"Masallı rayonunun Xallıcallı kəndinin camaatı məmur özbaşınalığı və səriştəsizliyinin əzabını çəkirlər. Artıq bir neçə ildir ki, hava yağmurlu olanda kəndi su basır. Evlər, əkin sahələri su altında qalır..." "DİA-AZ" xəbər verir ki, bunu özünün sosial şəbəkə hesabında jurnalist Sima Babayeva yazıb.
O daha sonra bildirir: "Masallının Xallıcallı kəndində yerləşən su anbarı 1930-cu ildə yaradılıb, uzun illər ümumi istifadə də olub. Su anbarının kənd üçün çox əhəmiyyətli rolu olub.
Bu qurğu həmişə çaylardan gələn sel sularının qarşısını alıb. Bu kəndi təbii fəlakətlərdən sığortalayıb. Həm də yay üçün su ehtiyatı yığılıb.
Amma 2022 ci ildə su qurudulur və sahədə taxıl əkilir. Yay mövsümündə hamı susuz qalır, əkin-biçin məhv olub gedir.
Sakinlər deyirlər ki, 2016-cı ildə kəndin uzun illər ümumi istifadəsində olan su anbarı ilə bağlı sənəd saxtakarlığı faktı qeydə alınmış və 2017-ci ildə həmin dövrdə bələdiyyə sədri olmuş Yalçın Zaliyev barəsində məhkəmə hökmü çıxarılmışdır.
Lakin, 2021-ci ildə bələdiyyə tərəfindən həmin su anbarı üzrə 49 illik müqavilə bağlanmışdır. Satış barədə kənd sakinlərinə heç bir məlumat verilməmiş, açıq hərrac keçirilməmiş və ictimai müzakirə aparılmamışdır.
Masallı Rayon İcra Hakimiyyəti bu məsələni həll etməyə çalışsa da mümkün olmur.
Çünki yerli bələdiyyə və əmlak idarəsi etdikləri qanunsuzluğu sənədlərlə rəsmiləşdirərək hamını fakt qarşısında qoyublar.
Artıq məsələ araşdırılıb hüquqi müstəvidə həllini tapmalıdır. Yoxsa, belə getsə, başqa yerlərdə də bu “metod”dan istifadə edəcəklər.
Elə edənlər də var. Cəlilabadda 8 saylı Əmlak İdarəsi və Masallı bələdiyyəsinin iş uslubu oxşardır. Onların qanunsuz əməllərinin həddi yoxdur. İstədikləri torpaq sahəsini vətəndaşların əlindən çıxardıb mənimsəyir, satırlar.
Onların bəd əməllərinə görə neçə zəhmətkeş kəndli torpaqlarından məhrum olublar. Heç bir vəzifəli şəxs, aidiyyatı orqan bu bələdiyyələrin, əmlak idarələrinin qeyri-qanuni əməllərinin qarşısını almır, sadə insanların şikayətlərini eşidən olmur.
Məlum oldu ki, Masallının Xallıcallı kəndində qurudulmuş su anbarı ərazisi bələdiyyə və əmlak idarəsinin birgə səyi ilə Vidadi adlı adama satılıb.
Həmin adamla telefonla zəng vurub bu məsələ ilə bağlı danışdım. O deyilən sahəni aldığını etiraf etdi. Dedi ki, həmin yeri əvvəl bələdiyyə alıb, sonra da özü bələdiyyədən alıb.
Ondan buna dair hansısa rəsmi sənəd göstərməsini xahiş edəndə cavab verə bilmədi. Deməli, yuxarıda qeyd etdiyim qanunsuzluqlar əsassız deyil.
Azərbaycan Respublikasının Mülki Məcəlləsinin 152.1 və 179.1 maddələrinə əsasən, qanunsuz əsasla bağlanmış əqdlər etibarsızdır.
İctimai istifadədə olan əmlakın qanunsuz satışı və ya icarəyə verilməsi “Bələdiyyələrin Statusu haqqında” Azərbaycan Respublikasının Qanunu və digər normativ aktlara ziddir.
Əvvəlki cinayət işinin hüquqi nəticələri nəzərə alınmadan bağlanmış müqavilə hüquqi baxımdan etibarsız sayıla bilər.
Xallıcallılar tələb edirlər ki,
2021-ci ildə bağlanmış 49 illik müqavilənin qanuniliyinin hərtərəfli araşdırılsın,
müqavilə etibarsız hesab olunaraq ləğv edilsin, su anbarı əvvəlki hüquqi statusuna qaytarılsın, cavabdeh məsul şəxslər barəsində tədbir görülsün..."
