Redaksiyamızın elektron poçtuna Siyəzən rayonu Nizami küçəsi, ev 26-da yaşayan İmamquliyeva Aygün Kamil qızı tərəfindən şikayət məktubu daxil olub. Daha doğrusu, bu şikayət məktubu Prezudent İlham Əliyevə və Birinci vitse-prezident Mehriban xanım Əliyevaya ünvanlanıb. Aygün xanım, şikayət məktubunda Siyəzən Rayon İcra Hakimiyyətinin başçısı Novruz Novuzov, onun müavini Aqşin Ağayev, arxitektur Səxavət Novruzov, şəhər icra nümayəndəliyinin sədri Vüsal İbrahimli haqqında çox ciddi iddihamlar səsləndirib. Məktubla ətraflı tanış olduqdan sonra məlum olur ki, Aygün xanım FHN-nin Tikintidə Təhlükəsizliyə Nəzarət Dövlət Agentliyinin rəis müavini Təyyar Hüseynli və “Azərinşaatlayihə” Dövlət Baş Layihə Konstuktor və Texnoloji İnstitutunun direktoru Yusif Nağıyev haqqında da faktlar əsasında ciddi nöqsanlar qeyd edib. Məktubda əlaqə telefonu da olduğundan Aygün xanımla telefon əlaqəsi saxladıq və bütün yazılanları həm telefon danışığımız zamanı, həm də verdiyim vatsap nömrəsinə səs yazısı göndərməklə təsdiq etdi. Eyni zamanda dönə-dönə xahiş etdi ki, onun bu dərdini Prezident İlham Əliyevə və xanım Mehriban Əliyevaya qəzetimiz və saytımız vasitəsilə çatdıraq. Odur ki, Aygün xanımın məktubunu cüzi redaktə ilə olduğu kimi təqdim edirik.
Hörmətli cənabPrezident!
Hörmətli xanım Mehriban Əliyeva!
Sizə bildirirəm ki, mənim hal-hazırda yaşadığım ata evim qəzalı vəziyyətdə olduğundan hər an uça bilər və mən altında qala bilərəm. Məlumat üçün qeyd edim ki, atam İmamquliyev Kamil Hüseynqulu oğlu əslən Lerik rayonundan olub. Özü də İkinci Dünya Müharibəsinin iştirakçısı olub. Stalin represiyasından yan keçməyib və Sibirə sürgün edilib. 1953-cü ildə, yəni Stalin öləndən sonra bir çoxları kimi atam da sürgündən azad edilib. Sürgündən gələnləri Bakı şəhərinə buraxılmadıqları üçün atam 1953-cü ildə Siyəzən NQÇİ-də (Neft Qaz Çıxartma İdarəsi) işləmək üçün bu rayona gəlib. Nəzərinizə çatdırıram ki, Siyəzən rayonu 1949-cu ildə yaradılmışdır. Atam bu rayonunun qurucusu və fəxri vətəndaşı olub. Burada atam 31 il Siyəzən rayonunun inkişafı üçün can qoyub. 1984-cü il iyun ayının 11-də, müharibədən ayağında qalmış mərmi qəlpəsinin yaratdığı ağır fəsatdan rəhmətə gedib və Siyəzən rayon məzarlığında dəfn edilib.
Hörmətli cənabPrezident!
Hörmətli xanım Mehriban Əliyeva!
Çox təəssüflər olsun ki, əslən Lerik rayonundan olan Rayon İcra Hakimiyyətinin başçısı Novruz Novruzov, tutduğu vəzifədən sui-istifadə edərək, Vətən xaini olmuş, separatçı Əlikram Hümmətovla bir kənddəndir. Məhz buna görə N.Novruzov 37 ildir dünyasını dəyişən atamın ruhunu incitmiş və onun övladlarının şərəf və ləyaqətini alçaltmış, şəxsiyyətlərini təhqir etmişdir. Amma N.Novruzov unudur ki, onun ayaq basıb gəzdiyi bu torpağın üstündəkilərini 1953-cü ildə atam qurub-yaradanda, hazırda dövlətin pulunu oğurlamaqla məşğul olan Novruz Novruzov heç dünyaya gəlməmişdir. Atamın ruhunu və bizləri təhqir etdiyi üçün N.Novruzova layiq olduğu cavabı verdim və buna görə onun müavini Aqşin Ağayevlə, arxitektur Səxavət Novruzovla və şəhər icra nümayəndəliyinin sədri Vüsal İbrahimli ilə əlbir olub, mənim yaşadığım ata evimizi xaraba qoyublar.
Hörmətli cənabPrezident!
Hörmətli xanım Mehriban Əliyeva!
