“Diqqət yetirsəniz, Azərbaycanda yalnız yalandan oxuyanlar və şoumenlər var, çünki həmin sahələrdə qazanc və maraq mövcuddur. Peşəkar sənətlə məşğul olan valideynlər çox gözəl bilirlər ki, bu ölkədə kinonun, teatrın gələcəyi yoxdur. Ona görə də çalışırlar ki, övladlarını gəlir gətirəcək peşələrə yönəltsinlər. Əks halda sənət adamının övladı ancaq sürünə-sürünə yaşaya bilər. Buna görə də heç bir Xalq artisti, Əməkdar artist, nə bilim rejissor, aktyor və s. övladının səhnəyə, ekrana gəlməsini istəmir”.

Bu sözləri "Yeni Sabah"a rejissor Əbdül Mahbudbəyov deyib.

Onun sözlərinə görə, "ot kökü üstə bitər" məsəlinin əksinə olaraq tanınmış kino-teatr xadimlərinin yaradıcı xələflərinin olmaması yalnız və yalnız Azərbaycan cəmiyyətinin sənətə münasibəti ilə bağlıdır:

“Azərbaycanda imkanlı ailələrin övladlarını tələyə salan “ovçular” var. Sadəcə məşhur şəxslərin adları daha çox hallanır. Əslində, vəzifə sahiblərinin, iş adamlarının övladları daha acınacaqlı vəziyyətdədir. Bunu hamı bilir.

Elə aktyorlar, ədiblər, rəssamlar var ki, heç onların övladlarının adı belə çəkilmir. Sadəcə bəzi şəxslər tapıb onlardan sui-istifadə edirlər. Bu işdə maraqlı olan mafiya strukturları da var. Əgər bu problemlər aradan qaldırılmasa, gələcəyimizi itirəcəyik. Hər bir xəstəliyin əvvəl diaqnozu qoyulmalıdır ki, sonra müalicə olunsun”.