Yeni Azərbaycan Partiyasının (YAP) İcra katibinin müavini, Milli Məclisin İctimai birliklər və dini qurumlar komitəsinin sədri Siyavuş Novruzov gündəmdə olan məsələlər ilə bağlı “Ölkə.Az” saytına müsahibə verib
DİA.AZ həmin müsahibəni təqdim edir:
– Siyavuş müəllim, bir neçə gün öncə Prezidentin sərəncamı ilə Nəqliyyat Nazirliyi Rabitə və Yüksək Texnologiyalar Nazirliyinə birləşdirildi. Daha hansı qurumlarda oxşar struktur islahatları gözlənilir?
– Bilirsiz ki, Nəqliyyat Nazirliyinə aid olan bütün strukturlar ayrı-ayrılıqda fəaliyyət göstərirdi. Artıq orada ümumi fəaliyyət göstərə biləcək geniş sahə qalmamışdı. Nəqliyyat Nazirliyində ancaq dövlət siyasətinin həyata keçirilməsi sahəsi qalırdı ki, cənab Prezident də bununla bağlı sərəncam imzaladı.
– Hazırda Ziya Məmmədov YAP-ın üzvü olaraq qalır?
– Əlbəttə ki, o YAP-ın üzvü olaraq qalır. Onun vəzifədən azad olunması YAP-dan da çıxarılması mənasını vermir. Ziya Məmmədova əlavə hər hansı vəzifə verilib-verilməməsi məsələsi isə cənab Prezidentin səlahiyyətlərinə aid olan məsələdir. Biz buna qarışa bilmərik.
– Başqa hansı qurumların birləşdirilməsi və ya yaradılması gözlənilir?
– Bu məsələ də cənab Prezidentin səlahiyyətlərinə aid olan məsələdir. Yəni, cənab Prezident məsləhət bildiyi zaman hər hansı nazirliyi ləğv edə və ya yarada bilər. Bu məsələ bilavasitə ölkə başçısının səlahiyyətlərinə aid olan məsələdir.
– Bu ilin mart ayına qədər Azərbaycanın vitse-prezidentlərinin təyin olunacağı ilə bağlı xəbərlər yayılır. Bütün bunlar nə dərəcədə doğrudur?
– Təbii ki, mən də bu cür məlumatları tez-tez oxuyuram. Hətta, yazırlar ki, guya martda və yaxud da apreldə vitse-prezidentlər təyin olunacaq və s. Ancaq bunu cənab Prezidentdən başqa heç kəs bilmir. Vitse-prezidentlərin nə zaman və bu vəzifəyə kimlərin təyin olunacağını cənab Prezidentdən savayı heç kəs bilə bilməz.
– Azərbaycan hakimiyyəti blogger Aleksandr Lapşini ölkəyə ekstradisiya etməklə daha çox nəyi qazana bildi?
– İlk növbədə Aleksandr Lapşinin Azərbaycana ekstradisiya edilməsi bir daha göstərdi ki, kimliyindən asılı olmayaraq, Azərbaycan əleyhinə hər hansı iş aparan gec-tez öz cəzasını alacaq. Bu il Xocalı soyqırımından 25 il ötür. Xocalı soyqırımının törədilməsində iştirak etmiş bütün şəxslərin siyahısı artıq istintaqa bəllidir. Həmin şəxslərin hamısı gec-tez ədalət mühakiməsinə cəlb olunacaq. Şübhəsiz ki, Ermənistanın indiki rəhbərliyi, o cümlədən Serj Sarkisyan, Robert Koçaryan və digər şəxslər Xocalıda və digər ərazilərimizdə törətdikləri cinayətlərə görə Azərbaycan məhkəməsi qarşısında cavab verəcəklər. Şəxsən Serj Sarkisyan törətdiyi qanlı cinayətlərə görə Azərbaycan xalqı qarşısında cavab verəcək.
