“Su həyat mənbəyi olaraq qalır”… Bu ifadə ulu öndər Heydər Əliyevə məxsusdur. Amma ADSEA bu yay dönəmində sözün əsl mənasında bizi həyat mənbəyindən məhrum etdi.
ADSEA, yoxsa ADSEA-nın yarıtmaz işçilərimi deyim bilmirəm. Bircə onu bilirəm ki, iyul ayında suyumuzu kəsdilər və gecələri damcı-damcı su verdilər. Nəhayət bir həftə öncə o da təmiz kəsildi və həyətimdə olan bütün su sistemi və motorlar sıradan çıxdı. Bir neçə gün susuz qaldıqdan sonra məcbur şəkildə suyu maşınla aldım. 8 ton suya 40 manat verdim. Daha sonra santexnik çağırmağa məcbur qaldım, sıradan çıxmış sistemi düzəltdirdim, bu da elektrik və alınan hissələrlə bərabər mənə 250 manata başa gəldi.
ADSEA suyu damcı-damcı verir, bəs dövlət büdcəsini hara xərcləyir? Demək olar, hər fəsil boru dəyişmək dövlətə nə qədər zərər vurur? Əhalinin zərərini hesab edən onsuz da yoxdur, dövlətin büdcəsi "axmasın" barı...
ADSEA-nın əməkdaşları hər ödəniş vaxtı qapıma sel kimi gəlirlər, amma suyu damcı ilə verirlər. Nə işlədirəm ki, nə yazırlar? Su verməyən quruma su pulu vermək... ADSEA mənə 250 AZN borcludur. Vermədiyi suya görə sıradan çıxan su sistemimi düzəltmişəm. Həyətimdə susuzluqdan quruyan təsərrüfatımın xərci ayrıdır. Bu il mənim həyətimdə ağaclarım susuzluqdan məhv oldu. Keçirdiyim əsəbi, stresi, qəzəbi, gərginliyi hesablasam da ödəyə bilməzlər.
O gün kənddə söhbət edərkən eşitdim ki, suyu ADSEA-nın Pirşağı kəndi üzrə əməkdaşları bilərəkdən kəsir. Niyə? Deməli, Pirşağı kəndində imkanlılara məxsus xüsusi bağlar var. Eyni zamanda bir neçə avtoyuma məntəqəsi var ki, buranın əməkdaşları əhalinin suyunu kəsərək bu imkanlı şəxslərin bağların verirlər ki, bu cənablar çimmək üçün hovuzlarını doldursunlar. Eyni zamanda kəsilən sudan müəyyən vəsait müqabilində avtoyuma məntəqələrinə də verilir. Yəni kənd əhalisi susuz qalsa da olar, əsas bu suya baxan işçilərin cibidir. Onlar yaxşı yaşamalıdır, onlar çox qazanmalıdır. Bu, sadəcə kənd əhalisinin iddiasıdır. Yoxlaması isə ADSEA-ya qalıb.
Xatırlayıram ki, əvvəllər "Azərsu"-dan şikayət edirdik. Hətta mətbuat xidməti çıxıb deyəndə ki, “hamıdan sudan istifadə etdiyi üçün təzyiq azdır” hamı bir mənalı yanaşmırdı. "Sistem" dəyişdirildi. Ümid var idi ki, rəhbərliyə gətirilən yeni nümayəndə su sisteminə daha diqqətli olacaqdı, əhalinin narazılığı olmayacaqdı. Vallah heç nə dıyişməyib, əskinə daha betər olub. Ataların bir misalı var: “Betərin betəri var”. Bax indiki durum betərin betəridir…
ADSEA-nın əməkdaşları ara-sıra gəzib, su sayğaclarına müdaxilələrə nəzarət edirlər. Çox maraqlıdır, ADSEA yerli əməkdaşlarının "müdaxilə"lərinə necə nəzarət edir?
Bizimyol.info
