Azərbaycanda məhkəmə hakimiyyətinin özünü “JEK”dən də aşağı səviyyəyə endirməsi on illər öncə çıxarılan qərarların icrasına sözügedən kontorun qadağa qoymasında tam çılpaqlığı ilə üzə çıxır. Xətai Məhkəməsinin 26.05.2009 tarixli 2 (011)-451/09 saylı qətnaməsi ilə 1-ci dərəcəli Qarabağ qazisinə sahibkarlıq məqsədilə verilən Bəhruz Nuriyev -10 ünvanındakı qeyri-yaşayış otaqlarının açarlarının tələbkara verilməsindən əsas borclu ƏMDK (hazırda İqtisadiyyat Nazirliyi yanında Əmlak Məsələləri Dövlət Xidməti (ƏMDX) ona görə imtina edib ki, “JEK” icazə vermir!
Konstitusiyaya hörmətsizliyi göz önünə gətirin ƏMDK-nın sədr müavini Rafiq Cəlilov (hazırda Ana Qanuna hörmətsizliyini Cəlilabad RİH başçısı kimi sürdürür) 17.03.2011 tarixli məktubla bildirib ki, Nizami MKTB məhkəmənin onun üzərinə qoyduğu öhdəliyi icra edəndən sonra, Komitə tələbkar qazi ilə icarə müqaviləsinin bağlanması məsələsinə baxa bilər. Fikir verin, məcburi icra edilməsi Konstitusiyanın 129-cu maddəsi ilə doğrulanan məhkəmə qərarının icrasına (2 il keçəndən sonra) “baxıla bilərliyi” balanssaxlayıcı “JEK”-in razılığından asılı imiş! Təbii ki, Nizami RİH başçısı, hazırda Dövlət Statistika Komitəsinin sədri Tahir Budaqov MKTB sədri olan bacanağı, hazırda 1 saylı ərazi nümayəndəliyinin başçısı Həsən Sadıxova icranı “dolandırmağı, fırlatmağı” tapşırıb(Tapşırığın hansı oliqarxın sifarişi olmasını hüquq mühafizə orqanları yaxşı bilir və səslərini çıxara bilmirlər). Borclular ƏMDK (yanındakı Daşınmaz Əmlakın Dövlət Reyestri Xidməti vasitəsilə) və Nizami RİH (MKTB) məhkəmə qərarını icra etmək yerinə, bir-birinə sorğu (? -M.B.) ilə B.Nuriyev -10-dakı otaqların həmin ünvandakı “Kapitalbank”ın Nizami filialının mülkiyyətində olması “səbəbindən” icranın mümkün olmadığına Ədliyyə Nazirliyinin Xətai və Nizami icra şöbələrini də, Xətai Məhkəməsinin hakimi Habil Məmmədovu da müəyyən haqq qarşılığında inandıra biliblər. Təsəvvür edin, hakim dövlətin adından çıxarılan məhkəmə qərarının icrasını mümkün saymayıb ki, “Kapitalbank”ın mülkiyyətidir. Məhkəmə qərarının icrasına mane olduqlarına görə məhkəməyə verilən borcluların sırasına “Kapitalbank”ın Nizami filialının da əlavə edilməsi filial müdiri İ.N. Allahverdiyevi 14.03.2011 tarixli 297 saylı məktubla 25 saylı DSK-nın yerləşdiyi ofisin filialın balansına heç bir aidiyyatının yoxluğunu bildirməyə vadar edib. Lakin Bakı Apellyasiya Məhkəməsi (sədrlik edən Tofiq Səmədov) fakt qarşısında növbəti cinayətkar saxtalığa əl atıb, həmin ofisin Rafiq Cəlilovun sədrin adından imzaladığı, “JEK” müdiri Həsən Sadıxovun imzası ilə təsdiq etdiyi (?) saxta şəhadətnaməyə əsasən Hüseynov Aydın Bəxtiyar oğlunun (yəqin indi başqasının adına sənədləşdirilib ) mülkiyyətində olması əsası ilə icranın mümkün olmadığını qət edib. Konstitusiyanın 129-cu maddəsini bir qırağa qoyaq, MƏHKƏMƏ HAKİMİYYƏTİNİN FAKTLAR VƏ SÜBUTLARLA QƏRAR ÇIXARMASINA BAXIN: birinci instansiya icranı mümkün saymayıb ki, “Kapitalbank”ın mülkiyyətidir, yuxarı instansiya isə mümkün saymayıb ki, AYDIN