Kənd Təsərrüfatı Nazirliyinin kadr siyasətindəki boşluqlara hələ sabiq nazirlərin rəhbərliyi dövründən yol verilməyə başlayıb və təəssüf ki, həmin boşluqlar indi – hazırki nazir İnam Kərimovun vaxtında da ətalət qüvvəsi ilə qalmaqda, aradan qaldırılmaq əvəzinə, əksinə, daha da dərinləşməkdə davam edir. Bu mövzuda indiyədək kütləvi informasiya vasitələrində, eləcə də bizim saytımızda xeyli tənqidi məqalələr dərc olunub. Həmin müstəvidə rast gəldiyimiz neqativ halları KTN rəhbərliyinin və digər aidiyyati qurumların, o cümlədən, hüquq-mühafizə və cinayət təqibi orqanlarının vəzifəli şəxslərin diqqətinə çatdırmaq və onlardan cavab almaq məqsədilə bulunduğumuz, əksəriyyəti uğursuz alınan cəhdlərimiz barədə xatırlatma verməkdən əvvəl bu günlərdə redaksiyamıza daxil olmuş bir ilginc məlumatı oxucularımızla paylaşmaq istərdik.
Neftçala rayon Baytarlıq İdarəsinin 14 nəfər əməkdaşının redaksiyamıza etdiyi müraciətlərində İdarənin aparıcı baytar həkimi Tahirov Qəhrəman Baloğlan oğlundan şikayətlənir, onun tutduğu vəzifəyə layiq olmadığını, korrupsiya hüquqpozmalarına yol verdiyini qeyd edir, ən azı işdən kənarlaşdırılmasına kifayət qədər əsaslar olduğu halda kimlərinsə tərəfindən himayə edildiyindən narahatçılığını ifadə edirlər.
Redaksiyaya daxil olan şikayət ərizəsində imzası olanlardan birinə, Abdullayev Rəfael Əbülfəz oğluna zəng edib yazdıqlarının nə dərəcədə həqiqət olduğunu öyrənmək istədik.
Abdullayevin verdiyi məlumatda Tahirov nənki işlədiyi kollektivdə, hətta öz ailə üzvləri, qohum-əqrəbası arasında da mənfi xarakterizə olunan, neqativ adam kimi təqdim olunur. Müraciət müəllifi ilk növbədə bildirir ki, Tahirov saxtakardır: “Qəhrəman Tahirovun diplomlarının tarixlərinə baxsaq görərik ki, o, Leninqradda institutda (indiki Sankt-Peterburq Baytarlıq Akademiyası) ali təhsil alan zaman həm də Şamaxı Kənd Təsərrüfatı Texnikumunda əyani təhsil alırmış. Guya eyni ildə (1991) bitirdiyi hər iki təhsil müəssisələri arasında olan məsafə, mövcud olan qanunvericilik, bir də sağlam düşüncə bunun mümkünsüz olduğuna işarə edir ki, bu da öz növbəsində Leninqrad Baytarlıq İnstitutuna məxsus ali təhsil haqqında diplomun saxtalığını sübut edir. O, ilk dəfə Neftçala rayon Surra kənd baytarlıq məntəqəsində işə qəbul olunan zaman ali təhsilini təsdiqləyən sənədi deyil, orta ixtisas təhsili diplomunu təqdim edib. Leninqrad institutundan verildiyini dediyi diplomda xeyli hərf səhvləri var. Həmin institutdan legitim diplom almış Əlniyaz doktorun diplomuna baxıb, onun əsasında rərəmləri dəyişdirməklə özü üçün də saxta diplom tərtib edib. Məntəqədə işləyən vaxt iş yoldaşları ondan prokurorluğa şikayət ediblər. Nə yollasa məsuliyyətdən qurtara bilib. Sonra rayon Baytarlıq İdarəsinə aparıcı baytar həkim vəzifəsinə gətirilib”.
