"Onsuz da gec yatanam. Gecə yerimə uzanıb təzəcə gözlərimi yummuşdum ki, telefonum zəng çaldı. Telefonu götürüb saata baxdım. 3.20-ni göstərirdi. Zəng Naxçıvandan gəlmişdi. Adamı tanıyırdım. Vasif “xan” zamanında döyə-döyə bütün varidatını əlindən alıb özünü də həbsə atmışdılar. İşgəncələrdən gənc yaşda olmasına baxmayaraq ağzında bir dişi belə qalmamışdı..." "DİA-AZ" xəbər verir ki, bunu özünün sosial şəbəkə hesabında tanınmış jurnalist Heydər Oğuz yazıb.
O daha sonra fikrini belə davam edir: "Bu gecə vaxtı mənə zəng etməsinin səbəbini anladım. Amma onun dərdinə çarə tapmaq mənim bacaracağım iş deyildi. Zira 4 ildir yazdıqlarım heç bir nəticə vermir və mən də həvəsdən düşürəm. Ümidlərini qırmaq da istəmirdim. Çünki bir iş adamının olan-qalan ümidini qırmağı dövlətə qarşı edilmiş ən böyük cinayət sanıram.
Nə yazıq ki, Naxçıvan son 4 ildə 3 dəfə rəhbər dəyişikliyi yaşasa da, vəziyyət zərrə qədər də dəyişilməyib. Əksinə, Vasif Talıbovun yerinə gələnlər sanki onun qarşısında öhdəlik götürüblərmiş kimi, atasına rəhmət oxudurlar. Bildim ki, gecə yarısı zəngi də uzun-uzadı rəhmət oxuma mərasiminə çevriləcək və sonda şikayətçinin problemini sadəcə dinləmək mənə qalacaq. Böyük ehtimalla, mənə zəng edən şəxs də bu nəticə ilə üzləşəcəyini bilirdi. Sadəcə ürəyini boşaltmaq üçün mənə zəng etmişdi.
Bir anlıq çək-çevirdən sonra onun zənginə cavab vermək istədim. Görünür, telefonu gec açdığımı görüb mənim, Allah bilir, neçənci yuxuda olduğumu düşünərək zəngi kəsdi. Üstündən bir neçə saniyə keçdi, Vatçapımın mesaj səslərini eşitdim. Açıb mənə yazılan mesajlara baxdım. Adam gecə vaxtı məni narahat etdiyinə görə üzr istəyir və mesajını bu cümlə ilə bitirirdi: “Heçnə eləyə bilmrem”.
İstədim, zəng edib ona mənim Naxçıvanın xüsusi nümayəndəsi olmadığımı xatırladım. Və deyim ki, cənab vətəndaş, mənim vasitəmlə şikayətini ünvanlamaq istədiyin rəhbərlik sənin vəziyyətini nəinki məndən, hətta səndən də yaxşı bilir. Sadəcə problemlərin həllini istəmədiyi üçün bu 4 ildə bir düz-əməlli adam tapıb “xan”ın kürsüsündə oturtmur. Yoxsa, “canişin”dən sonra oraya təyin edilən şəxsin daha “peşəkar” fırıldaqçı olduğunu mən belə bilirdim. Hətta onun təyinatı zamanı “pendirsatan getdi, tendersatan gəldi” yazmışdım.
Təbii ki, elə yazmağım səbəbsiz deyildi. Bu adam xüsusi nümayəndə təyin olunmamışdan əvvəl Baş nazir vəzifəsini icra edirdi. Ondan əvvəl isə 1 il 1 ay, 10 gün Naxçıvan MR-in Əmək və Əhalinin Sosial Təminat naziri işləmişdi. Bu 1 il 1 ay 10 gün ərzində şəxsən özünün keçirdiyi ən azı 22 tenderi Baş nazir təyin olunandan dərhal sonra yenə öz imzası ilə ləğv etmişdi. Səbəbini isə belə əlaqələndirmişdi: “Keçirilən tenderlər müvafiq qanunvericiliyinə uyğun aparılmayıb”.
Təsəvvür edirsinizmi? Rəsmən özü etiraf edirdi ki, onu tenderləri qanuna uyğun keçirmədiyinə, başqa sözlə desək, yaxşı qiymətə “satdığına” görə mükafatlandırıb Baş nazir qoyublar. Görünür, Baş nazir kimi də “üz ağartdığı” üçün yenidən mükafatlandırıb, Prezidentin xüsusi nümayəndəsi vəzifəsinə gətiriblər. Son zamanlar Naxçıvan barədə sosial mediada çıxan məlumatlar ondan xəbər verir ki, Ceyhun Cəlilov adlı bu adam yaxın zamanlarda Azərbaycanın Baş naziri postuna belə yüksəldilə bilər. Çünki onda heç kimdə olmayan üstün fərasət var. Naxçıvanda “canişin” işlədiyi zamanlarda elə böyük kəşflərə imza atıb ki, bu fikirlər dünya yaranandan indiyədək heç bir məmurun ağlına belə gəlməyib. “Naxçıvan xəbərləri” adlı qeyri-rəsmi xəbər agentliyinin yazdığına görə, Ceyhun müəllim tender “satdığı” iş adamının alacağı kreditin 25%-ni mənimsəmədən ona yaşıl işıq yandırmır. Satdığı tenderin neçə faizinə şərik olacağını isə bir özü bilir, bir də Bakıdakı havadarları.
Belə bir adamı Naxçıvanın ən yüksək postuna təyin edənlər bilmirlər ki, Muxtar Respublika nə vəziyyətə düşəcək? Əlbəttə, bilirlər. Amma görünür, onlara elə Ceyhun Cəlilov kimi “tendersatan”lar lazımdır..."