– Azərbaycanın bir sıra siyasətçiləri blogger Aleksandr Lapşinin ermənilərin girovluqda saxladığı Dilqəm Əsgərov və Şahbaz Quliyevlə dəyişdirilməsini təklif edir. Bu, mümkün ola bilərmi?
– Bu çox səhv fikirlərdir. Bu fikri kim ortaya atıbsa, onun nə beynəlxalq hüquqdan başı çıxır, nə də Aleksandr Lapşinin Azərbaycana ekstradisiyasının siyasi əhəmiyyətini dərk edir. Aleksandr Lapşin Azərbaycan dövlətinə qarşı cinayət törətmiş şəxsdir. O, beynəlxalq hüququn prinsipləri və dövlətlərarası ikitərəfli əməkdaşlıq müqaviləsi əsasında Azərbaycana ekstradisiya olunub. Biz onu Ermənistan ilə dəyişməklə, artıq Dilqəm Əsgərov və Şahbaz Quliyevin hansısa cinayət törətdiyini təsdiq edə bilərik. Halbuki, Dilqəm Əsgərov və Şahbaz Quliyev heç bir cinayət törətməyib. Onlar Azərbaycan ərazisinə, öz doğma ata-baba yurdlarına gediblər. Onlar öz ərazimizi ziyarət ediblər, onların girovluqda saxlanılması erməni quldurluğudur. Bütün bunlara görə də indi Aleksandr Lapşini Dilqəm Əsgərov və Şahbaz Quliyevlə dəyişsək, o zaman girovluqda saxlanılan soydaşlarımızın cinayət törətdiyini yalandan təsdiq etmiş olarıq. Hesab edirəm ki, bu cür fikirlərə qəti yol vermək olmaz. Bu gün Rusiya ilə Ermənistan arasında ekstradisiya haqqında qanun var. Rusiya istədiyi an öz vətəndaşı olan Dilqəm Əsgərovu öz ərazisinə ekstradisiya edə bilər. Ermənistan da buna heç bir etiraz edə bilməz.
Ona görə də bu məsələni ATƏT-in Minsk qrupunun həmsədr ölkələri olan Rusiya, ABŞ və Fransa Ermənistana tələb kimi qaldırmalıdır. Dünyada insan hüquqlarını müdafiə edən bütün beynəlxalq təşkilatlar, o cümlədən Avropa Şurası, Avropa Məhkəməsi, ATƏT və digər qurumlar bu məsələni gündəmə gətirməlidir. İşğalçı Ermənistan qanunsuz olaraq Dilqəm Əsgərov və Şahbaz Quliyevi girov saxlayır. Axı onlar nə cinayət törədib? Məgər öz torpaqlarını, dədə-baba məzarlarını ziyarət etmək cinayətdir? Beynəlxalq təşkilatlar buna qarşı Ermənistana təzyiq göstərməlidir.
– Yaxın zamanlarda YAP-la digər siyasi partiyalar arasında dialoq gözlənilir?
– Bildiyiniz kimi, siyasi partiyalar bir neçə yerə bölünür. Onlardan bəziləri parlamentdə təmsil olunur, bəziləri isə olunmur. Hazırda Azərbaycanda 100-ə qədər siyasi partiya var. Onlardan 54-ü dövlət qeydiyyatından keçib. Həmin partiyaların isə bir hissəsi bu gün Milli Məclisdə təmsil olunur, müəyyən hissəsi isə ümumiyyətlə fəaliyyət göstərmir. Bu gün elə siyasi partiyalar var ki, ancaq qəzet səhifəsində və ya Bakı ərazisində fəaliyyət göstərir. Çox az sayda partiyaların yerli regional təşkilatları var. Təkcə Yeni Azərbaycan Partiyası (YAP) respublikanın bütün rayon və şəhərlərində fəaliyyət göstərir.
