Avropa İnsan Haqları Məhkəməsi “Paşinyan Ermənistana qarşı” başlıqlı iş üzrə kommunikasiyanı tamamlayıb. İş üzrə ərizəçi Ermənistanın hazırkı baş naziri Nikol Paşinyandır, o, əvvəllər jurnalist olub və müxalif “Haykakan Jamanak” qəzetinin baş redaktoru vəzifəsində çalışıb. Yanvarın 18-də Strasburq məhkəməsi qərarını elan edəcək. İlkin məlumata görə, Avropa Məhkəməsi 2008-ci ilin fevralında Ermənistanın baş nazirinin hüquqlarının pozulmasını tanıyıb.
DİA.AZ Virtualaz.org-a istinadən xəbər verir ki, Nikol Paşinyanın maraqlarını məhkəmədə İrəvanda fəaliyyət göstərən vəkil V.Qriqoryan təmsil edib. Paşinyanın Avropa Məhkəməsinə şikayəti 2008-ci il fevralın 19-da keçirilən prezident seçkiləri ərəfəsində baş vermiş hadisələrlə bağlıdır. Sonra o, namizəd Levon Ter-Petrosyanın (Ermənistanın birinci prezidenti - red.) fəal tərəfdarı və təşviqat qərargahının üzvü olub.
Şikayətə görə, 2007-ci il oktyabrın 23-də Nikol Paşinyan Ter-Petrosyanın tərəfdarları ilə birlikdə qarşıdan gələn mitinq barədə ictimaiyyəti məlumatlandırmaq üçün küçə yürüşü keçirib. Şikayətçi iddia edir ki, polis əvvəlcə yürüşün dayandırılması əmrini verib, daha sonra iştirakçılara hücum edərək onları həbs edib.
2008-ci il fevralın 19-da Ermənistanda prezident seçkiləri keçirildi. Əsas iddiaçılar o vaxt hakim partiyanı təmsil edən baş nazir Serj Sərkisyan və müxalifətin əsas namizədi Levon Ter-Petrosyan idi.
Məlumatda deyilir ki, seçkilərin ilkin nəticələrinin açıqlanmasından dərhal sonra Ter-Petrosyan tərəfdarlarını seçki pozuntularına etiraz etmək üçün İrəvanın mərkəzindəki Azadlıq meydanına toplaşmağa çağırıb. Hakimiyyət müxalifət tərəfdarlarının qanunsuz təqibləri ilə cavab verib. 2008-ci il martın 1-də polis Azadlıq meydanına gəldi. Paşinyan iddia edir ki, onun əməkdaşları meydanda düşərgə salan nümayişçilərə hücum edib və onları şiddətlə döyüblər. 2009-cu il iyulun 3-də Paşinyan İrəvanın Kentron və Nork-Maraş Rayon Məhkəməsi qarşısına çıxıb və onun barəsində iki aylıq həbs-qətimkan tədbiri seçilib.
Avropa Məhkəməsinə müraciətində Nikol Paşinyan şikayət edir ki, konvensiyanın 5-ci maddəsinə uyğun olaraq onun həbsi qanunsuz olub. Paşinyan həmçinin iddia edir ki, o, dinc nümayişlər zamanı verdiyi çıxışlara və bəyanatlara görə mühakimə olunub. Bundan başqa, onun təqibi siyasi motivli olub və onun müxalifət fəaliyyətinin qarşısını almaq məqsədi daşıyıb.
Qeyd olunduğu kimi, məhkəmə iddiası hələ N.Paşinyan mətbuatda çalışdığı zaman qaldırılıb. Amma Paşinyan 2018-ci ilin mayından Ermənistana rəhbərlik edir və bu müddətdə onun iddiadan imtina üçün imkanları var idi. Maraqlıdır ki, baş nazir bu istiqamətdə təşəbbüs belə, göstərməyib və maraqlı bir presedentə imza atıb.
DİA.AZ-ın məlumatına görə, deputat Arzu Nağıyev “Yeni Müsavat”a bildirdi ki, Nikol Paşinyanın Avropa Məhkəməsinə müraciəti və həbsinin qanunsuz olması məsələsinin məhz üstündən bir xeyli keçməsinə baxmayaraq, indi gündəmə gəlməsi və onun qələbəsinin indi açıqlanmsı maraq kəsb edir: “Məlumdur ki, Paşinyanın müraciətində Ermənistan dövləti əsas cavabdeh kimi göstərilsə də, əsas subyektlərindən biri məhz Sərkisyandır. Yəni 2008-ci il fevralın 19-da Ermənistanda prezident seçkiləri keçiriləndə müxalifətin əsas namizədi Levon Ter-Petrosyan idi və hakim partiyanı təmsil edən o vaxt baş nazir olan Serj Sərkisyan iddiaçılardan biri idi. O vaxt Nikol Paşinyan müxalif ”Haykakan Jamanak" qəzetinin baş redaktoru vəzifəsində işləyib və Levon Ter-Petrosyanın tərəfdarı və dəstəkçisi olub və Ter-Petrosyan tərəfdarlarını seçkidə baş verən pozuntulara etiraz etmək və mitinq etmək üçün çağırış edib, Paşinyan da orada iştirak edib və həbs olunub. Öz həbsinin qanunsuz olduğunu iddia edən Paşinyan Avropa Məhkəməsinə müraciət edib. Həmin vaxt Ermənistan prezidenti Robert Köçəryan idi. Yəni bu gün Paşinyan artıq Avropa Məhkəməsi vasitəsilə həm Köçəryanın, həm də Sərkisyanın qanunsuzluqlarını ortaya qoyur və bunu Avropa, yəni Qərb vasitəsilə edir". A.Nağıyevin sözlərinə görə, Qərb də bunu bilərəkdən edir və rusiyayönümlü Köçəryan və Sərkisyanın qanunsuz hərəkətlərini qabardır: “Paşinyanın özü də belə bir siyasi gediş edərək ”Qarabağ klanı"na qarşı siyasi hücum edir. Təbii ki, onun məqsədlərindən biri də qanunsuz həbsini leqallaşdırmaq və öz üzərindən sildirməkdir, paralel olaraq da “demokratiya” təzahürü kimi hakimiyyətini piar etməkdir. İnandırıcı deyil ki, bu, onun hakimiyyətdəki mövqeyinə təsir edə bilər, çünki yəqin ki, hətta təzminat belə alsa, onu elə bir yerə yönəldəcək ki, özünü sığortalasın". Azərbaycanın Ermənistanı beynəlxalq məhkəməyə vermək məsələsinə gəldikdə, deputat iki məsələ arasında paralellik aparılmasını düzgün saymır: “Bunlar müqayisəyə belə gəlməz. Bir var vətəndaş öz dövlətini məhkəməyə verir, digər məsələ isə ərazi bütövlüyümüzü pozmuş, təcavüzkar, təxribatçı, terroru özü üçün siyasət seçən bir dövlətin, Ermənistanın cavabdeh olmasıdır. Bunun nəticəsi daha ciddi olacaq”.
İstisna deyil ki, özünün baş nazirinə uduzmuş Ermənistan 30 illik işğal dövründə Azərbaycana vurduğu külli miqdarda zərərə görə cəzalandırılacaq. Paşinyanın Qarabağ klanının liderlərinə qalib gəlməsi dolayısı ilə işimizə yarayır. Çünki həm də Köçəryan-Sərkisyan cütlüyü törədilən cinayətlərə görə cavabdehlik daşıyır.
