Azərbaycanda ən ağır cinayət işinin də məhkəmə istintaqı bir neçə ayın içərisində yekunlaşır və təqsirləndirilən şəxsə hökm oxunur. Yəni məhkəmə istintaqı illərlə davam etmir və məhkəmə tezliklə qərara gəlir. Lakin
Bakı Ağır Cinayətlər Məhkəməsinin hakimi Elnur Nuriyev
"Sahil - S İnşaat" tikinti firmasının rəhbəri olmuş Taley Alaverdiyevə hökm oxumaq bilmir ki, bilmir. Bu barədə Anaxeber.info.az-a sözügedən şirkətdən mənzil alan zərər çəkmiş şəxslər məlumat verib. Onların sözlərinə görə, aprelin 24-də Taley Alaverdiyevə hökm oxunmalıydı, lakin yenə də hakim Elnur Nuriyev məhkəməni təxirə salıb. Artıq uzun müddətdir ki, bu prosesi acı bağırsaq kimi uzadan hakimin şirkətin dələduzluğa yol vermiş və cinayəti istintaqla sübuta yetirilmiş Alaverdiyevə niyə hökm oxumaması şübhələr, suallar doğurur. Zərər çəkmişlərin məlumatına görə, əvvəlcə yanvarda, sonra aprelin ortalarında, ardınca ayın sonunda hökm oxunacağı gözlənilsə də, hakim Elnur Nuriyev Taley Alaverdiyevlə bağlı nədənsə qərar verə bilmir.
Halbuki ortada qətl işi yoxdur, şübhəli və mübahisəli məqamlar qalmayıb, məhkəmə üçün araşdırmalı nüanslar yoxdur... Bəs nə üçün hakim Elnur Nuriyev dələduz Taley Alaverdiyevi gözləyən cəzanı vermir? Sakinlər artıq bu məhkəmə işinin uzanmasından boğaza yığıldıqlarını bildirirlər. Onların sözlərinə görə, hakimin işi uzatması səbəbindən yaşadıqları binanın bir sıra hüquqi məsələləri, sənəd işləri, mənzillərin Çıxarış problemi qalmaqdadır. Hərçəndə elə günü bu həftə ərzində hökm oxunması ilə proses başa çata bilər və şirkətdən mənzil alan 165 ailənin sevincinə, problemlərinin həlli üçün prosesin gedişinə təkan ola bilər. Ancaq nə sirri-xudadırsa, hakim Elnur Nuriyev hökm oxumaq bilmir və bu məsələdə hansı marağının olduğu sakinlərə bəlli deyil. Yeri gəlmişkən, sakinlərin sözlərinə görə, bu dələduzluq işi üzrə həbs olunmuş digər şəxs - şirkət rəhhəri Taley Alaverdiyevin şəriki olmuş Pənah Kərimov məhz hakim Elnur Nuriyevin qərarı ilə xeyli vaxtdır ki, ev dustaqlığındadır. Əslində, hakimin bu qərarı da sakinlərin etirazına səbəb olmuşdu. Həmin şəxs şirkətə gələndən sonra bir mənzilin bir neçə nəfərə satılmasına başlanmışdı. Yəni dələduzluq onun gəlişi ilə olub. Hakim isə onu ev dustaqlığına buraxıb və indi də şirkətin sahibinə hökm oxumur. Görəsən Elnur Nuriyevin 165 ailənin əleyhinə olan bu qərarlarının arxasında hansı niyyət və maraq dayanır? Bir tərəfdən Pənah Kərimovu ev dustaqlığına buraxır, digər yandan Taley Alaverdiyevin cəzasını kəsmir. Halbuki binada sakinlərin üzləşdiyi dələduzluqla bağlı yaranmış problemlər istintaq dövründə demək olar ki, həllini tapıb, Baş Prokurorluğun nəzarəti və dəstəyi ilə bir sıra məsələlər yoluna qoyulub. Yəni bu halda hansı problem qalıb ki hakim hökm oxumaq bilmir?
Vətəndaşlar məsələ ilə bağlı Prezident İlham Əliyevə, Vitse-Prezident Mehriban Əliyevaya, Ali Məhkəmənin sədri İnam Kərimova və Ağır Cinayətlər Məhkəməsinin sədrinə müraciət edib. Müraciətdə hakim Elnur Nuriyevin hər dəfə məhkəməni təxirə salmasının səbəbinin araşdırılması xahiş olunur. Ali Məhkəmə adıçəkilən hakimin fəaliyyətini araşdıra və ondan izahat tələb edə bilər ki, hökmün hər ay təxirə salınmasının səbəbi aydınlaşsın.
anaxeberinfo.az
