Qonşu ölkələrin mobil operatorları beynəlxalq tədbirdə 5G/6G -dən danışıblar, “Azercell” rəhbəri də “Aztelekom”un GPON layihəsindən. Təəssüf ki, bizim ən öndə gedən mobil operatorumuz, nəhəng dövlət şirkəti olan “Azercell” regionda innovasiyalar və texnologiyar sahəsində öz mövqelərini itirməkdədir.
Tribunainfo.az xəbər verir ki, bu fikirlərlə Azərbaycan İnternert Formunun prezidenti Osman Gündüz çıxış edib. O, “Azercell”in göstərdiyi xidməti tənqid edib:
“Avrasiya regionunun mobil operatorları bu dəfə Özbəkistanda bir araya gəliblər. Ənənəvi “M360 Eurasia 2025” forumu bu dəfə Daşkənddə keçirilir. Son iki il ərzində bu tədbir Bakıda baş tutmuşdu.
Gündəliyinə, çıxışlara, təqdimatlara göz gəzdirəndə,” Azercell”in bununla bağlı rəsmi olaraq yaydığı açıqlamalara baxanda təəssüflənməmək mümkün deyil.
Bizim ən öndə gedən mobil operatorumuz, nəhəng dövlət şirkəti olan”Azercell” regionda innovasiyalar və texnologiyar sahəsində öz mövqelərini itirməkdədir.
Son bir neçə bu geriləmə bu tip konfranslarda açıq şəkildə görsənir.
Zarina xanımla yanaşı zalda əyləşən qonşu ölkələrin mobil operatorların rəhbərləri 5G və 6G -dən, 5G və süni intellektin inteqrasiyasından, daha innovasiyalı addımlardan danışdıqları halda “Azercell” rəhbəri Aztelekom-un GPON layihəsindən danışıb.
Əslində başqa gözlənti də yoxdur. Uzun müddətdir ki, hansısa səbəblərdən bizim mobil operatorlar 5G şəbəkəsinin qurulmasına start verə bilmirlər. Heç lisenziyaları da yoxdur.
Distant təhsil xidməti vermək istəyən universitetləri zorla arxadan tutub saxladıqları kimi, kimlərsə bizim mobil operatorlara da 5G-ni qadağan edib.
Regionda 5G şəbəkəsi genişlənir, 6G müzakirə olunur, bizim mobil operatorların başı qarışıb mövcud tarifləri qaldırmağa, bəsit xidmətlərə. Ən bahalı mobil internet və mobil danışıqlar isə bizdədir.
Amma tariflərin qaldırılmasından əldə olunan vəsaitlərin yeni texnologiyalara investisiya yatırımını, keyfiyyət və xidmət çeşidlərinin artımını da biz müşahidə etmirik.
Tezlikləri, lisenziyanı mobil operatorlara verməli olan İKTA -nın da başı qarışıb provayderlərlə internet sürəti qaldırmaq kimi bəsit müzakirələrə.
Qlobal şirkətlərlə işbirliyi quran qonşu ölkələr, Gürcüstan (Nokia), Ermənistan (Nokia), Qazaxıstan( Nokia, Huawei), Özbəkistan (Nokia), Tacikistan (Huawei) innovasiyalarda, süni intellekdə, hətta 5G və süni intellektin inteqrasiyası sahəsində irəliləyirlər.
Çox təəssüf edirəm”.
