Rabitə və Yüksək Texnologiyalar Nazirliyinin (RYTN) “Aztelekom” İstehsalat Birliyinin həbsdə olan sabiq sədri Məhəmməd Əsgər oğlu Məmmədov qulluq səlahiyyətlərindən qulluq mənafeyinə qəsdən zidd olaraq istifadə etməklə 29.700.000 manat vəsaitin mənimsənilməsində iştirak edib.
Trend-in məlumatına görə, bu barədə Baş Prokuror yanında Korrupsiyaya qarşı Mübarizə Baş İdarəsində RYTN-in sabiq yüksək rütbəli məmurları ilə bağlı aparılmış cinayət işinin materiallarında qeyd olunur. İstintaq zamanı əldə olunmuş sənədlərlə mənimsəmə faktları üzə çıxıb.
Müəyyən edilib ki, M.Məmmədov 2004-ci ildən Rabitə və Yüksək Texnologiyalar Nazirliyinin tabeliyində olan "Aztelekom" MMC-nin baş direktoru vəzifəsində işləyərkən öz qulluq səlahiyyətlərindən qulluq mənafeyinə qəsdən zidd olaraq istifadə edib. O, nazirliyin aparat rəhbəri Zeynalov Vidadi Zeynal oğlunun qarşısında nüfüz qazanmaq, özünü işgüzar, tapşırıqları vaxtında yerinə yetirən işçi kimi göstərmək, eləcə də ayrılacaq pul vəsaitinin müəyyən hissəsini mənimsəyərək talama məqsədilə sonuncu ilə, həmçinin Cəmiyyətin baş mühasibi Oktay Rüstəmov və qeyriləri ilə qabaqcadan əlbir olub cinayət əlaqəsinə girib. Nazirliyin xətti ilə “Aztelekom” MMC-nin tabeçiliyində olan Telekommunikasiya Qovşaqlarında görülmüş təmir-tikinti işlərinin həcmi, istifadə olunan mal-materialların və xidmətlərin qiymətləri şişirdilib və özəl qurumlar tərəfindən saxta sənədlər əsasında rəsmiləşdirilməsi təmin edilib.
Yerinə yetirilmiş işlərin dəyəri kimi 1 yanvar 2009-cu il tarixdən 2015-ci ilin oktyabr ayınadək qovşaqlardan köçürülmüş 128.944.700 manat pul vəsaitini müvafiq müəssisələrin ayrı-ayrı banklardakı hesablaşma hesabına köçürülməsi və sonradan nağdılaşdırılmasına nail olunub. Həmin vəsaitdən 2009-2012-ci ildə, yəni 48 (qırx səkkiz) ay ərzində hər aya 500.000 manat olmaqla 24.000.000 manat, 2013-cü ilin yanvar-mart ayları ərzində, yəni 3 (üç) ayda hər ay üçün 500.000 manat olmaqla 1.500.000 manat, 2014-cü il üzrə hər ay üçün 200.000 manat olmaqla 2.400.000 manat və 2015-ci ilin 9 (doqquz) ayı ərzində hər ay üçün 200.000 manat olmaqla 1.800.000 manat məbləğində, ümumilikdə 29.700.000 manat vəsaiti V.Zeynalova verib. Göstərilən müddət ərzində hər ay üçün 50.000 manat olmaqla külli miqdar təşkil edən ümumilikdə 3.807.000 (üç miliyon səkkiz yüz yeddi min) manat pulu özünə götürüb şəxsi ehtiyaclarına sərf etməklə mənimsəyərək talayıb və həmin hərəkətləri ilə dövlətin qanunla qorunan mənafelərinə ağır nəticələrə səbəb olan zərər vurub.
2015-ci il noyabrın 16-da M.Məmmədov Cinayət Məcvəlləsinin 179.3.2 və 308.2-ci maddələri ilə təqsirləndirilən şəxs qismində cəlb edilib və ona bu maddələrlə ittiham elan olunub. Bakı şəhəri Binəqədi Rayon Məhkəməsinin qərarı ilə onun barəsində 3 ay müddətinə həbs qətimkan tədbiri seçilib. M.Məmmədovun barəsindəki həbs qətimkan tədbirinin müddəti sonradan bir neçə dəfə artırılıb.
2015-ci ilin noyabr ayının 13-də Baş Prokurorluğun Rabitə və Yüksək Texnologiyalar Nazirliyindəki həbslərlə bağlı yaydığı rəsmi məlumata görə, nazirliyin Aparat rəhbəri V.Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib.
Bundan başqa, Baş Prokuror yanında Korrupsiyaya qarşı Mübarizə Baş İdarəsi tərəfindən RYTN sistemində həyata keçirilmiş yoxlamalar nəticəsində “Aztelekom” MMC-nin sabiq baş direktoru M.Məmmədov, "Bakı Telefon Rabitəsi" İstehsalat Birliyinin sabiq rəhbəri B.Hüseynov, "Bakı Telefon Rabitəsi" İstehsalat Birliyinin baş mühasibi A.Mustafayev, “AzİnTelekom” MMC-nin sabiq baş direktoru C.Cəfərov, “Azərpoçt” MMC-nin sabiq baş direktoru Q.Bəybalayev, “Optik Rabitə, Tikinti və Quraşdırma” MMC-nin baş mühasibi S.Hümbətov, həmçinin E.Məmmədov, “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru B.Vəliyev, "Optik Qurğular" İdarəsinin rəisi N.Məmmədov və “Aztelekom” MMC-nin baş mühasibi O.Rüstəmov da saxlanılıblar. Məhkəmə onlar barəsində həbs qətimkan tədbirinin seçilməsi barədə qərar verib.
RYTN-in mənimsəmədə və vəzifə səlahiyyətlərindən sui-istifadə etməkdə təqsirləndirilən 11 keçmiş əməkdaşı ümumilikdə 40 milyon manat pulu mənimsəməkdə ittiham olunurlar. İittiham aktına əsasən, A.Mustafayev 567 min, E.Məmmədov 7 milyon 700 min, O.Rüstəmov 250 min, S.Hümbətov 600 min, Q.Bəybalayev 2 milyon, C.Cəfərov 1,5 milyon, B.Vəliyev 204 min, V.Zeynalov 8 milyon, B.Hüseynov 10 milyon və N.Məmmədov isə 4 milyon manat mənimsəməkdə təqsirli bilinirlər.
V.Zeynalov, B.Hüseynov, A.Mustafayev, E.Məmmədov, M.Məmmədov, O.Rüstəmov, N.Məmmədov, S.Hümbətov, Q.Bəybalayev Cinayət Məcəlləsinin 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 29, 179.3.1-ci (mənimsəmə və ya israf etməyə cəhd, mütəşəkkil dəstə tərəfindən törətməyə cəhd), 29, 179.3.2-ci (mənimsəmə və ya israf etməyə cəhd, külli miqdarda törətməyə cəhd), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), C.Cəfərov 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə) və B.Vəliyev isə 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), 213.2.2-ci (vergi ödəməkdən yayınma, külli miqdarda törədildikdə) maddələri ilə ittiham olunurlar.
