göstəricisi artmaq əvəzinə bir vahid geri gedib. İdarəyə müraciət edib qəbz tələb etdim. Mənə əvvəlcə dedilər ki, “Azəriqaz” qəbz vermir. Sonradan qəbzi ala bildim və orada da 10 gün əvvəlki göstərici 4346 kimi qeyd olunub”, – deyə o qeyd edir.
Şikayətçi məsələ ilə bağlı aidiyyəti qurumların araşdırma aparmasını və qaz təsərrüfatı əməkdaşlarının fəaliyyəti barədə tədbir görülməsini xahiş edir.

Məsələ ilə bağlı “Azəriqaz”la əlaqə yaratmağa çalışdıq. Lakin telefon zənglərimizə cavab verən olmadı.