Əhalini su ilə təchiz etməli olan dövlət qurumunun adı dəyişib, indi “Azərsu” yox, “Dövlət Su Ehtiyatları Agentliyi” olsa da, xidmət və keyfiyyət əvvəlki kimi bərbaddır. Əvvəlki yay fəsillərində olduğu kimi, əhalinin suya daha çox tələbatı olan isti günlərdə Bakı və şəhərətrafı qəsəbələrdə yaşayan insanlar yenə də günlərdir ki, susuzluqdan əziyyət çəkir.

Bizimyol.info xəbər verir ki, paytaxtın Yasamal, Nəsimi, Səbail, Nərimanov, Binəqədi rayonlarında, Abşeron yarımadasında, Xırdalan şəhərində yaşayan insanlar nə içməyə, nə də təmizliyə su tapır. Bu isə yüzminlərlə insanın çarəsiz duruma düşməsi deməkdir.

Vətəndaşlar sosial şəbəkələrdə bununla bağlı narazılıqlarını ifadə edirlər. Müvafiq dövlət strukturlarına yüzmilyonlarla vəsaitlərin ayrılmasına baxmayaraq, 2025-ci ildə Azərbaycan vətəndaşının su ilə sınağa çəkilməsi məmur səriştəsizliyi və korrupsiyanın nəticəsi kimi qiymətləndirilir.

İri Şəhərlərin Birləşmiş Su Təchizatı Xidmətindən verilən açıqlamada bildirilib ki, Oğuz-Qəbələ-Bakı su kəmərində baş vermiş qəza səbəbindən iyunun 16-dan 20-dək Bakıda və Abşeron yarımadasında əhaliyə suyun verilməsində problem yaranacaq.

Oğuz-Qəbələ-Bakı su kəməri 2010-cu ildə istismara verilib. Bu layihə Azərbaycana 1 milyard dollara başa gəlib. Kəmər istismara veriləndə bəyan edilmişdi ki, paytaxt Bakının əhalisi daimi su ilə təchiz olunacaq. Lakin proseslər göstərdi ki, kəmərin istismara verilməsindən 15 il keçəndən sonra da Bakının bir çox ərazilərində daimi su yoxdur. İnsanlar sudan gündə bir neçə saat istifadə edə bilir.

İqtisadçı ekspertlər hesab edir ki, indiki vəziyyətdə su təminatına qalsa, belə, Ceyranbatan, Kür və başqa mənbələr hesabına Bakını su ilə təmin etmək mümkün idi. Yəni Oğuz-Qəbələ-Bakı su kəmərinə 1 milyard dollar xərc çəkməyə ehtiyac yox idi.

Ötən ilin avqustunda da Oğuz-Qəbələ-Bakı su kəmərində qəza baş verdiyi iddia edilərək, paytaxt sakinləri günlərlə susuz qalmışdı. Əhalini su ilə təchiz etməli dövlət strukturu isə özünü vətəndaşlar qarşısında hesabat verməyə borclu hesab etmədiyindən yüzminlərlə vətəndaşın narazılığı qulaqardına vurulmuşdu. Beləcə, məmur özbaşınalığı nəticəsində Azərbaycan vətəndaşları hər yayı eyni problemləri yaşaya-yaşaya yola verirlər.