Yanvarın 19-na keçən gecə Ermənistanın Qeqarkunik rayonunun Azat kəndində hərbi mühəndis-istehkamçılar bölüyünün kazarmasında yanğın olub və nəticədə 15 erməni hərbçisi diri-diri yanıb. Bir neçə nəfər isə yanıq xəsarətləri ilə xəstəxanaya yerləşdirilib ki, onlardan vəziyyəti ağır olanlar var. Erməni mediasının məlumatına görə, hadisə ehtiyyatsızlıqdan baş verib.
Hadisə ilə bağlı müxtəlif versiyalar var. Medianın yazdığına görə, həmin gün Ermənistan Prezidenti Vaaqn Xaçatryan 2-ci Ordu Korpusunun komandiri Vahram Qriqoryanı vəzifəsindən azad edib, daha bir neçə hərbi rəhbər isə Müdafiə Nazirliyi rəhbərinin əmri ilə vəzifəsindən azad edilib. İddia olunur ki, hadisə bu qərarlarla bağlıdır və qəsdlə törədilib.
Bildirilir ki, hadisə kazarmada olan benzin çəninin aşması nəticəsində baş verib. Bildirilir ki, əsgərlər kazarmanı isitmək üçün salyarka sobasına benzin tökürmüşlər. Ölən əsgərlərin tağım komandiri isə bunu “yalnız versiya” adlandırıb. Onun sözlərinə görə, əsgərlərə isinmək üçün odun və kömür verilib, həmin axşam otaqda benzin olmayıb.
Ermənistanın hərbi prokuroru Qriqor Elizbaryan isə onunla razılaşmayaraq qeyd edib ki, yanğın yerində içərisində benzin olan kiçik çənlər aşkar edilib. Prokuror hərbi hissəyə pilotsuz uçuş aparatı ilə zərbə endirilməsi versiyasını rədd edib.
Erməni cəmiyyəti hadisəyə görə hakimiyyəti və Müdafiə Nazirliyini günahlandırır. Sosial şəbəkələrin erməni seqmentində baş verən hadisə Ermənistan Müdafiə Nazirliyinin məsuliyyətsizliyi və nazirlikdəki korrupsiyanın tüğyan etməsi ilə əlaqələndirilib.
Ermənilər hakimiyyətin ünvanına sual ünvanlayırlar: “müdafiə sistemimiz niyə belə acınacaqlı vəziyyətdədir? Hərbçilərimizin yerləşdiyi yerlərdə niyə belə pis şərait var? Əsgərimiz niyə ötən əsrdən qalmış salyarka peçindən istifadə edərək qızınırlar?”.
DİA.AZ AYNA-ya istinadla xəbər verir ki, hadisə ilə bağlı danışan erməni analitik Tevos Arşakyan da hakimiyyəti tənqid edib və bildirib ki, ordu korrupsiya içərisindədir: “21-ci əsrdir, bizim əsgərlər otaqları salyarka sobası ilə qızdırırlar. Hərbi hissələrin bütün kazarmalarını, yaşayış məntəqələrini qaz sobası ilə deyil, heç olmasa, odun sobası ilə təchiz etməyə dövlətimizin vəsaiti yoxdurmu? Təbii ki, vəsait var. Məsələn, 2022-ci ildə müdafiə büdcəsinə 360 milyard dram vəsait ayrıldı ki, bunun da müəyyən hissəsi hərbi obyektlərdə təhlükəsizliyin təmininə, kazarmaların, döyüş mövqelərinin, sığınacaqların tikintisinə getməli idi. Bu pul hara getdi? Pulların həm Müdafiə Nazirliyinin rəhbərliyinin, həm də generalların cibinə girdiyi tamamilə açıq-aşkar görünür. Birbaşa hərbi hissələrə gələnləri də kiçik komandirlər, rəislər, arxa cəbhə rəisləri taladılar. Ona görə də hərbi hissələrdəki mövcud vəziyyət, Seyran Ohanyanın dövründə baş verənlərdən çox da fərqlənmir. Hansı ki, Ohanyanın zamanında irimiqyaslı korrupsiya Müdafiə Nazirliyinin, ordu korpuslarının və hərbi hissələrin bütün idarələrinə nüfuz etmişdi”.
