SƏN DEMƏ, ADƏM VƏ HƏVVA DA BU TARİXDƏ YERƏ ENİB
Dekabrın 21-22-də bir neçə planetin bir istiqamətdə paralel toplanması hadisəsinin Yerə təhlükə yaradacağı haqda fikirləri bir neçə gün öncə Azərbaycan Milli Elmlər Akademiyasının (AMEA) N.Tusi adına Şamaxı Astrofizika Rəsədxanası rəsmi şəkildə təkzib elədi. Rəsədxananın belə bir açıqlama verməsi Tibetin dini lideri Dalay Lamanın 21 dekabrla bağlı “qorxulu proqnozlar”ından qaynaqlanmışdı.
Geofizik Vaqif Behbudoğlu da hesab edir ki, Tibet dini liderinin Ayın Günəşin qarşısına keçməsi nəticəsində Yerdə 4-5 gün qaranlığın çökməsi və insanların kütləvi tələfatı barədə mülahizələrinin heç bir elmi əsası yoxdur.
Qeyd edək ki, Mayya təqvimləri üzrə 2012-ci ilin sonuncu ayında insanların yaşadığı 5-ci sivilizasiyanın sona çatması barədə fikirlər də səslənir. Mütəxəssislər Azərbaycanda yaşayan insanların üstəlik bu cür təşviş doğuran xəbərlərdən ağır psixoloji gərginlik keçirməsindən narahatlıqlarını ifadə edirlər.
Publika.az-a danışan V.Behbudoğlu eyni zamanda bu cür fərziyyələrin hansı mənbədən qaynaqlanması, eləcə də Mars planetində həyatın olub-olmaması barədə elmi mülahizələrlə bağlı fikirlərini bildirdi.
Astronomik hadisələr, qalaktikamızda baş verən proseslər zaman-zaman insanların diqqətində olduğundan, güman edirik ki, V.Behbudoğlunun oxuculara təqdim etdiyi fikirləri də maraq doğuracaq.
“Bizim qalaktikanın mərkəzi kiçik Ayı bürcünün baş ulduzudur. Qalaktikamızda sonuncu katakilizm hadisəsi 13 min il bundan əvvəl baş verib. Marsla Yupiterin arasında ölçüsü Yerin diametrindən 5,9 dəfə böyük olan planet hansısa bir səbəbdən partlayıb. Partlayış nəticəsində Mars odlu kürə ilə yanıb, məhv olub. Planetlər arasında Yerlə Marsın öz oxu ətrafında fırlanma sürəti çox yaxındır. Yerin bir sutka ərzində fırlanması 23 saat 56 dəqiqə 11 saniyədir. Marsın fırlanması isə bir sutkada 24 saat 37 dəqiqə 11 saniyədir. Yəni bu oxşar cəhətlərə görə, hər iki planet hər kvadratmetrə Günəşdən eyni miqdarda enerji alır. Bu əsaslar da sübut edir ki, həmin vaxta qədər Marsda canlı həyat olub. Bununla əlaqədar Amerika alimləri tədqiqatlar aparıb, yaxın 20 il ərzində bu hadisəni sübuta yetirəcəklər. Çünki hazırda Marsa birinci kosmik aparatlar göndərilib və planetin relyefi çəkilir, tərkibi öyrənilir.
Həmin partlayan planetdən Günəşə qədər olan məsafə 495 kilometr, hərəkət sürəti saniyədə 14 kilometr olub. Bu partlayış nəticəsində Günəş sistemində katakilizm baş verib. Günəş sistemindən kənarlaşdıqca Yupiter, Saturn, Uran, Neptun planetlərinin ətrafında xeyli sayda asteroidlər əmələ gəlib. Marsla Yupiter arasında milyonlarla asteroidlərin hərəkətləri başlayıb, bəziləri Günəş tərəfindən cəlb edilib, udulub, bəziləri Ayın, bəziləri Marsın səthinə düşüb. Hazırda iki asteroid Fobus və Demus 35 min kilometr məsafədə Marsın ətrafında fırlanır. Əslində isə həmin asteroidlərin kürəşəkilli olmaması sübut edir ki, bu, partlayan planetin qalıqlarıdır. Digər tərəfdən, bu planetlərin 1 milyon, 2 milyon yaşı olsaydı, uzun müddətdə fırlanma sürəti nəticəsində kürəvi şəkil alardılar”.
