Bu gedişlə Zakir Həsənov nazir postu ilə deyəsən vidalaşmalı olacaq. Təyinatının ilk anlarında hamının ümidilə yanaşdığı nazir ümidləri ictimai rəydə demək olar ki, ciddi zədələdi. Düzgün hərbi salam belə vermədiyi ekspertlər tərəfindən dəyərləndirilən Zakir Həsənov həm də orduda əsgər ölümü qarşısında aciz qaldı. Sələfi Səfər Əbiyev ən çox əsgər ölümlərinə görə ittiham edilirdisə yeni nazirdən sonra əsgər ölümləri nəinki azaldı, bəzi məqamlarda sayda artımda oldu.
Təsəvvür edin, 2013-cü ildə ordumuzda 97 əsgər, onlardan 71 nəfər qeyri-döyüş şəraitində həyatını itirib. Və son 2014-cü ilin rəqəmlərində əsgər ölümünün ağılasığmaz həddində artdığının şahidi oluruq.Hətta hazırda ölənlərin sayının 50-yə çatdığı bildirilir. Çox qəribədir ki, bu ölümlərin əksəriyyətinin nədən baş verdiyi sona qədər açıqlanmır. Elə sonuncu ölüm faktıda bunu sübutlayır. Nazirliyin öz mətbuat xidmətindən verilən məlumata görə, hadisə iyunun 20-də saat 06.45 radələrində cəbhə bölgəsində yerləşən "N" saylı hərbi hissəsində qeydə alınıb. Hərbi hissədə xidmət keçən əsgər Ağakişiyev Bəhruz Xəqani oğlu tabeliyində olan avtomatdan atəş açaraq əsgər Əhmədov Kamran İntiqam oğlunu yaralayıb və əsgər Abdullayev Neyman Elman oğlunu qətlə yetirib. Sonra isə əsgər B.Ağakişiyev silahından atəş açaraq intihar edib. Maraqlıdır, bəs nədən belə hadisə baş verir? Hərbi ekspert Üzeyir Cəfərov hesab edir ki, bu ordudakı generalların bir başa səhlənkarlığı ilə bağlıdır:”Bu gün generallar vəzifələrinə qeyri-ciddi yanaşırlar və müəyyən proseslər baş verir ki, belə hallar arta-arta gedir. Zakir Həsənov ilk günlərdə olduğu kimi yenə də generalları sıxmalıdır. Yoxsa durum daha da ağırlaşacaq. Bunu da deyim ki, son ölüm hadisəsinin yeri gizlədilsədə biz oranın harda olduğunu öyrəndik. Həmin hərbi hissə intizamlı hissə kimi qəbul olunurdu və hadisə günlərində hətta ora xaricdən qonaqlarda getmişdi. İndi təsəvvür edin ki, nümunəvi hərbi hissədə belə hal olursa o birilərində nə baş verir”. Bundan başqa Zakir Həsənovun kadr təyinatlarında da olub-qalan ümidləri doğrultmadığı bildirilir. Əslində həqiqətən də Zakir Həsənov anlaşılmaz təyinatlar edib, sonra bu təyinatlardan imtina etdiyi hallarda olub. Ekspert Üzeyir Cəfərov bildirir ki, hətta ilk anlarda Zakir Həsənov ordu generallarını yaxşı tanımadığından əsasən Baş Qərargah rəisi Nəcməddin Sadıqovun fikirləri əsas götürülürdü və hansısa maraqlar çərçivəsində yersiz təyinatlar olurdu. Məhz bu təyinatlara görə də Zakir Həsənova orduda yanaşma birmənalı olmadı. İndinin özündə belə bildirilir ki, Nəcməddin Sadıqov daha çox təsiretmə imkanlarına malikdir və Zakir Həsənov hələ ki, bunu neytrallaşdıra bilmir. Gəlin bir fakta baxaq. Azərbaycanın Hərbi Hava Qüvvələrinin bir qrup zabiti redaksiyaya müracət edərək bu qoşun növünün komandanı general-mayor Ramiz Tahirovun təyinatının ciddi narazılıq doğurduğunu bildiriblər.Zabitlər bildirirlər ki, müdafiə naziri Zakir Həsənovun HHQ komandanı vəzifəsinə 2011-ci ildə general-mayor rütbəsi almış Ramiz Tahirovu təyin etməsi bütün şəxsi heyətin təəccübünə səbəb olub. Çünki R.Tahirov döyüş zabiti deyil, uzun müddət, az qala 10 il döyüş təlimlərində iştirak etməyib və Prezident Administrasiyasında köməkçi statusunda kabinet işi görüb.Bildirilir ki, R. Tahirov isə vəzifəyə təyin olunan kimi iki xalası oğlunu, HHQ-də yüksək vəzifələrə təyin edib. Onun əmrinə əsasən Müşfiq Şabanov HHQ Qərargah rəisinin müavini, Emin Şabanov isə arxa cəbhə təminatı idarəsinin rəisi postlarına təyin edilib. Zabitlər onu da bildirir ki, HHQ-də aparılan bu kadr dəyişikliklərinin arxasında baş qərargah rəisi Nəcməddin Sadıqov dayanır. N.Sadıqov Müdafiə Nazirliyində hakimiyyəti faktiki ələ alıb. Ekspertlər bildirir ki, son günlərdə orduda gərginliyin yaranmasının başlıca səbəblərindən biri də budur ki, Zakir Həsənovla Nəcməddin Sadıqov üz-üzə gəlib. Yəni iki general arasında münasibətlər pozulub və nəticədə anlaşılmamazlıqlar artıb. Üzeyir Cəfərovun “Unikal”a açıqlamasından:”Öncələr Zakir Həsənovla Nəcməddin Sadıqov hərbi hissələrə gedib bir yerdə şəkil çəkdirirdilərsə, artıq daha bunlar yoxdur. Zakir Həsənov yeni təyin
olunanda Nəcməddin Sadıqov şəraitdən istifadə edərək kadr islahatlarına müdaxilə etmişdi. Hətta ola bilsin ki, Zakir Həsənov kadr dəyişikliyinə yenidən baxsın”. Bunu da qeyd edək ki, bir müddət öncə Müdafiə Nazirliyi başqa bir problemlədə üz-üzə qaldı. Demək olar ki, hər gün Müdafiə Nazirliyindən informasiya sızırdı və bu informasiya təhlükəsizliyinin tam pozulması idi ki, bununda məsuliyyəti Zakir Həsənovun üzərinə düşürdü. Çünki məhz onun nazir təyinatından sonra sanki məxfi məlumatlar asanlıqla nazirlikdən çıxarılırdı. Sonradan isə iddia olundu ki, Zakir Həsənovun əleyhinə informasiyalar elə Nəcməddin Sadıqovun ən yaxın adamı tərəfindən sızdırılırmış. Bütün bunlar isə belə rəy yaradır ki, Zakir Həsənov faktiki olaraq nazirliyi təkbaşına idarə edə bilmir və Nəcməddin Sadıqov qılıncı başının üzərində dayanıb.
