Parlamentin son iclasında millət vəkili Tahir Kərimli nazirlərin və məmurların müraciətlərə cavab verməməsindən şikayətlənib. Deputat bildirib ki, seçicinin hansısa problemi ilə bağlı nə Səhiyyə, nə də Əmək və Əhalinin Sosial Müdafiə Nazirliyi ilə əlaqə saxlaya bilir. Parlament üzvü məmurların deputatları saymadığını söyləyib: “Səhiyyədən danışırıq, səhiyyə naziri cavab vermir. Prezident sizi vəzifəyə qoyub ki, işləyin, üzərinizə düşəni edin, islahatlar keçirin! Nə vaxta kimi xalqdan qaçacaqsınız?!
Camaata deməyə sözümüz yoxdur”. T.Kərimli büdcə müzakirələrində iştirak edən hökumət nümayəndələrinin biganəliyindən də gileylənib. Vurğulayıb ki, dövlət qurumlarının təmsilçiləri deputatların çıxışına çox etinasız yanaşırlar: “Qarşıdan büdcə müzakirələri gəlir. Hökumət üzvləri yenə Milli Məclisə gələcək, məruzə edəcək, ora-bura baxacaqlar və çıxıb gedəcəklər”. Xatırladaq ki, Tahir Kərimlinin gündəmə gətirdiyi problem mütəmadi olaraq digər həmkarları tərəfindən səsləndirilir. Plenar iclaslarda çıxış edən millət vəkilləri dövlət orqanlarına ünvanladıqları suallara standart cavab verildiyini, problemin isə həll edilmədiyini vurğulayırlar.
Millət vəkili Elman Məmmədov “Şərq”ə açıqlamasında həmkarı Tahir Kərimlinin emosional çıxış etdiyini söyləsə də, haqsız olmadığını bildirib. Parlament üzvü qeyd edib ki, əksər deputatın məqsədi öz seçicilərinin problemlərinin həllinə nail olmaqdır:
“Millət vəkilləri məhz bu məqsədlə hansısa dövlət qurumuna, nazirə, məmura müraciət edir. Əhalidən daxil olan şikayətləri, problemləri müvafiq orqanların diqqətinə çatdırırıq. Bəzən məktub yazır, bəzən isə telefonla xahiş edirik ki, vətəndaşın problemi həll olunsun. Mən Yeni Azərbaycan Partiyasının təmsilçisiyəm, iqtidar partiyasının nümayəndəsiyəm. Bu gün yüksək vəzifədə olanların hamısını Prezident İlham Əliyev təyin edib. Dövlət başçısı eyni zamanda YAP-ın sədridir. Ölkə rəhbəri nazirləri, məmurları vəzifəyə təyin edəndə onlara ciddi tövsiyələr verir, xalqın qulluğunda durmağı tapşırır. Vurğulayır ki, o, özünü xalqın xidmətçisi hesab etdiyi kimi təyin etdiyi bütün məmurlar da eyni yolu getməlidir. Vətəndaşların problemlərinə laqeyd yanaşmamalı, yerlərdə narazılıq yaratmamalıdırlar. Müxtəlif bölgələri, minlərlə seçiciləri təmsil edirik. İnsanların problemləri kifayət qədər çoxdur. Yol, işıq, su, qaz, səhiyyə, təhsil, əhalinin dolanışığı, pensiya, sosial müavinət və s. çətinliklərlə bağlı seçicilərdən yüzlərlə şikayət məktubu alırıq. Bunları hökumət üzvlərinin nəzərinə çatdırır, tədbir görülməsi üçün çağırış edirik. Tahir Kərimli də bunu istəyir. Əgər yerlərdə xırda məmurlar vətəndaşların problemlərini həll etsələr, narazılıq böyüməz, mərkəzə çatmaz. Bu gün Prezidentin, Birinci Vitse-prezidentin, Baş nazirin, Milli Məclis Sədrinin ünvanına ona görə çoxsaylı müraciətlərin daxil olmasının səbəbi onların yerlərdə həll olunmamasıdır”.