Həmsöhbətimiz dedi ki, dini mənbələrə də istinad edilsə, Adəmlə Həvvanın Yerə enişi də 13 min il əvvələ təsadüf edir: “Amma ümumilikdə, Yer üzündə antropogen amilin yaranması 2,5 milyon ildir. Katakilizm prosesində insanların şüuru silinir. Ona görə də dini mənbələrdə belə qəbul edilib ki, insanın başlanğıcı Adəmlədir və Adəmlə Həvvanın Yer üzünə enişi 13 min il əvvəl olub”.
Katakilizm nəticəsində Yerdə və Günəşdə nə baş verib?
V.Behbudoğlu bildirdi ki, 13 min il əvvəl baş verən hadisə nəticəsində Yer kürəsində ani buzlaşma olub: “Təqribən 1-2 saat ərzində baş verən buzlaşma prosesində tropik iqlimdə yaşayan heyvanların, o cümlədən fil, mamontların cəsədləri Maqadanda, Kola yarımadasında, Saxalində, Alyaskada və Yeni Torpaq adalarında tapılıb. 1966-cı ildə ilk belə mamont cəsədi Kola yarımadasında tapıldı, Cexoslovakiyada analizlər aparıldı və sübut edildi ki, mamont cəsədinin 13 min il yaşı var. Sonradan tapılan donmuş cəsədlərin də eyni vaxtda aid olduğu məlum oldu”.
O ki qaldı Günəş tutulması nəticəsində Yerdə həyatın dayanmasına, V.Behbudoğlu bildirdi ki, burada heç bir elmi əsas yoxdur: “Ayın Günəşin qarşısına keçərək 4-5 sutka qalması üçün ya Günəşin, Yerin, digər planetlərin fırlanma sürətləri eyniləşməli, planetlər eyni ox ətrafında düzülməlidir, ya da planetlərin hərəkətində qəflətən tormozlanma baş verməlidir. Bu da mümkün olan məsələ deyil. Günəş şüasının qarşısını almaq üçün fəzada çox böyük enerjiyə malik qüvvələr var. Bunlar yüksək qara enerjiyə malik səma cisimləridir ki, ona kvazavr deyilir. Bu enerji mənbəyi qalaktikamızın, eləcə də, qonşu qalaktikaların mərkəzində olur.
Tez-tez belə ifadəyə rast gəlirik ki, Günəşdə qara ləkələr əmələ gəldi. Həmin qara ləkələr Günəşin mərkəzindəki qara enerjidən qaynaqlanır. Amma təəssüf ki, orda milyonlarla dərəcə istilik var. Qrinviç vaxtı ilə hər gün saat 16.00-da kvazavrlardan Yerə elektromaqnit, radiomaqnit siqnalları gəlir. Baxmayaraq ki, kvazavrlar 1 milyon işıq ilinə bərabər məsafədədir, amma kosmosda o qədər böyük proseslər baş verir ki, Yerə bu siqnallar gəlib çatır. Amma qonşu qalaktikadan bu cür qara enerji bizim qalaktikaya daxil olsa və təhlükə baş versə, bu, ən azı 10 milyon ildən sonra gəlib bizə çata bilər.
Bu təhlükəni isə NASA-nın 30 milyon işıq ilinə bərabər olan məsafələrdən siqnallar qəbul edən radioteleskoplar dərhal hiss edəcək. Bütün bunlar deməyə əsas verir ki, Yer üçün belə təhlükə gözlənilən deyil. Onu da deyim ki, kosmosdan gələn şüalara qarşı Yer kürəsinin şüa arsenalı daim planetimizi müdafiə edə bilir”.
