Naxçıvanda keçirilən məcburi iməciliklərdə dövlət işçilərinə zibil yığdırılır, ot biçdirilir, alaq təmizlətdirilir. Müəllimlər və həkimlər də daxil olmaqla geniş bir qrupun bu işlərə cəlb olunduğu, imtina edənlərin isə təzyiq və hədələrlə üzləşdiyi bildirilir.
Bu barədə “Gündəlik Naxçıvan”a bir qrup dövlət işçisi məlumat verib.
Onların sözlərinə görə, yeni səlahiyyətli nümayəndə təyin olunduqdan sonra iməcilik şərtləri daha da sərtləşdirilib.
Naxçıvan şəhərindəki məktəblərin birində müəllim işləyən Zamin Seyidov deyir ki, iməcilikdə onlara ağır işlər gördürülür:
“Bu qayda-qanun harda var? Mənim əmək müqaviləmdə zorla iməcliyə gedəcəyim barədə bir maddə yoxdur. İməcilik ildə 1-2 dəfə, həm də könüllülük prinsipi ilə olmalıdır. Bunlar isə hər şənbə günü bizi göndərirlər. Getmək istəməyənləri işdən çıxarmaqla hədələyirlər.
Bizə çox ağır işlər gördürürlər, zibil təmizlətdirirlər, yer bellətdirirlər, ot biçdirirlər. Artıq bilinmir biz müəllimik, yoxsa fəhlə.
Başqa ölkələrdə müəllimə dəyər verilir, yüksək maaş alır, bizdə isə müəllim demək olar ki, hər işə cəlb olunur. Buna niyə heç kim müdaxilə etmir?”
Culfa rayonunda icra nümayəndəliklərinin birində çalışan C. Xudiyev iməcilik yolu ilə büdcədən pulların silindiyini iddia edir:
“İcra hakimiyyətinin şöbə müdiri ərazi nümayəndəliklərini məcburi şəkildə iməcliklərə göndərir. İnsanlar öz cibindən benzin, alət və görülən işlərin xərclərini ödəyir, halbuki bu işlər üçün şöbəyə ayrıca vəsait ayrılır. Hər həftə şənbə günləri kütləvi iməcilik keçirilir.
Hətta deyirlər ki, otlar çıxandan sonra hər gün iməcilik olacaq. Getməyənlərə töhmət verilir, işdən çıxarılmaqla hədələyirlər. Əslində bizim iməcilikdə gördüyümüz işlər üçün xüsusi idarələr var.
Sual yaranır ki, bəs yaşıllaşdırma idarəsi, yol işçiləri niyə maaş alır? Cavab çox sadədir. Həmin idarələrə saxta işçi götürüb, maaşı ciblərinə qoyurlar. Onların yerinə isə bizi işlədirlər.”
Şərur rayonundan olan həkim A. Quliyev isə deyir ki, işdən çıxarılacağından qorxduğu üçün iməcliyə getməyə razılaşır:
“Rayon icra hakimiyyəti bizi məcburi şəkildə iməcliyə göndərir. Təkcə həkim və müəllimlər yox, mədəniyyət və digər idarələr də kütləvi şəkildə iməcliyə cəlb olunur. Demək olar ki, rayonda olan bütün idarələri zorla aparırlar. Biz də məcbur qalıb gedirik ki, balalarımız ac qalmasın. Yoxsa işdən çıxararlar.”