Müraciət müəlliflərinin redaksiyamıza göndərdiyi mataeriallardan görünür ki, Q.Tahirov idarədə bir sıra işçiləri əsassız şəkildə təhqir etdiyinə, səlahiyyətlərindən sui-istifadə etdiyinə, əmək funksiyasını keyfiyyətsiz yerinə yetirdiyinə, əmək qanunvericiliyi və əmək müqaviləsi ilə müəyyən edilmiş vəzifələrini lazımi qaydada icra etmədiyinə, müəssisədaxili intizam qaydalarını pozduğuna görə barəsində rayon baytarlıq idarəsinin 14 nəfərdən ibarət bir qrup işçisi tərəfindən 2020- ci ilin avqust ayında kollektiv şikayət ərizəsi yazılaraq KTN yanında Aqrar Xidmətlər Agentliyinə göndərilib. Bundan 5 ay sonra Agentliyin Nəzarət və Qiymətləndirmə şöbəsindən rayona təftişçilər göndərilir. Vəziyyətlə yerində tanışlıqdan sonra Nəzarət Şöbəsi müdirinin 21.01.2021-ci il tarixli məruzəsi əsasında Agentliyin 04.02.2021-ci il tarixli, 67 saylı əmri ilə Q.Tahirovun barəsində “əmək funksiyası və vəzifə borcunu yerinə yetirmədiyinə, müəssisədaxili intizam qaydalarını pozduğuna görə” müvafiq tədbir görülməsi Agentliyin Hüquq, kadr və kargüzarlığın təşkili şöbəsinə və Neftçala Rayon Baytarlıq İdarəsinin səlahiyyətlərinə buraxılır. Nə qədər qəribə görünsə də, “müvafiq tədbir” o olur ki, heç bir tədbir görülmür, şikayətçilərin əli boşda qalır. Müəllifin sözlərinə görə, Hüquq Şöbəsində qəbulunda olduqları Elşad müəllim Sankt-Peterburq Baytarlkıq Akademiyasına Tahirovun həmin ali təhsil müəssisəsinin məzunu olub-olmadığını öyrənmək məqsədilə sorğu göndərəcəyini vəd etsə də, hələ də o məsələdən xəbər-ətər yoxdur.
Halbuki, Qəhrəmanın vəzifədən kənarlaşdırılacağına şübhə etməyən şikayətçilər insafla Elşad müəllimdən xahiş edibmişlər ki, Qəhrəmanı öz ərizəsi ilə könüllü işdən çıxmağa razı salsınlar, əks təqdirdə heç yerdə işə götürməzlər.
R.Abdullayev daha sonra Q.Tahirovun korruptiv əməllərindən söz açır: “Vaxtilə bu adam qardaşı ilə birlikdə çobanlıq edib. Sonra o, pul verərək orta ixtisas baytarlıq, qardaşı isə zootexnik diplomu alıb. İdarəniun sabiq rəisinə 3000 manat rüşvət verib işə düzəldiyini hər kəsə deyirdi. Kollektiv ondan şikayət edəndən sonra da işdən çıxarılmamasının səbəbini yenə də komissiyaya guya 5000 manat rüşvət verməsi ilə izah edib, onu xərcə saldıqlarına görə bəzi baytarlıq aptekləri işlədən şəxslərlə dalaşıb da. Mənimlə də mübahisəsi olub. Hətta bir dəfə şiferi başıma vurmağa cəhd edib. Çünki mən onun təklif etdiyi korruptiv planlara getmirdim. Özünə əlavə süni mayalanma texniki ştatı götürərək, təbii üsulla doğulmuş bala heyvanları guya süni mayalanma yolu ilə cins heyvanların dölü olaraq doğulmuş kimi göstərir, bu işi stimullaşdırmaq üçün dövlətin hər balaya görə verdiyi 100 manat subsidiyanı mənimsəyib ortaqları ilə pay-püşk edirdi. Hətta özünün yerli cinsdən törəyən 6 aylıq danasını guya xarici cinsin dölü olan 2 aylıq bala dana kimi göstərib ona da pul almışdır. Onun kütləvi şəkildə, bəzən 70 heyvan üçün birdən tərtib etdiyi belə qanunsuz aktlara qol qoymadığıma, rast gəldiyim bu cür faktları ifşa etdiyimə, etirazımı rayon Dövlət Aqrar İnkişaf Mərkəzinə bildirdiyimə görə mənimlə düz gəlmirdi. Çifayda, barəsində heç bir tədbir görülmür, ondan heç bir məsuliyyət sorulmur. Tahirov baytarlıq sahə həkimlərinə, məntəqə müdirləriunə “tas” qoyur, ona vaxtaşırı hesabat kimi təqdim etdikləri “ambulator jurnalı”nın arasına pul qoymağı onlardan tələb edir. “Tahirov Məşğulluq Mərkəzinin xətti ilə DOST Xidmətindən Baytarlıq İdarəsinə göndərilmiş ictimai işçilər arasına öz oğlunun da adını yazdırmışdır, — deyir Abdullayev — oğlu işə çıxmadığına, havayı maaş aldığına görə mənə deyir ki, onunla işin olmasın”.