HÜSEYNOVUN mülkiyyətidir! Ali Məhkəmə (sədrlik edən Qəhrəman Allahverdiyev) də özbaşınalığa öz töhfəsini verib : OFİS HƏM BANKIN, HƏM DƏ AYDIN HÜSEYNOVUN MÜLKİYYƏTİDİR! BİRCƏ MƏHKƏMƏ QƏRARI İLƏ OFİSƏ HÜQUQU OLAN QARABAĞ QAZİSİNİN İCARƏSİNƏ BELƏ VERİLƏ BİLMƏZ! Hətta tələbkar qazinin “icranın Bəhruz Nuriyev -10-dakı otaqlara yönəldilməsi və icraya mane olan borclular ƏMDK, Nizami RİH, Kapitalbank”ın Nizami filialı, Ədliyyə Nazirliyinin Xətai və Nizami icra şöbələrinin məsuliyyətinin müəyyən edilməsi üçün xüsusi qərardadla prokurora xəbər verilməsi” tələbi Xətai Məhkəməsinin (hakim İlqar Əliyev) 21.06.2011 tarixli 2 (011)-855/11 saylı qətnaməsi ilə qismən təmin olunaraq, prokurora xəbər verilməsi hissəsində təmin olunmaması barədə qətnaməsi və onun əsasında verilən 22.07.2011 tarixli icra vərəqəsini 3 il borclular tələbkardan gizlədib!(?) MÜTƏŞƏKKİL MƏHKƏMƏ, İCRA, ƏDLİYYƏ CİNAYƏTKARLIĞI GÖZ ÖNÜNDƏ OLSA DA, artıq 11 ildir Baş prokuror və yanındakı Korrupsiyaya Qarşı Mübarizə Baş İdarəsinin nəinki cinayət işi başlamaq, icranı təmin etmək gücü də yoxdur. Görünür, əmlakı ələ keçirən oliqarx məmur elə “yekəlikdədir” ki, nə Baş prokurorun, nə də daxili işlər nazirinin gücü çatır. Ali rəhbərliyi isə şikayətlərdən bilgiləndirmək Prezident köməkçisi, dövlət nəzarəti şöbəsinin müdiri Kərəm Həsənova sərf etmir. Yəqin Avropa Məhkəməsi bilgiləndirməli olacaq.
“Kapitalbank”ın Qarabağ qazisinin mülkiyyət, istehlakçı, məhkəmə təminatı hüququna qadağa qoyması bununla bitmir. 6 ildir qazinin Prezident təqaüdünü bloklayıb, 6 aydan sonra rüsum qarşılığında açan banka qarşı iddianı Nizami Məhkəməsinin hakimi Fikrət Mirzəyev necə itiribsə, hələ də nə Ombudsman, nə Məhkəmə Hüquq Şurası tapa bilir. 9 ay qabaq qaldırılan iddia ərizəsini gənc hakim Ülkər Yusifova təqdim etmədiyi qərardadla geri qaytarıb ki, bankın Nizami filialı Nizami rayonundakı Bəhruz Nuriyev -10 ünvanında yerləşmir.
Bakı Apellyasiya Məhkəməsi bu qərardadı 06.08.2021 tarixli qərardadla ləğv edib, Nizami Məhkəməsinə qaytarsa da, iş yenidən qərardadı ləğv edilən Ülkər Yusifovaya verilib və o da 6-cı aydır işə baxmaqdan imtina edir. İddiaya Beynəlxalq Bankın da MPM-in tələbinə uyğun olaraq əlavə edilməsinə də baxmayan Nizami Məhkəməsinin banklar qarşısında öhdəlik götürməsi bəlli olur. Halbuki, əksinə olmalıdır. Banklar süni, yekəxana üstünlüklərindən yararlanıb, faiz tutulması nəzərdə tutulmayan vəsaitlərdən haqq tutmaqda davam edirlər. Özü də müştərini aldatmaqla. Beynəlxalq Bankın Nizami filialında hesab açdıranda Qarabağ qazisindən toplam 20 manat haqq tutulub ki, hesaba yerli və xarici valyuta ilə pul daxil olanda faiz tutulmayacaq. Bəs niyə tutulur? Niyə banklar məhkəmə təminatı hüququna da kobud qadağa qoyublar? Suallar çox, cavab verən yox. Nə vaxtadək?
Məğrur BƏDƏLSOY
P.S. 13 ildir 2 məhkəmə qərarı ilə Qarabağ qazisinə verilən otaqların məmurlar tərəfindən işğalı sürür. Şuşanın azadlığının 28 il yarım çəkdiyini nəzərə alsaq, yəqin ki, 15 il yarımdan sonra işğala son qoyulacaq...
