SOCAR Azəriqaz İB sahə üzrə məsul şəxslərinə xitab edən tanınmış hüquq müdafiəçisi, Neftçilərin Hüquqlarının Müdafiəsi Təşkilatının (NHMT) sədri Mirvari Qəhrəmanlı özünün sosial şəbəkə hesabında yenə də pozulan işçi hüquqlarından bəhs edib. "DİA-AZ" olaraq NHMT sədrinin açıqlamasını təqdim edirik:
"Azərbaycan Respublikası Əmək Məcəlləsi  maddə 164.2 tələb edir ki, bu işçilərə hər gün üçün ikiqat ödəniş etməlisiniz☝️Çox təssüf ki, sizlərin qəzəbinə gəlmə qorxusu işçiləri məhkəməyə müraciət etməkdən çəkindirir..."
Bu çağırışının ardından NHMT sədri işçilərin müraciətini təqdim edir:
"Bildiyiniz kimi, 8 mart – Beynəlxalq Qadınlar Günü, 20–21 mart tarixlərində isə Ramazan və Novruz bayramları qeyd olunur. Bununla əlaqədar olaraq, 20–30 mart tarixlərini əhatə edən dövr (ardıcıl 11 gün) qeyri-iş günləri elan edilmişdir.
Lakin qeyd olunan günlərdə “Azəriqaz” İB-nin bəzi region və rayonlarında, eləcə də struktur bölmələrində keçirilən iclaslarda sayğac əməliyyatları üzrə çilingərlərə qeyri-iş günlərində də fəaliyyət göstərmələri ilə bağlı tapşırıqlar verildiyi bildirilir. Belə ki, onlardan təhkim olunduqları ərazilər üzrə pul yığımını təşkil etmək, 104 çağrı mərkəzindən daxil olan sayğacla bağlı bütün sifarişləri icra etmək, həmçinin mart ayının 28, 29, 30 və 31-i daxil olmaqla sayğac göstəricilərini oxumaq tələb olunur.
Bu vəziyyət haqlı olaraq bir sıra suallar doğurur: saatlıq əməkhaqqı (əlavə olunub)cəmi 3,84 qəpik olan müqavilə əsasında çalışan işçilərin qeyri-iş günlərində əlavə əməkhaqqı ödənilmədən işə cəlb edilməsi nə dərəcədə qanunauyğundur?
Eyni zamanda, diqqət çəkən digər məqam ondan ibarətdir ki, sayğac əməliyyatları üzrə çilingərlərin demək olar hamısı atestasiyadan keçirilərək işə qəbul edildiyi halda, qəza-bərpa xidmətində növbətçi heyətin (usta və çilingərlərin) əhəmiyyətli hissəsinin imtahandan azad edilməsi hansı meyarlara əsaslanır?
Digər tərəfdən, əmək qanunvericiliyinin tətbiqi ilə bağlı əlavə narahatlıq doğuran hallar da mövcuddur. Belə ki, işə qəbul zamanı namizədlərdən sürücülük vəsiqəsi tələb edilməsi, bəzi hallarda isə şəxsi avtomobilin olub-olmaması ilə bağlı suallar verilməsi müşahidə olunur. Nəticədə, sürücülük vəsiqəsi olmayan namizədlərin işə qəbulunda çətinliklərin yarandığı bildirilir. Halbuki bu tələblər vəzifə təlimatında açıq şəkildə nəzərdə tutulmadıqda, onların tətbiqi əmək münasibətlərində şəffaflıq və qanunauyğunluq baxımından ciddi suallar doğurur.
Bundan əlavə, SOCAR tərəfindən irəli sürülən “işlərin optimallaşdırılması, xərclərin azaldılması və struktur bölmələrinin fəaliyyətinin səmərəliliyinin artırılması məqsədilə yeni əməliyyat modelinə keçid” yanaşmasının praktik tətbiqi də mübahisəli görünür.
Belə ki, bu “optimallaşdırma” çərçivəsində işçilərin qeyri-iş günlərində əlavə əməkhaqqı ödənilmədən işə cəlb edilməsi, şəxsi avtomobilləri ilə xidmət göstərmələri, sifarişləri icra etmələri, sayğac göstəricilərini oxumaları və ödəniş yığmaları tələb olunur.
Nəticə etibarilə belə qənaət formalaşır ki, xərclərin optimallaşdırılması institusional və təşkilati tədbirlərdən daha çox, işçilərin şəxsi resursları hesabına həyata keçirilir. Bu isə faktiki olaraq qurumun xərclərinin azalmasının işçilərin maddi və əmək yükü hesabına kompensasiya olunması ilə nəticələnir..."