İlk baxışdan partlayışdan sonra qalxan toz-dumana bənzəsə də, bu, zavoddan yayılan tüstünün görüntüləridir... "DİA-AZ" xəbər verir ki, bununla bağlı "Xəzər" telekanalı dünən səs-küylü bir reportajı ilə diqqətə gəldi. Söhbət vətəndaşların narazılığından və Qobudakı Kərpic zavodunun özbaşınalığı nəticəsində ortaya çıxan EKOPROBLEMDƏN gedir...
Məlumatda deyilirdi ki, kadrlar sosial şəbəkələrdə paylaşılıb. Bildirilir ki, Abşeron rayonu ərazisində fəaliyyət göstərən Qobu Kərpic zavodu yenidən zəhərli tullantıları atmosferə buraxır. Buna görə də toz-duman ətrafda tikilən evlərə dolur.
Sakinlər deyirlər ki, dəfələrlə kərpic zavodunun fəaliyyəti zamanı atmosferə tullantıların atılması və qanunsuz qazıntı işlərinin aparılması ilə bağlı şikayətlər edilib. Lakin, hər axşam zavoddan qalxan toz-duman səbəbindən onlar nə evlərindən çıxa nə də qapı-pəncərələrini aça bilirlər.
Məsələ ilə bağlı Dövlət Ekoloji Təhlükəsizlik Xidmətindən “XəzərXəbər”ə bildirilib ki, Abşeron rayonu Qobu qəsəbəsi ərazisində yerləşən kərpic zavodunun fəaliyyəti zamanı ətrafa tüstünün yayılması ilə bağlı daxil olan şikayət əsasında araşdırma və ölçmə işləri aparılacaq, fakt təsdiqini taparsa qanunamüvafiq tədbir görüləcək.
Amma aydın olanı budur ki, ETSN-nin Dövlət Ekoloji Təhlükəsizlik Xidmətinin hansısa tədbir görəcəyinə ümid etmək yersizdir. Bu barədə "DİA-AZ"a danışan sakinlər bildirir ki, ETSN əməkdaşları onların şikayətləri ictimailəşdikcə buraları yada salırlar: "Əslində Qobu Kərpic Zavodu Ekologiya Nazirliyinin elə bil ki, sağmal inəyidir. Hər ay pullarını alıb gedirlər... Vətəndaşı düşünən kimdir ki..."
Xatırladaq ki, sakinlər şikayətlərində və iddialarında kifayət qədər haqlı görünürlər. Məsələn bu ilin aprel ayınd ada anoloji qaydada ETSN-nin müvafiq idarəsi tərəfindən araşdırma aparılmışdı.
Xəbərdə deyilirdi ki, Abşeron rayonu Qobu kəndi ərazisində yerləşən kərpic zavodunun fəaliyyəti zamanı atmosferə tullantıların atılması və qanunsuz qazıntı işlərinin aparılması ilə bağlı daxil olan şikayət 4 saylı Regional Ekologiya və Təbii Sərvətlər İdarəsinin əməkdaşları tərəfindən araşdırılıb. Bunu mətbuata açıqlamasında İdarənin rəisi Asif Məcidov bildirib.
“Dövlət Mineral Xammal Ehtiyatlarından İstifadə Agentliyi ilə birgə aparılan araşdırma və monitorinq zamanı zavoddan atmosfer havasına normadan artıq tullantının atılmadığı, ərazidə hasilat işi aparan zavodun kərpic istehsalı üçün Dağ-mədən Ayırması Aktı ilə yer təkindən istifadə hüququnun və ekoloji normativ sənədlərinin olduğu müəyyən edilib.
Eyni zamanda, sənaye təyinatlı torpaq sahəsində yerləşən zavodun 2005-ci ildən müvafiq sənədlər əsasında fəaliyyət göstərdiyi məlum olub. İcra orqanlarının verdiyi məlumatda isə yaşayış evlərinin zavodun ətrafında sonradan tikildiyi və sanitar mühafizə zolağının tələblərinin gözlənilmədiyi bildirilib”, - İdarə rəisi qeyd edib.
A.Məcidov onu da demişdi ki, 27 avqust 2024-cü ildə sözügedən kərpic zavodunda keçirilən monitorinq və araşdırma zamanı zavodda qaz-toz tutucu qurğunun quraşdırılmadığı müəyyən edilib: “Faktla bağlı müəssisənin icraçı direktoru Məcid Məmmədov barəsində protokol tərtib olunaraq, 2000 manat məbləğində cərimə olunub. Ona qaz-toz tutucu qurğunun quraşdırılması üçün “ekoloji tələb” verilib və qurğunun quraşdırılması təmin edilib”.
Yəni göründüyü kimi Qobu Kərpic Zavodu həqiqətən də ETSN-nin SAĞMAL İNƏYİDİR... Sakinlər şikayət etdikdə isə... yalnız və yalnız dişsiz bir açıqlama ilə yetinirlər ki, guya tədbir görmüş oldular...
Məsələ DİQQƏTİMİZDƏDİR...