Dialoq nədir? Dialoq odur ki, hər hansı təklif, rəy, fikir olsun, onun ətrafında müzakirələr aparılsın. Misal üçün, YAP-ın partiyalararası əlaqələr və dialoq komissiyası var. Həmin komissiyanın sədri cənab Prezidentin köməkçisi Əli Həsənovdur. Ötən illər ərazində həmin komissiya bir neçə dəfə toplanıb, müxtəlif müzakirələr aparılıb. Biz hər zaman dialoqun tərəfdarı olduğumuzu söyləmişik. Siyasi partiyalarla istənilən məsələni müzakirə etməyə hazırıq.
Bizimlə dialoqda iki siyasi partiya iştirak etmir ki, bunlar da Müsavat partiyası və AXCP-dir.
Ancaq bu gün Müsavat bizim üçün legitim deyil. Çünki bu partiyada qurultay saxtalaşdırılıb, Arif Hacılı da qanunsuz olaraq başqan seçilib. Müsavat Partiyasının son qurultayında seçki bülletenləri saxtalaşdırılıb. Ona görə də biz Arif Hacılının Müsavat partiyasına sədr seçilməsini legitim hesab etmirik. Müsavatda saxta seçkilər keçirildiyi üçün bu gün partiya üç hissəyə parçalanıb. Qurultay ərəfəsində Arif Hacılı öz adamlarını bir araya toplayıb qərargah yaratmışdı. Onları da qurultaya nümayəndə seçmişdilər. Nəticə etibarı ilə də qurultaydan sonra Müsavat parçalanmağa başladı. Vaxtilə bu partiyanın yaranmasında və formalaşmasında rolu olan şəxslər bu gün ayrı tərəfdə dayanıblar. Digər tərəfdə olan insanların isə Müsavata nə zaman gəldiyi bəlli deyil.
O ki qaldı AXCP-yə, bu, partiya deyil. AXCP xarici təşkilatların və erməni lobbisinin Azərbaycana qarşı istifadə etdiyi alətdir. Yəni, xarici təşkilatlar və erməni lobbisi nə zaman hansı tapşırığı verərsə, AXCP də onları yerinə yetirəcək. Misal üçün, onlar AXCP-yə desə ki, gedib dialoqda iştirak edin, hamıdan birinci bunlar gələcəklər. İştirak etmə dedikləri üçün AXCP dialoqda iştirak etmir. Bütün bunlar artıq hər kəsə yaxşı bəllidir.
Mən ötən dəfə də bunu söyləmişəm. Kimsə dialoq aparmaq istəyirsə, bu, mətbuata müsahibə verməklə edilmir. Yazılı və əsaslandırılmış şəkildə hər hansı təklif və ya layihə siyasi partiyalar tərəfindən təqdim olunur, sonra da qrup halında müzakirə olunur. Yenə də deyirəm ki, biz müzakirələrdən qorxmuruq, dialoqa hər zaman hazırıq.
– YAP qarşıdan gələn prezident seçkiləri üçün hazırlığa başlayıbmı?
– Bilirsiniz ki, bu il heç bir seçki yoxdur. Ancaq biz bu ilin yanvar ayından etibarən YAP-ın 84 rayon-şəhər və 8 minə yaxın ilk təşkilatlarında hesabat-seçki yığıncaqları keçiririk. Hesabat-seçki yığıncaqları keçirdikdən sonra isə mərhələ-mərhələ konfranslar keçiriləcək. Biz hər bir seçkiyə ən azı bir il öncədən hazırlaşırıq. Bəzi partiyalar isə seçkilər elan olunana qədər belə namizədlərin kim olacağını bilmir. Bu barədə istənilən avropalıya desən, gülər. Baxın, Fransada gələn il seçkilər olacaq. Ancaq namizəd bir il əvvəldən müəyyən edilir. ABŞ-da da seçkilərə bir il yarım qalmış namizədlər arasında mübarizə getdi. Ancaq Azərbaycanda bəzi siyasi qüvvələr gözləyir ki, seçkilər elan olunsun, sonra namizədləri müəyyən etsinlər. YAP isə seçkilərə bir il öncədən hazırlaşır, öz namizədini müəyyənləşdirir.