Müraciət müəllifi həmçinin Q.Abdullayevin əxladının da kamil olmadığını bildirir: “İşdə kompütürin arxasında oturub iyrənc, ikrah hissi doğuran videolara baxır, digər işçilərə də göstərib şit zarafatlar edir. Başqasının arvadını yoldan çıxardığına görə öyünür. Bir sözlə, heç kimin ona gücü çatmır. İşi dara düşən kimi etnik azlığın nümayəndəsi – talış olduğunu qabardır. Halbuki, heç kəs onu etnik mənsubiyyətinə görə təqib etmir”.
İndi isə məqalənin əvvəlində oxuculara vəd etdiyimiz məsələyə qayıdaq. Dəfələrlə Kənd Təsərrüaftı Nazirliyinin aparatında və Nazirliyin yerlərdəki struktur vahidlərində baş alıb gedən korrupsiya halları barədə redaksiyamıza daxil olan məlumatlar əsasında hazırladığımız sorğuları cənab nazirin özünə və digər vəzifəli şəxslərə göndərsək də, toxunduğumuz məsələlərə onların münasibətlərini ifadə edəcək cavablar almamışıq. Onu da qeyd edək ki, bu istiqamətdə cəhdlərimizin uğurlu alınmamasında KTN-də özümüzə “bir köynək yaxın” hesab etdiyimiz Anar müəllimin Nazirliyin mətbuatla əlaqələrinə cavabdehlik vəzifəsini həvalə etdiyi Vüqar bəyin səriştəsizliyi (yumşaq ifadədir – red.) az rol oynamayıb. Belə ki, özünü bizim silsilə yazılardan xəbəri yoxmuş kimi göstərən Vüqar bəyə bütün məqalələrimizin keçid linklərini yolladıq. Həmçinin işgüzar yazışmalarımızı xatırlatdıq ki, bəs hər dəfə məqalə dərc olunmazdan əvvəl daxil olan faktları müşayiətedici məktubla cənab nazirə ünvanlamışıq. Vüqar bəy isə cavabında nə desə yaxşıdır?: “Niyə məktublarınızı mənə deyil, nazirə göndərmisiniz?”
Qəribədir, deyilmi? Bəllidir ki, dövlət orqanlarında, hökumət strukturlarında ictimaiyyətlə, KİV-lə əlaqələrə məsul edilmiş şəxs jurnalistlərin onun təmsil etdikləri qurumdan səhih və operativ informasiya almalarını asanlaşdırmaq üçün seçilir. Və həmin şəxsin özünün də jurnalist olması, həmkarları üçün əlçatan olması arzuolunandır. Daha ona da ənənəvi poçtla məktub yazıb bir ay gedib-qayıtmasını gözləyəcəyiksə, oxucularımnızı necə çevik informasiya ilə təmin edə bilərik? Mətbuat katibi vəzifəsinin maaşını necə halal hesab edib “həzm-rabedən” keçirə bilirsən axı?
Əslində isə məsələ başqa cürdür: Nazirliyə (nazirə) ünvanlanan ərizə və şikayətlər bir qayda olaraq nazirliyin ümumi şöbəsinə yox, Daxili Nəzarət və Audit şöbəsinə daxil olur. Müraciətlər xarakterinə görə bölünür, şikayət xarakterlilər kargüzarlıq qaydalarına zidd olaraq nazirin diqqətindən yayındırılır, “aidiyyəti üzrə” nazir və müavinlərinə yox, Daxili nəzarət və Audit Şöbəsinin müdiri Fuad Mayılova ötürülür.
Sonra da Fuad Mayılov barəsində şikayət edilən və onun yaxınları olmayan idarə rəislərini yanlarına çağırtdırıb “məhşər ayağına” çəkirlər. Bu dəst-xətt heç də özündə şikayətin predmeti olan problemin həllini nəzərdə tutmur, əsla. İdarə rəisləri gəlib həmin şəxslərə “imtahan” verib “qıl körpüsündən” keçəndən sonra qayıdıb düşürlər şikayətçilərin üstünə, onlara təzyiq göstərirlər. Bu yolla potensial şikayətçilərə — məsələn, KTN-nin sütruktur vahidlərində çalışan, hüquqpozmalara məruz qalan sıravi işçilərinə, dövlətin onlara ayırdığı subsidiyaları mənimsənilmiş fermerlərə təlqin olunur ki, şikayət etmək mənasızdır, “dünya elə belə gəlib, belə gedəcək, kənd təsərrüfatında kiçik həşərat yalnız böyük həşəratdan qorxur, Allahdan, qanundan qorxan yoxdur”.
Yaşayarıq, görərik.
Deryaz.az
