Sələm verməyin qanunla qadağan edildiyi və bununla bağlı Cinayət Məcəlləsində ayrıca maddənin nəzərdə tutulduğunu xatırlatmaq kifayətdir. Biz məsələnin mənəvi-psixoloji tərəfinə diqqət yetirmək istəyirik. Heç kimə sirr deyil ki, hər il yüzlərlə ocaq məhz sələmçiliyə görə sönür, yüzlərlə ev yıxılır, ailələr dağılır, insanlar fəlakətlərə sürüklənir, tələf olurlar. Şəriətdə sələm verməyin Allah dərgahında necə böyük günah hesab edildiyi haqqında onlarla ibrətramiz nümunə də gətirmək olar. Bir sözlə, şəriətdə sələm vermək günahların ən böyüyü hesab olunur və sələm alanın, yəni yüksək faizə pul götürənin buna məcburiyyətdən, çarəsizlikdən getdiyini nəzərə alsaq faizlə pul alanın günahları nisbətən azdır. Çünki adam imkanı olsa sələmdən qismən az faizlə (bu gün Azərbaycan bankları da əslində sələmçiliklə məşğuldur və vətəndaşlara divan tutmaq yolu tutublar) gedib bankdan pul götürə bilər. Sələm verəninsə günahı ölçüyəgəlməzdir və bu yolun yolçularının öz canları, ailə üzvləri, mal-mülkləri ilə çox ağır bədəl ödədikləri haqqında yenə də yüzlərlə misal çəklmək olar.
Bəs elə isə niyə insan oğlu qanunla qadağan və Allah qatında günahların ən böyüyü hesab olunan sələmçiliklə - faizə pul verməklə məşğul olur? Heç tərəddüd etmədən buna intəhasız tamahın səbəb olduğunu göstərmək olar. Yəni təbiətcə aza qane olmayan, qanunsuz yolla olsa belə daha çox qazanmaq istəyirlər və beləliklə daha çox insanı bədbəxt etməyə tələsirlər sanki, "Metro Tağı" kimi məmləkətdə tanınan Tağı Əhmədov kimi...
İndi Tağı Əhmədov da illər uzunu yığıb topladığı milyonlarını daha da artırmaq üçün külli miqdarda sələm verməklə pul qazanmaq eşqinə düşməsinin ağır fəsadlarını yaşayır. Daha doğrusu, tamahı üzündən həm öz canına, həm oğlunun karyerasına, həm də 2 milyon manat puluna, bilmədiyimiz daha çox mal-mülkünə zərər vurmaqla çox ağır bədəl ödəyir. Bəri başdan sağlıq durumunun qənaətbəxş olmamasını və çox ağır xəstəlikdən əziyyət çəkdiyini nəzərə alaraq Tağı Əhmədova şəfa diləyir və günahlarınlın bağışlanmasını Aləmlərin Rəbbindən diləyirik. Amma onun əməllərindən zərəçəkənlərin fəryadına da qulaq asmaq bir mənəvi borcdur və məhz sələm verərək bədbəxt etdikləri ailələrin üzləşdiyi haqsızlıqları oxucuların diqqətinə ərz etməklə başqa kəmfürsətlərə də görk olsun deyə vacib hesab edirik.
Yuxarıda qeyd etdik ki, sələmçilər etdikləri günahın bədəlini təkcə canları və malları ilə deyil, bir çox hallarda ailə üzvlərini fəlakətə sürükləməklə ödəyirlər. Tutaq ki, 73 yaşlı Tağı Əhmədov ömrünü kef-damaqla keçirmiş, az qala yarım əsr vəzifədə olmaqla canına korluq verməyib, hətta vəzifəsindən sui-istifadə edərək yetənə yetib, yetməyəinin də dalınca daş atıb, jurnalistlərə də köntöy söz deməkdən çəkinməyib. Amma onun Bakı şəhəri Nizami Rayon Məhkəməsinin hakimi olan gənc oğlu Rauf Əhmədovun (1974-cü il təvəllüdlü) günahı nədir ki, indi heç nədən dilə-dişə düşüb, uğurlu karyerasına kölgə salacaq əməllər törətməyə məcbur olub? İndi oxuculara Tağı Əhmədovun həbsə atdırdığı zavallıların birinin övladının fəryadından bəzi məqamları təqdim edəcəyik və bu zaman bəlli olacaq ki, Rauf Əhmədov atasının təhlükəli "biznes"ini idarə etməklə necə həyatının səhvini edib. Yeri gəlmişkən, bu gün Əhmədovlar ailəsini on illərlə qoruyan fövqəlgüc - Ramiz Mehdiyev faktoru xeyli zəifləmiş durumdadır. Yəni sabah Rauf Əhmədovun əməllərinin məhkəmə hakimliyi ilə bir araya sığıb-sığmadığı təftiş edildikdə başı özünə qarışan Ramiz Mehdiyevdən kömək istənilsə belə nəticə olmayacaq.
