"Qazprom" şirkəti 2026-cı ilin qış mövsümü üçün qaz anbarlarının hazırlığını başa çatdırıb. Belarus və Ermənistandakı yeraltı anbarlar nəzərə alınmaqla, şirkətin əməliyyat qaz ehtiyatları 74,543 milyard kubmetr təşkil edəcək. "İnterfaks" agentliyinin məlumatına görə, eyni zamanda Rusiya anbarlarında ehtiyatların hədəf həcmi rekord həddə - 73,296 milyard kubmetrə çatıb.

Rusiyanın yeraltı anbarlarının maksimum gündəlik tutumu rekord səviyyədə - 858,8 milyon kubmetr səviyyəsində saxlanılıb. Şirkətin açıqlamasına görə, bu, tələbatın kəskin dəyişməsi halında tədarük həcmini tez bir zamanda artırmağa və soyuq mövsümdə istehlakçılar qarşısında öhdəliklərini tam yerinə yetirməyə imkan verəcək. Oktyabrın əvvəlində "Qazprom" həmçinin Rusiyanın Vahid Qaz Təchizatı Sisteminin və "Sibir Gücü" magistral yolunun qaz kəmərlərində planlaşdırılan profilaktik və təmir işlərini başa çatdırıb. 900-dən çox qaz istehsalı, nəqli, saxlanması və emalı müəssisəsində bərpa işləri aparılıb.

Görünür ki, Rusiya bu qış da Paşinyanı qazla sınağa çəkmək istəmir. Elə son çıxışlarında erməni baş nazir də Moskvanın könlünə xoş gələn bəyanatlar səsləndirib. Moskva ilə İrəvan bu qışdan da mehriban-düşmən kimi çıxacaqmı?

İqtisadçı Eldəniz Əmirov Musavat.com-a bildirib ki, Moskva İrəvanı qazsız nəinki qoymayacaq, qaz istəyən heç kimi qazsız qoymayacaq: “Çünki qaz anbarları yetərincə dolub və hasilat həcmi var. Qaz borularını bağlamaq çox çətindir, qaz quyularının bağlanması çox böyük xərc tələb edir, hətta bəzi hallarda qəzalara belə səbəb olur. Ona görə də çıxan qazı satmaq lazımdır”.

Onun sözlərinə görə, hazır infrastruktur var ikən Rusiya Ermənistandan imtina etməz: “Əks halda, Ermənistanı qazla təchiz etməyə hazır olan ölkələr var. Məsələn, İran üçün fürsət yarana bilər. Buna görə də istənilən müraciət Rusiya tərəfindən müsbət qarşılanır. Əvvəlki dövrlərdə Rusiya bundan siyasi alət kimi istifadə edirdi, amma hazırda belə imkan yoxdur, çünki iqtisadi cəhətdən təminata ehtiyac var.
Düzdür, hərdən qaz təmiri ilə bağlı bağlanma halları görülür, yaxud müəyyən siyasi bəyanatlar, subliminal mesajlar verilir ki, “qazınız bizdən asılıdır, bağlaya bilərik”. Amma heç bir halda Rusiya Ermənistana qaz təchizatını saxlamayacaq, ta o vaxta qədər ki, Ermənistan tədricən hissə-hissə bu qaz təchizatını digər istiqamətlərdən, o cümlədən Azərbaycandan qəbul etsin”.

O ki qaldı “Sibir gücü”nə, ekspert düşünür ki, Rusiyanın ən uğursuz layihələrindən biridir: “Çin “Sibir gücü-1”, “Sibir gücü-2” və “Sibir gücü-3” layihələri üzrə Rusiyaya böyük ölçüdə maliyyə itkisi verib. Yəni Çin tərəfindən əvvəlcədən razılaşdırılmış layihələrin icrası saxlanıb və Uzaq Şərqdə böyük həcmdə maliyyə yatırılaraq görülmüş layihələr yarımçıq qalır. Bu, xüsusilə “Sibir gücü-2” və “Sibir gücü-3” layihələrinə aiddir”.