Nəzərinizə çatdırıram ki, Siyəzən rayon İcra Hakimiyyətinin yol verdiyi ciddi səhvə görə küçəni qeyri-qanuni olaraq normadan artıq hündürlüyə qaldırması nəticəsində küçə ilə bərabər olmuş evimi çökəkliyə salıblar və nəticədə evin özünü ciddi zədə alıb. Yuxarıda adlarını qeyd etdiyim məmurlar evin qəzalı vəziyyətə düşməsini binanın çoxdan tikildiyini bəhanə edirlər. Amma ciddi araşdırılma aparılsa, məlum olacaq ki, ata evimə dəyən bütün ziyanlar və evin qəzalı vəziyyətə düşməsi küçənin qanunsuz olaraq hündürlüyə qaldırılmasından sonra olub. Son 3 ilə qədər yəni bu məmurlar mənim başıma açdıqları oyunlara kimi mənim evim normal vəziyyətdə olub. Amma küçəni qeyri-qanuni olaraq normadan artıq qaldırıb, heç bir kanalizasiya xətti çəkilmədiyindən mənim evim belə xarabalığa çevrildi.
Mən bu qanunsuzluqlar və evimi xarabalığa çevirən məmurlar barədə dəfələrlə Baş Nazir Əli Əsədova, Baş Prokuror cənab Kamran Əliyevə, FHN-nin naziri cənab Kəmaləddin Heydərova, DTX-nin rəisi cənab Əli Nağıyevə, Ambudsman Səbinə xanım Əliyevaya, Milli Məclisin sədri Sahibə xanım Qafarovaya müraciətlət etsəm də, indiyə qədər heç bir nəticə olmayıb. Bir neçə dəfə FHN-nin Tikintidə Təhlükəsizliyə Nəzarət Dövlət Agentliyinin rəis müavini Təyyar Hüseynli və “Azərinşaatlayihə” Dövlət Baş Layihə Konstuktor və Texnoloji İnstitutunun direktoru Yusif Nağıyev dəfələrlə komissiya təşkil edərək evə baxış keçiriblər. Şifahi şəkildə evin həqiqətən də qəzalı vəziyyətə düşdüyünü desələr də tərtib etdikləri aktları Siyəzən RİH-in başçısı N.Novruzovun müavini Aqşin Ağayevin, arxitektur Səxavət Novruzovun Təyyar Hüseynli və Yusif Nağıyevlə iş birliyinə getdiyindən aktları öz xeyirlərinə saxtalaşdırıblar.
Hörmətli cənabPrezident!
Hörmətli xanım Mehriban Əliyeva!
Mən tənha qadınam, bir çox xəstəlikdən də əziyyət çəkirəm. Əgər evimiz uçarsa, mənə heç kəz köməyə gələ bilməyəcək. Bu isə sizin etibar edib, etimad göstərdiyiniz məmurlar öz qanuni funksiyalarını bir kənara qoyub, iş fəaliyyətlərini tənha bir qadınla mübarizəyə həsr ediblər. Hətta mənim müraciətim əsasında Azərbaycan televiziyasının əməkdaşları evimin qəzalı olmasını çəktdilər, lakin həmin çəkiliş lentini RİH-in başçısı N.Novruzova yaxşı pula satdılar. Sizə göndərdiyim teleqramların isə ünvanına çatmasına Rövşən Məmmədov imkan vermədi. Burada verilən şəkillərə diqqətlə baxsanız, görəcəksiniz ki, mən hər an ölüm təhlükəsi ilə üz-üzə qaldığım evdə yaşayıram. Qorxu və həyəcandan xəstəliklər tapmışam. Hörmətli cənab Prezident, həm Sizdən, həm də Azərbaycan xalqının sevimlisi, kasıbların, imkansızların pənahı Mehriban xanım Əliyevadan mənim bu dərdimə çarə edilməsini gözləyirəm. Siz dəfələrlə bildirmisiniz ki, hər bir mərmur xalqa xidmət etməlidir. Xalqın birinci xidmətçisi isə mən özüməm. Amma çox təəssüf ki, Siyəzən RİH-in başçısı Novruz Novruzov və digər adlarını çəkdiyim məmurlar Sizin göstərişlərinizin əleyhinə gedərək, xalqa yox, öz şəxsi maraqlarına xidmət edirlər.
Mən çox inanıram ki, Siz və Mehriban xanım öz şəxsi maraqlarına xidmət edən belə məmurların cəzalandırılması üçün aidiyyəti qurumlara göstəriş verəcək və mənim evimin qəzalı vəziyyətinin aradan qaldırılması təmin olnacaq. Əvvəlcədən Sizə dərin təşəkkürümü bildirirəm.
Biz də inanırıq ki, o boyda vəzifə sahibləri olan kişilər tənha bir qadınla mübarizə aparmağa son qoyacaq və nəhayət Prezidentin xalqa xidmət etmək göstərişinə konkret fəaliyyətləri ilə əməl edəcəklər.
P.S.Qarşı tərəfin də mövqeyini dinləməyə hazırıq... //tezadlar.az//