Yeri gəlmişkən, mövzuya dəxli olamasa da Ramiz Mehdiyevdən söz düşəndə onun artıq imkanlarının xeyli məhdudlaşdığını və rayonlara icra başçıları təyin etdirə bilmədiyindən bəhs edilir. Onu nəzərə almaq lazımdır ki, "boz kardinal"ın əlaltıları təkcə mərkəzi və yerli icra strukturlkarına rəhbərlik etmir, bir çox hüquq mühafizə və məhkəmə orqanlarında da onun hələ də xeyli pərəstişkarı var. Sözgəlişi xatırlatdıq...
Sonda sələmə götürdüyü pulu qaytara bilmədiyinə görə 1 ilə yaxın həbsdə olan Səadət Xəlilovun oğlunun dünən Bakı Ağır Cinayətlər Məhkəməsinin qarşısında jurnalistlərə söylədiklərindən bir hissəni oxuculara təqdime dirik. Qeyd edək ki, növbəti məhkəmə prosesi sentyabrın 24 - də saat 17.00-a təyin edilib:
"Atam mərmər biznesi üçün Tağı Əhmədovdan 2 milyon manata yaxın - konkret olaraq 1 milyon 800 min manat sələmə pul götürmüşdü, əvvəl işlər yaxşı gedirdi, sonra biznesdə axsama olanda faizləri vaxtlı-vaxtında ödəyə bilmədiyindən Tağı Əhmədov atamı təhdid etməyə başladı. Sonra işi elə düzüb qoşdular ki, həm atamın borclu olması məhkəmə qərarı ilə təsdiqləndi, buna baxmayaraq atama cinayət işi də açdılar. Artıq 1 ilə yaxındır atam içəridədir. İstintaq da aparılmayıb. Atamla birlikdə işləyənlərin ifadələrindən də məlum olur ki, pulun gerçək sahibi şikayətçi deyil, tağı müəllimdir. Maksimum istintaqda da çalışıblar ki, Tağı Əhmədovun adı heç yerdə getməsin. Hətta anam istintaqa verdiyi ifadəsində Tağı Əhmədovun adını çəksə də müstəntiqlər onun adını siliblər. Elə bu epizod üzrə də prokurporluğa şikayət etmişik ki istintaq düzgün aparılmayıb. Bizim ailə, qohum əqrəba çarəsiz qalıb bir qərara gəldik ki, şərə düşsək də vəziyyətdən çıxış yolu kimi borcun bir hissəsini ödəmək üçün evimizi, mülkümüzü təklif edək. Yəni istədik ki, bu işi sülh yolu ilə həll edək və atam həbsdən çıxandan sonra pulun qalan hissəsini hansısa yolla ödəyək. Bu günədək 300 min manatadək faiz ödəyib atam. Biz müstəntiqə dedik ki, biz borcun bir hissəsini ödəmək istəyirik, o əvvbəlcə borc yiyəsinin Tağı Əhmədov olduğunu boynuna almırdı, amma sonra razılaşdı. Biz zərərçəkənlə görüşə gedəndə bizimlə görüşə Tağı Əhmədov yox, Nizami rayon Məhkəməsinin hakimi olan oğlu Rauf Əhmədov gəldi. O da bildirdi ki, hansı yolla olur olsun bu pulu qaytarmalısınız. Biz də dedik ki, olanımız budur və ancaq pul əvəzinə mülkümüzü təklif edə bilərik. Ona dedik ki, bu mülkləri götürün və həbs qəti imkan tədbirini dəyişdirək və atam azadlığa çıxandan sonra borcun qalan hissəsinin ödənilməsi üçün fürsət əldə edək. Əslində müstəntiq də maraqlı idi ki, atam azadlığa buraxılsın. çünki özü deyirdi ki, içəridə ola ola atanız borcu qaytara bilməz, çölə çıxmalıdır ki, nəsə edə bilsin. Amma Rauf Əhmədov razılaşmırdı, deyirdi ki, elə həbsdə ola ola pul ödənməlidir. Bütün ifadələrdə təsdiq olunub ki, pul borca verilib. Hətta zərərçəkmiş kimi tanınan adam da ifadəsində etiraf edib ki, pul Tağı Əhmədovundur və o borc verilib. Buna görə də bu işə görə heç cinayət işinin açılması da absurd idi. Gün kimi aydındır ki, cinayət işinin açılması Tağı Əhmnədovun və oğlu Rauf Əhmədovun sifarişi ilə olub. Rauf özü yaxşı bilir ki, atam nə qədər borca pul götürüb və nə qədər faiz ödəyib. çünki bütün bu faiz işləri ilə elə Rauf Əhmədovun özü məşğul olub. Pulu Tağı müəllim YAP-ın ofisində özü verib, amma faizləri almağa oğlunu göndərib. istintaq zamanı Rauf özü mənə deyib ki, mən istəsəm atanı evə dustaqlığına buraxdıraram, istəsəm içəridə saxlatdıraram. Təsəvvür edin ki, atamla bərabər təqsirləndirilən daha 2 nəfər var. Məcburi qaydada əməliyyat yolu ilə tutub gətirib istintaqa təhvil verilməsinə baxmayaraq onlara həbs verilmədi, amma atam özü könüllü istintaqa getməsinə baxmayaraq Raufin diktəsi ilə atama həbs verdilər. Raufla danışığından belə çıxdı ki, o istədiyi hər şeyi etməyə qadirdir və atamın taleyi ondan asılıdır. Bax vəziyyət budur". //moderator.az//
