Şirvan şəhər İcra Hakimiyyəti başçısının 1 nömrəli Sahə İnzibati Ərazi Dairəsi üzrə Nümayəndəliyi Şirvan şəhərində yolların əsaslı təmiri üzrə 04.03.2025-ci ildə başladığı açıq tenderdə qalib “Aztimont” Açıq Səhmdar Cəmiyyəti seçilib. Tərəflər arasında 717.600,32 manat dəyərində satınalma müqaviləsi 28.10.2025-ci ildə bağlanılıb.

Qeyd edək ki, nəzarət orqanı olaraq Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin 30.09.2025-ci il tarixli Qərarı ilə “Aztimont” ASC etibarsız təchizatçılar siyasına daxil edilib.

Buna baxmayaraq Şirvan şəhər İcra Hakimiyyəti başçısının 1 nömrəli Sahə İnzibati Ərazi Dairəsi üzrə Nümayəndəliyi “Aztimont” ASC etibarsız təchizatçılar siyasına daxil edildikdən bir ay sonra 7 yüz min manatdan çox dəyəri olan satınalma müqaviləsi bağlayıb.

Qeyd edək ki, “Dövlət Satınalmaları Haqqında” Azərbaycan Respublikası Qanununun 16-cı Maddəsinə görə: Təchizatçılar bu Qanunun 35.1.4-cü,( təchizatçı birdən artıq təklif təqdim etdikdə və ya birdən artıq təklifdə iştirak etdikdə); 35.1.10 ( satınalmanın keçirilməsi zamanı bir neçə təchizatçı arasında həmin satınalma ilə bağlı hər hansı sövdələşmə həyata keçirildikdə (o cümlədən qiymətin qaldırılmasına yönələn sövdələşmə həyata keçirildikdə) – 35.1.12-ci maddələrində qeyd olunan hallarda həmin halların aşkar edildiyi gündən 5 (beş) iş günü ərzində, satınalma müqaviləsinin icra edilməsindən boyun qaçırılması və ya 1 (bir) təqvim ili ərzində 3 (üç) və ya daha çox satınalmada satınalma müqaviləsinin bağlanmasından imtina edilməsi halında isə 15 (on beş) iş günü ərzində satınalan təşkilatın əsaslandırılmış müraciəti üzrə nəzarət orqanının əsaslandırılmış qərarı ilə etibarsız təchizatçılar hesab olunurlar.

16.4. Pozuntunun ağırlıq dərəcəsindən və təchizatçının əvvəllər belə pozuntuya yol verib-verməməsindən asılı olaraq, onun etibarsız təchizatçıların reyestrində qalma müddəti bu Qanunun 14.2.8-ci maddəsində nəzərdə tutulmuş qayda ilə müəyyən edilir. Təchizatçıların etibarsız təchizatçıların reyestrində qalma müddəti 3 (üç) ildən çox ola bilməz və həmin müddət ərzində təchizatçıların satınalmalarda iştirakına yol verilmir.

Göründüyü kimi Qanun etibarsız təchizatçılar siyasına daxil edilmiş təchizatçının satınalmalarda iştirakına ən azı bir il yol vermir. Amma Şirvan şəhər İcra Hakimiyyəti başçısının 1 nömrəli Sahə İnzibati Ərazi Dairəsi üzrə Nümayəndəliyi buna yol verməklə qanunun tələblərini gözardı etmişdir.

Qeyd edək ki, Şirvan şəhər İcra Hakimiyyəti başçısının 1 nömrəli Sahə İnzibati Ərazi Dairəsi üzrə Nümayəndəsi Ceyhun Nəcəfovdur. O, 2021-ci ilin noyabr ayından bu vəzifəyə təyin edilib. Maraqlı orasıdır ki, Ceyhun Nəcəfovun rəhbərliyi ilə Şirvan şəhər İcra Hakimiyyəti başçısının 1 nömrəli Sahə İnzibati Ərazi Dairəsi üzrə Nümayəndəliyinin müqavilə bağladığı “Aztimont” ASC, “ŞABRAN-D” MMC və “DREAM CONSTRUCTİON COMPANY” MMC sonradan nəzarət orqanının qərarı ilə etibarsız təchizatçılar siyasına salınıblar. Niyə?

Çünki, adları çəkilən şirkətlər heç də lazımı maddi texniki bazaya malik deyillər. Tender yolu ilə onlara verilən dövlət sifarişləri də çox səthi şəkildə həyata keçirilir. İşlər də bir çox hallarda şəhər kommunal təsərrüfatının, yerli yol istismar idarələrinin dəstəyi ilə görülür. Təbii ki, satınalan təşkilatın razılığı ilə. Satınalan təşkilatın başında da təbii ki, Şirvan şəhər İcra Hakimiyətinin başçısı durur.

Aktualinfo.net