İnteryer dizaynı, dekorasiyaların hazırlanması ilə məşğul olan “Depo Production” MMC-nin əməkdaşı, dizayner Emil Mirzəyev Naxçıvan Televiziyasından narazılığını bildirib. O bu barədə şikayətini Qafqazinfo.az saytındakı həmkarlarımıza bildirib: “Şirkətimiz ötən ilin yanvarında Naxçıvan TV üçün 3 studiyanın dizayn tərtibatı, istehsalı təklifini alıb və onu hazırlayaraq noyabrda təhvil verib. Lakin bu günə qədər televiziya tərəfindən bizə ödənməli olan 130 543,40 manat pul hələ də verilməyib”.
Emil Mirzəyev işləri ilkin ödənişsiz gördüyünü və bütün xərclərin icraçı şirkət tərəfindən qarşılandığını deyir. Onun sözlərinə görə təklifi aldıqdan sonra Naxçıvan TV-nin rəhbərliyi ilə bir neçə dəfə görüşüb müzakirələr aparıblar. Sonra müvafiq hazırlıq işləri aparılıb. Bağlanmış müqavilə üzrə işlərin icrasına başlanılıb.
Şikayətçinin iddiasına əsasən Naxçıvan TV-də rəhbərlik dəyişdirildiyinə görə dekorasiyalarda da bəzi dəyişiklik istənilib. Bu işlər də “Depo Production” MMC tərəfindən heç bir ödəniş alınmadan icra edilib. Televiziyanın Naxçıvan Muxtar Respublikası Ali Məclisində kuratoru olan Günay Malikqızı və televiziyanın sədr müavini Xaliq Babayev tərəfindən şifahi şəkildə tələb olunub ki, icraçı şirkət nəzərdə tutulan işləri yerinə yetirsin. Buna görə əvvəl hazırlanmış dizayn və eskizlər yenidən tərtib olunub. Bu səbəbdən də dekorasiyalara aid olan şərtlər toplusu dəyişib və bunun rəsmiləşdirilməsinin lazım olmağı barədə heç bir xəbərdarlıq olunmayıb. Bu səbəbdən bugünkü tarixə qədər dekorasiya işlərinə aid olan hissəsi, 130 543,40 AZN hələ də ödənilməyib.
Şikayətçi iddia edir ki, televiziyanın sədr müavinləri İlhamə Novruzova və Xaliq Babayev dəyişdirilmiş şərtlər toplusunu qəbul etməkdən boyun qaçırır: “Bu vəziyyətlə bağlı Naxçıvan Muxtar Respublikasının Ali Məclisinin binasında, Günay Malikqızının qəbul otağında olarkən dəyişikliklərin bu çətinliyi yaratdığını xatırladanda bizə verdiyi cavab belə oldu: “Etməzdiniz”. Halbuki müqaviləyə əsasən, hər hansı səbəbdən zərurət yaranarsa, müqavilədə qeydə alınmış bəndlər üzərində dəyişikliklər etmək mümkündür.
Məsələ ilə bağlı Naxçıvan televiziyasının sədr müavini İlhamə Novruzova isə belə deyib: “Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyəti ilə “Depo Production” Məhdud Məsuliyyətli Cəmiyyəti arasında son 2 il ərzində heç bir müqavilə bağlanmayıb. Odur ki, “Depo Production” Məhdud Məsuliyyətli Cəmiyyəti ilə hər hansı hüquqi öhdəlik və ya müqavilə əsasında əməkdaşlıq mövcud deyil”.
Xatırladım ki, Referans Media olaraq biz bir neçə dəfə Naxçıvan Televiziyasındakı cərəyan edən mənfi proseslərdən yazçışdıq. Hazırki şikayət isə göstərir ki, Naxçıvan TV-də rəhbər-işçi problemindən başqa maliyyə fırıldaqlarına dair iddialar da var.