E.Məmmədov bildirib ki, müraciətlərə müsbət cavab verən məmurlarla yanaşı, problemlərə göz yumanlar da var:
“Parlamentdə Şuşa, Xocalı və Xocavəndi təmsil edirəm. 15 minə qədər də Ağdam rayonundan seçicim var. Ümumən, 45 min insan mənə səs verib. Bu da uşaqlı-böyüklü problemli kateqoriyaya aid 100 min məcburi köçkün deməkdir. Onlar bizə, biz də müvafiq qurumlara müraciət edirik. Deməzdim ki, bütün müraciətlərimiz cavabsız qalır, hamısına laqeyd yanaşılır. Elə söyləsək, ədalətsizlik etmiş olarıq. Məsuliyyətli nazirlər, komitə rəhbərləri, icra başçıları çoxdur. Həllini tapan problemlərimiz də saysız-hesabsızdır. Təbii ki, hələ də həllini tapmayanlar var. Başa düşürük, elə məsələlər var ki, həqiqətən həlli çətindir, bəzi dövlət qurumlarını qınamıram. Lakin müraciətlərimizə şablon cavablar verənlər az deyil. Məsələn, bir sıra ali təhsil müəssisəsinə müraciət edirik ki, məcburi köçkün gəncin təhsil haqqına güzəşt edilsin. Bəzi üzdəniraq rektorlarımızın adından hazır, şablon cavab gəlir ki, “maliyyə sahəsində problemlər olduğuna görə bunu etmək imkan xaricindədir”. Bu artıq “başdaneləmə”dir. Yaxud bir neçə qazimizin işlə təmin olunması haqqında komitələrə məktub göndərirəm. Cavabında “qəbul dövlət proqramı əsasında olduğu üçün həmin şəxs dövlət qulluğuna imtahan verməlidir” deyilir. Mən də bildirirəm ki, qazilərimiz canını Vətən uğrunda qurban verməyə gedərkən, qəhrəmanlıq göstərərkən öz imtahanlarını veriblər. Əfsuslar olsun ki, belə arzuolunmaz mənzərələrə də rast gəlirik”.
Digər millət vəkili Razi Nurullayev də “Şərq”ə açıqlamasında bəyan edib ki, bütün müraciətlərin kütləvi olaraq cavabsız qaldığını demək olmaz. Deputatın qənaətincə, məmurlar bütün millət vəkillərinə etinasız yanaşmır:
“Ayrı-ayrı məmurların münasibətləri də fərqli olur. Ya da ola bilər ki, deputatlar arasında fərq qoyurlar. Millət vəkilinin səlahiyyəti və sözünü deməsi üçün tribuna var. Sualı cavabsız qalan deputat konkret ad çəkməklə özünə qarşı hörmətsizlik edən məmuru məsuliyyətli olmağa səsləyə bilər. Nəzərə alaq ki, tənqidi çıxışlardan sonra adıçəkilən qurumlara və ya məmurlara cəmiyyətin baxışı da dəyişir. Hətta ölkə rəhbərliyində də həmin məmurlara qarşı münasibət dəyişmiş olur. Öz təcrübəmdən çıxış edərək deyə bilərəm ki, əksər məmurlar deputatlarla qarşıdurmaya getməməyə çalışır. Amma elə məsələlər var ki, məsələn, pensiyaların və sosial müavinətlərin kəsilməsi, işlə təmin olunmaq və s. mövzularda deputatlar problemlə üzləşirlər. Müraciətlərimizə imtina cavabı gəlir. Anlayırıq ki, bütün tələblərə müsbət cavab verilməsi mümkün deyil. Yəni Tahir müəllimin qaldırdığı problem bəzi hallarda kəskin formada qarşımıza çıxır”.
Parlament üzvü qeyd edib ki, bəzən məsələ qaldırılsa da, problem həll edilmir:
“Nazirlər, komitə rəhbərləri bizi çox qəşəng dinləyir, xoş münasibət göstərirlər, amma sonda nəticə olmur. Şablon cavablarla kifayətlənirlər ki, “hələlik imkan yoxdur, sonra müraciət edin”. Bizim üçün isə konkret nəticə lazımdır. Çünki deputat seçici ilə işləyir. Seçici birbaşa deputata müraciət edir və bizi hədəf alır. Hətta bəzən kobud şəkildə deputatın üzərinə gəlirlər. Deputatları başa düşmək lazımdır. Seçicinin problemi həll olunmayanda növbəti seçki kampaniyasında deputatı daşa basır, fəaliyyətsizlikdə ittiham edir. Ona görə də deputatlar həyəcan təbili çalırlar. Millət vəkilləri məmurlarla vətəndaş arasında təhlükəsizlik buferi, körpü rolunu oynayır. Bu körpünü dağıtmaq lazım deyil. Bəzən məmurlar bu körpüdən keçmək istəmir”.
R.Nurullayev həmkarı T.Kərimlinin büdcə müzakirələri ilə bağlı iradına da münasibət bildirib:
“Keçən il büdcə müzakirələrində bütün deputatalara çıxış üçün imkan yaradıldı. Sözü olan millət vəkillərinin hamısı danışdı. Parlament sədri builki müzakirələrdə də hər kəsə şərait yaradılacağını vurğulayıb. Büdcə müzakirələri geniş çərçivədə aparılmalı, deputatlara sual vermək imkanı yaradılmalıdır. Ümid edirik, bununla bağlı problem yaşamayacağıq”.