“Bizim generallar 7-8 il əvvəlkinə baxanda bu gün yoxsullaşıblar? Onların lüks avtomobil parkları boşdur? Yoxsa Ermənistanda özlərinə villa tikməkdən, xaricdə villa almaqdan əl çəkiblər? Əlbəttə ki, yox - oğurluğun miqyası demək olar ki, eyni qalıb. Əks halda, keçmiş müdafiə naziri David Tonoyan indi müttəhimlər kürsüsündə oturmazdı”, - deyə Arşakyan əlavə edib.
Analitik həmçinin qeyd edib ki, baş verən hadisənin irimiqyaslı korrupsiya və mənimsəmələrdən başqa bir neçə başqa səbəbləri də var: “Bu hadisə həm də onu görstərdi ki, komanda heyətinin, yanğın təhlükəsizliyinə cavabdeh olan xidmətlərin qeyri-mütəşəkkilliyi, ləngliyi, səliqəsizliyi var. Onlar hərbçilərin bu soyuq havada binalarını nə və necə qızdırdıqlarını görmürdülər? Təbii ki, görürürlər, amma buna göz yumurlar. Çünki hamı oğurluq edir. Bəs baş verənlərə görə yalnız ordu korpusunun komandiri günahkardır? Təbii ki, yox, çünki o, sadəcə olaraq bu korrupsiya zəncirinin aralıq halqasıdır”.
“Normal demokratik ölkədə - və məlum olduğu kimi, Ermənistan 2018-ci ilin yazından özünü belə dövlət sayır - belə faciələr baş verərsə, Müdafiə Nazirliyinin bütün rəhbərliyi istefa verir. Amma bizim müdafiə nazirimiz Suren Papikyan ölənlər, onların yaxınları və nəhayət, ölkə qarşısında günahını yumaq üçün istefa ərizəsi yazmağı ağlına belə gətirmədi. Paşinyan isə hökumətin iclasında bu faciəyə görə naziri və Baş Qərargah rəisini günahlandırmadı”, - ekspert vurğulayıb.
Arşakyan deyib ki, ölkə rəhbərliyi erməni əsgərlərinə mal-qara kimi yanaşır: “Hökumətimiz, Müdafiə Nazirliyimiz, generallarımız ölkəni müdafiə edən hərbçilərə normal, təhlükəsiz qızdırıcı qurğunu yaraşdırmır, onlara mal-qara kimi yanaşırlar. Azat kəndindəki mühəndis-istehkamçıların yanan kazarması mal tövləsindən fərqlənmir. Hakimiyyət isə bizə yorulmadan nağıl danışır ki, hərbçilərimizin növbətçi olduğu döyüş mövqeləri səhra mətbəxi və hamamla təchiz olunub. Paşinyanın hərbi ilə bağlı reklam kampaniyasını xatırlayın. Deyirdi ki, hakimiyyət hərbi qulluqçuların qidasının keyfiyyətinin yaxşılaşdırılmasına böyük diqqət yetirir. Hətta guya əsgərlərə çiyələk də yedizdirirlər. Bəs korrupsiya sxemi? Yoxsa əsas odur ki, əsgərin çiyələk yediyini əks etdirən şəkillər var?”.
“Orduya çiyələk və quru şkaf almaqdansa, qızdırıcı avadanlıq alsalar, daha yaxşı olardı. 2020-ci ilin İkinci Qarabağ müharibəsində oğlunu itirən bir ananın sözləri yadıma düşür: “Oğullarımıza çiyələk yedizdirdilər, sonra da öldürdülər”. Təəssüf ki, bu gün də heç nə dəyişməyib. Hərbçilərin döyüşdə həlak olması başadüşüləndir. Ancaq bölmələrin zəif təchiz olunması səbəbindən bir anda 15 hərbi qulluqçu ölürsə, bu, dəhşətdir, cinayətdir. Ən əsası isə 15 hərbçimizin ölümündə əsl günahkarların əziyyət çəkəcəyinə inanmıram”, - Arşakyan fikrini tamamlayıb.
Sosial şəbəkələrdə erməni fəallar, ictimai şəxslər bu hadisənin ordudakı xaosun, özbaşnalığın, korrupsiyanın tüğyan etməsi ilə əlaqələndirir və hakimiyyəti sərt tənqid edirlər.
