Azərbaycanda istənilən cinayət işinin məhkəmə istintaqı bir neçə ay ərzində yekunlaşır və hakim tərəfindən hökm oxunur. Hətta ən ağır cinayət hadisəsinin məhkəməsi də uzun çəkmir. Misal üçün Bakı Hərbi Məhkəməsində mühakimə olunan erməniəsilli canilərin prosesi 1 ildən artıq davam etdi və hökm oxundu. Yəni uzun illər Qarabağda cinayətkarlıqla məşğul olanların məhkəməsi də yekunlaşdı. Amma bir dələduzluq işi üzrə Bakı Ağır Cinayətlər Məhkəməsində 4 ildir ki, bitmək bilmir və proses hələ də getməkdədir. Anaxeber.info.az bildirir ki, söhbət "Sahil - S İnşaat" MTK rəhbəri Taley Alaverdiyevin məhkəmə işindən gedir. Vətəndaşları aldadaraq bir mənzili bir neçə nəfərə satmış Taley Alaverdiyevə 4 ildir ki, hökm oxunmur. Onun işi hakim Elnur Nuriyevin icraatındadır.

Zərər çəkənləri bezdirməkdən ibarət olan bu proses acı bağırsaq kimi uzanır. Sanki bir dələduzluq işi yox, böyük terror təşkilatı üzvlərinin, yaxud üstü açılmayan bir sirli qətlin məhkəmə istintaqıdır. Axı hakim Elnur Nuriyev bu illər ərzində necə ola bilər ki, Taley Alaverdiyevin dayaz bir dələduz olduğu qənaətinə gəlməsin?! Ortada istintaq materialları, sübutlar, zərər çəkənlər var. Amma hər dəfə bir bəhanə ilə məhkəmə işi təxirə salınır. Məsələn, son üç məhkəmə iclasının təxirə düşməsini gah dövlət ittihamçısının gəlməməsi, gah təqsirləndirilən şəxsin gətirilməməsi ilə əlaqələndirib. Və belə-belə vaxtı uzadıb, hökm oxumayıb. Nəticədə sakinlər əziyyət çəkir və uzanan bu işin davam etməsindən bezirlər. İndi isə hakim Elnur Nuriyevin icraatında olan bu işdə Taley Alaverdiyevin azadlığa buraxılması üçün yeni proses başladılıb. Belə ki, zərər çəkən şəxslərlə danışıqlar aparılır. Onlarla ayrı-ayrılıqda keçirilən görüşlərdə zərər çəkənləri inandırmağa çalışırlar ki şikayəti geri götürsələr, bu zaman Taley Alaverdiyev azadlığa buraxılacaq və o da dəymiş ziyanı ödəyəcək. Yəni faktiki olaraq, aldadılmış və zərər çəkmiş şəxslərin "başının altına yastıq qoyulur" və hakim bir dələduzun azadlığa çıxmasına hazırlaşır. Halbuki bu təbliğat və zərər çəkənlərlə görüşdə onlara edilən təkliflər aldadıcıdır. Əgər onlar şikayətini geri götürsə, Taley Alaverdiyev azadlığa buraxılandan sonra dəymiş ziyanı ödəməyəcək. Çünki bu illər ərzində ona və şəriki Pənah Kərimova çox fürsət verilib. Həm dələduzluğun üstü açılanda sakinlər möhlət tanıyıb, həm istintaq dövründə prokurorluq 7-8 ay şərait yaradıb ki, dəymiş zərəri ödəsinlər, həbs olunmasınlar. Amma heç vaxt bu ziyan kompensasiya olunmayıb. Ona görə də Taley Alaverdiyev azadlıqda olanda bir qəpik belə ödəniş etməyəcək. Bəs maraqlıdır, hakim Elnur Nuriyev cinayəti sübuta yetirilmiş dələduza niyə hökm oxumur və azadlığa çıxması üçün dəridən-qabıqdan çıxır? Hakimin məqsədi nədir ki, zərər çəkən sakinlərlə danışıqlar aparılır, onlara şikayətini geri götürmək təklif olunur? Axı kim zəmanət verə bilər ki, Taley Alaverdiyev azadlıqda olduğu dövrdə dəymiş zərəri ödəyəcək? Onun dələduz şəriki Pənah Kərimovun ev dustaqlığına buraxılması azmış kimi, indi də MTK sədri üçün bu hazırlıq gedir. Hakimin isə bu işlə bağlı tutduğu mövqe heç cür anlaşılan deyil. Halbuki ona hökm oxumaqla məsələni yekunlaşdıra bilər. Nəticədə sakinlərin 4 ildir davam edən əzab-əziyyəti qurtara, binanın bir sıra sənəd problemlərinin həlli üçün hüquqi prosedurlar başlana bilər. Ancaq bir dələduzu ev dustaqlığına buraxan, birinə isə neçə ildir hökm oxumayıb indi də onun azad olunması üçün zərər çəkənləri yola gətirməyə çalışan məhkəmə tərəfi - hakim Nuriyevin qərarları, davranışları vətəndaşlarda narazılıq doğurur. 165 ailə dörd ildir ki, bir məhkəmə hökmünə görə süründürülür. Axı nəyə görə? Hansı maraqlar var bu işdə? Alaverdiyev dəymiş zərəri ödəyən olsaydı, bunu çoxdan edərdi. Deməli, yenə zərər çəkənləri tələyə salmağa çalışırlar. Ona görə də 165 ailə I vitse-prezident Mehriban Əliyevadan, Ali Məhkəmə sədri İnam Kərimovdan, Bakı Ağır Cinayətlər Məhkəməsinin sədrindən və işə baxan hakim Elnur Nuriyevdən prosesi tezliklə başa çatdırmağı, təqsirləndirilən şəxsə cəza verilməsi şərti ilə hökm oxunmasını xahiş edir. Sakinlər qeyd edirlər ki, bu illər ərzində dövlətin dəstəyi, Mehriban xanımın diqqəti, Baş Prokurorluq yanında Korrupsiya ilə Mübarizə Baş İdarəsinin xüsusi nəzarəti və köməyi nəticəsində binanın xeyli məsələləri həllini tapıb. Ancaq indi hakim Elnur Nuriyevin nə etmək istədiyi qəbul edilən hal deyil. Onlar Alaverdiyevə cəza verilməsini, məhkəmənin yekunlaşmasını istəyirlər ki, yerdə qalan ağır problemləri də dövlətin köməyi ilə həll edə bilsinlər.