"Həyat axıb gedən bir çaydır, keçdiyimiz yollar isə bizim tariximizdir. İnsan ömrünü sadəcə illərlə deyil, qoyduğu izlərlə ölçəndə hər şey daha aydın görünür. Mən bir neftçi, ömrünü qara qızılın çıxarılmasına, dövlətimizin iqtisadi sütunlarının möhkəmlənməsinə həsr etmiş bir fəhlə kimi bilirəm ki, əsl uğur təkcə uca binalar tikmək, yeni terminlər kəşf etmək deyil, həm də insanların qəlbinə yol tapmaqdır. Daş-divar zamanla aşınsa da, insana verilən dəyər və göstərilən qayğı yaddaşlarda əbədi həkk olunur..." "DİA-AZ" xəbər verir ki, bunu özünün sosial şəbəkə hesabında SOCAR işçisi Rac Kərimov qeyd edib.

Keçmiş SOCAR prezidenti Rövnəq Abdullayevlə bağlı səmimi fikirlərini bölüşən R.Kərimov fikirlərini belə davam etdirir: "​Bizim peşəmiz çətindir, polad kimi iradə və dözüm tələb edir. Amma bu çətinliyin içində bir insanın arxasında duran gücü hiss etməsi ona dağ qədər dayaq olur. Rövnəq Abdullayevin SOCAR-a rəhbərlik etdiyi illər mənim yaddaşımda sadəcə maaş artımları ilə deyil, həm də bir rəhbərin sadə işçisinə göstərdiyi insani münasibətlə qalıb. Heç vaxt unutmaram, 2010-cu ildə mən Çilov adasında "Xəzər İaşə"də çalışırdım. Rövnəq müəllim adaya gələndə cəsarətimi toplayıb ona bir məktub təqdim etdim. O zaman bir rəhbərin sadə bir işçini dinləməsi, o məktuba biganə qalmaması mənim taleyimi dəyişdi. Həmin məktubun sayəsində mən Neft Daşları NQÇİ-yə işə düzəldim və bu, mənim həyatımda yeni, daha işıqlı və çox marağlı bir səhifə açdı.

​Bunu qeyd etməyi özümə borc bilirəm ki, bu yazdıqlarım nə siyasi məqsədlə, nə də bir sifarişlədir. Sadəcə düşündüm ki, o insanın üzərimizdə olan haqqını itirməyək. İnsanlıq həm də vəfa borcunu ödəməkdir. O dövrdə biz gördük ki, rəhbərlik həm də neftçinin süfrəsinin bərəkətini, ailəsinin rifahını düşünməkdir. Əmək haqlarımızın dəfələrlə artırılması, iş şəraitimizin yaxşılaşması bizə verilən "sizin zəhmətiniz bizim üçün qiymətlidir" mesajı idi. Yoxsa boş-boş "siz bir qəhrəmansınız" kimi şablon sözlər deyildi. Bir insanın rəhbər kimi ən böyük qazancı, getdikdən sonra onun arxasınca deyilən səmimi "sağ ol" sözüdür.

​Bu gün mən Rövnəq müəllimə keçmişdəki bütün xidmətlərinə, şəxsən mənə və bütün neftçilərə göstərdiyi diqqətə görə sonsuz minnətdarlığımı bildirirəm. Allah hər zaman köməyi olsun, ömrünü bərəkətli, yolunu aydın eləsin. Etdiyi bütün yaxşılıqlar, minlərlə neftçi ailəsinin sevincinə səbəb olan o qərarlar hər zaman qarşısına nur olaraq çıxsın. Allah onu və əzizlərini hər cür bəladan qorusun, can sağlığı və hüzur nəsib etsin. Haqqı olanın haqqı hər zaman uca tutulmalıdır.

Bir gün özünüzün də fəhləlikdən başladığınız Neft Daşları idarəsinə qonaq kimi təşrif buyursanız bizləri çox xoşbəxt etmiş olardınız.

Dualarımız hər zaman sizinlədir ey Nurani İnsan!.."