Prezident Administrasiyasının keçmiş rəhbəri Ramiz Mehdiyevin həbsi, ev dustağı edilməsi haqda özəl xəbərlərin, açıqlama, müsahibə və müzakirələrin tüğyan etdiyi son on günlüklərdə xalqın, dövlətin bu gününü, gələcəyini deyil, yalnız öz şəxsi karyera, vəzifə və var-dövlətlərini düşünən fürsətçil şəxslər də sanki ova çıxıblar. Kimin kimdən xoşu gəlmirsə, ona “mehdiyevçi” damğası vurur, onun barəsində müxtəlif yalan-doğru faktlar üzə çıxarır və s. Siyasi meydan da belədir; bəziləri konkret olaraq AXCP və Müsavatın ləğvini tələb edir, digərləri ümumiyyətlə, Azərbaycanda müxalifətə ehtiyac olmadığını və müxalif hesab olunan siyasi partiyaların qadağan olunması təşəbbüsü ilə çıxış edir...
Mövzu ilə bağlı Azərbaycan Milli İstiqlal Partiyasının fəxri lideri Etibar Məmmədov Moderator.az-a verdiyi açıqlamada Azərbaycanda müxalifətin tamamilə ləğv edilməsinin doğru olmadığını vurğulayıb. Onun sözlərinə görə, açıq müxalifətin fəaliyyəti çətinləşdirildikdə, müxalifət daha çox gizli formada fəaliyyət göstərir, bu isə hakimiyyət üçün daha təhlükəlidir:
"Hər hansı bir ölkədə açıq müxalifət olmayanda həmişə gizli müxalifət meydana çıxır. Və əslində siyasi partiyaları ləğv eləmək də çətin bir iş deyil. İstəsələr, qanun qəbul edib partiyaların hamısını qadağan edə bilərlər. Keçmiş Sovet İttifaqındakı kimi bir partiya olar və bu qaydanı da ayrıca bir 6-cı maddə kimi Konstitusiyaya əlavə edərlər. Ancaq bu o demək deyil ki, belə halda ölkədə müxalifət olmayacaq. Sadəcə olaraq, müxalifət açıq şəkildə yox, gizli formada hakimiyyətin öz daxilində yaranıb mövcudluğunu davam etdirəcək. Bu isə açıq müxalifətdən daha çox təhlükəlidir. Odur ki, müxalifətin ümumiyyətlə ləğv edilməsi haqda fikirlər irəli sürənlər siyasi baxımdan uzaqgörən deyillər.”
Siyasətçi onu xüsusi olaraq nəzərə çatdırıb ki, partiyaları ləğv etmək, onları maliyyə cəhətdən çökdürmək və onun rəhbərləri və sıravi üzvlərini inzibati cəhətdən təqib etmək - məhz Prezident Administrasiyasının keçmiş rəhbəri Ramiz Mehdiyevin yolu olub.
“O, 30 ildən çox bu yolu seçdi və nəticəsi də göz qabağındadır. Özünün yaratdığı o siyasi repressiya sisteminin özü də qurbanı oldu... Və partiyaların ləğvi təklifi ilə çıxış edənlər də elə düşünməsinlər ki, başqalarını qadağan etməklə özləri salamat qala bilərlər, əslində, özləri də istənilən mərhələdə həmin repressiya sisteminin qurbanı ola bilərlər”, -deyə Etibar Məmmədov bildirib.
AMİP-in fəxri lideri hansısa konkret hansısa partiyanın ləğv edilməsi təşəbbüsünə də münasibət bildirib.
“İstənilən partiyanın inzibati qaydada ləğv olunması o qədər xoşagələn və qanuni yol deyil. Əgər hakimiyyət olaraq özünə rəqib hesab etdiyin bir qurumu, partiyanı sıradan çıxarmaq istəyirsənsə, onunla yaxşı işləməlisən. Partiya nədir? Müəyyən fikir, ideya tərəfdarlarının bir yerə toplanması... Və qarşı tərəfi sadəcə bir qərarla ləğv etmək üsulu qanuni də deyil, mənəvi cəhətdən də doğru deyil. Qarşı tərəfi zəiflətmək istəyirsənsə, sənin fəaliyyətin, təbliğatın o qədər güclü olmalıdır ki, ona inananlar ona yox, gəlib sənə inansınlar və sənin tərəfinə keçsinlər. Və hansısa partiyanın ləğvini təklif edənlərin özünün də qoltuqlarındakı bir qovludan və yaxın qohum-əqrəbadan başqa ətraflarında heç kəs yoxdur. Bir sözlə, indiki zəmanədə partiya ləğv etmək, partiya qadağan etmək düzgün yol deyil”, -deyə siyasətçi vurğulayıb.
