Aprelin 4-5-də yağan yağışlardan sonra Şabranın və Siyəzənin bir sıra kəndləri ilə rayon mərkəzlərinə gediş-gəliş çətinləşib. Aradan 10 gündən artıq vaxt keçməsinə baxmayaraq, bu rayonların kəndlərində yaşayan minlərlə insan rayon mərkəzlərinə gedib-gəlməkdə ciddi problemlərlə üzləşir.

Bu barədə Bizimyol.info xəbər portalına kənd sakinləri məlumat verib. Onlar bildirib ki, aprelin 6-da səhər saatlarında Siyəzən rayonu ərazisində - “Qalaaltı”ya gedən yolda Gilgilçay üzərindəki körpü uçub. Bu körpü 20-yə qədər yaşayış məntəqəsini rayon mərkəzi ilə birləşdirirdi.

Siyəzən rayonunun Məşrif kənd sakinlərinin sözlərinə görə, günlərdir ki, onlar gediş-gəliş üçün qonşu Şabran rayonundan sovet dövründə çəkilmiş, hazırda dağılmış vəziyyətdə olan yoldan istifadə etmək məcburiyyətində qalıblar: “O yol da elə vəziyyətdədir ki, ona yol demək mümkün deyil. Ora hər sürücü maşınını salmaq istəmir. Ona görə taksilər də qiyməti qaldırıb. Belə zülm, belə dərd olmaz axı...”

Bir neçə il əvvəl Şabran rayonunda kəndlərə gediş-gəliş üçün həmin yola alternativ yeni yol çəkilmişdi. Lakin bir il əvvəl - 2025-ci ilin aprelində yağan yağışlar zamanı həmin yolun üzərində yerləşən körpü uçdu. Nəticədə Şabranın Əmirxanlı, Ceyranlı və s. kəndlərinə gediş-gəliş bağlandı.

“Keçən bir il ərzində o körpünü düzəltmədilər. Kənardan çayın üstündən torpaqla bir cığır düzəltmişdilər, maşınlar çayı oradan keçirdi. Çox təhlükəli idi. Körpü isə yox idi. Təsəvvür edin, yol gəlirdi, körpüyə çatanda sürücü ayıq olmasaydı, düşərdi çaya. Çünki əvvəl heç bir işarə də qoyulmamışdı. Bir maşın çaya düşmüşdü belə, yaxşı ki, ölüm-itim olmamışdı. Budəfəki yağışlarda sel gəlib o cığırı da yuyub apardı. Heç olmasa, o körpünü düzəltsəydilər, oradan istifadə edərdik. Ora yeni çəkilmiş yoldur, yaxşı yoldur. İndi o yol da yoxdur. Şabranın həmin kəndlərinin sakinləri də köhnə, dağılmış yoldan istifadə etmək məcburiyyətindədir”.

Şabran sakinləri də deyilənləri təsdiqləyib. Onlar bildirib ki, dağılmış yoldan istifadə etmək məcburiyyəti onlara həm qiymət, həm vaxt baxımından çətinlik yaradır: “Bizim kəndlərə avtobus işləmir, biz taksilərlə gedib-gəlirik. Əvvəl adambaşı 1 manata, 1 manat yarıma gedib-gəlirdik. İndi 2 manatdan aşağı aparmırlar. Adamları qınamaq da olmur. Çünki elə yol olmaz. Hər maşın da o yolla getmir, sürücü deyir ki, dağılır. Vaxt baxımından da sərfəli deyil. Əvvəl rayondan 25 dəqiqə, yarım saata gedə bilirdik, indi 1 saata gedirik. Niyə bu bir il ərzində o körpünü düzəltmədilər? Nəinki düzəltmədilər, heç bir iş görmədilər. Necə uçmuşdusa, elə də qaldı. Bizi adam saymırlar? Fikirləşmirlər ki, bu adamlar yazıqdır, əziyyət çəkirlər?”

Yağışdan sonra Siyəzən-Məşrif yolunda körpünün uçması ilə bağlı suala cavab olaraq, Azərbaycan Avtomobil Yolları Dövlət Agentliyindən verilən açıqlamada bildirilib ki, əraziyə agentliyin əməkdaşları cəlb olunub, təhlükəsizlik tədbirləri görülüb.