Azərbaycan Ordusunun şanlı qələbəsi ilə yekunlaşan, torpaqlarımızın 30 illik işğaldan azad edilməsi ilə nəticələnən Vətən müharibəsindən sonra Ermənistanın silahlı qüvvələrinin mənəvi deqradasiyaya uğradığını nə bir göstəricisi də bu ölkənin hərbi hissələrinin ərazilərinin satılması prosesinin tendensiyaya çevrilməsi oldu. İnternet resurslarında bu barədə kifayət qədər məlumatlar yer almaqdadır. Təbii ki, bu tendensiyanın dərinləşməsində artıq Ermənistan cəmiyyətinin ordunun və hərbi birliklərin heç nəyə yaramadığı həqiqəti ilə barışmasının da rolu az deyil. Başqa sözlə, orta statistik Ermənistan vətəndaşı belə düşünür ki, hərbi hissələr döyüşdə məğlub olursa, torpaq sahələrinin onların balansında qalmasındansa, elə satılması məqsədəuyğundur.

Amma Cənubi Qafqazın lideri sayılan qalib Azərbaycan üçün belə hallar qanunsuz olmaqla yanaşı, həm də ayıbdır, yolverilməzdir. Ayıb olar ona görə ki, torpağını xarici düşməndən qorumağı bacaran Azərbaycan Müdafiə Nazirliyi hərbi hissələrinin ərazisini daxili düşməndən qorumağı bacarmasın. Bəli, belə neqativ faktlara rəvac verənlərə elə daxili düşmən demək yaraşır.

Bu qəbildən olan bir fakt barədə məlumat "Nyus az" redaksiyasına daxil olub. Paytaxtın Binəqədi rayonunun Sulutəpə qəsəbəsində Aprel Şəhidinin adını daşıyan küçədə Müdafiə Nazirliyinin "Nə" saylı hərbi hissəsinin balansında olan ərazinin satıldığı və satılmış torpaq sahəsində qanunsuz tikinti işlərinə başlanıldığı bildirilir.

Qəribədir ki, qeyd olunan fakta Binəqədi rayon İcra Hakimiyyətinin başçısı Elxan Allahverdiyevin qanunsuz, özbaşına tikililəri təsbit etmək üçün rayon ərazisini qarış - qarış gəzən emissarlarının rast gəlməmişlər. Söz yox ki, buna inanmaq sadəlövhlük olardı. Ağlabatan versiya budur ki, rast gəliblər, amma göz yumurlar. Qanunsuz tikinti gedən ərazinin bələdiyyə, Neft Şirkəti mülkiyyətində olmaması RİH mənsublarına görüb yan keçmək haqqı qazandırmır.