Prezident İlham Əliyevin başlatdığı islahatlar proqramı ilə Azərbaycan keyfiyyətcə yeni mərhələyə qədəm qoyub. Korrupsiyaya və rüşvətə qarşı mübarizə ən üst səviyyədə həyata keçirilir. Adı müxtəlif korrupsiya əməllərində çəkilən bir çox iri ranqlı məmurlar artıq yaxşı halda vəzifədən alınıb, pis halda isə dəmir barmaqlıqlar arasında törətdikləri cinayətlərin hesabını ödəyirlər. İllərlə özünü toxunulmaz sanan, rəhbərlik etdiyi sahənin şəriksiz ağası hesab edənlər artıq PREZİDENTİN DƏMİR YUMRUĞUNU hiss edirlər.
Qeyd etdiyimiz islahatların, korrupsiyaya qarşı mübarizənin təkcə quruda deyil, eləcə də ölkəmizin su sərhədlərində də keçərli olması vacibdir. Bu baxımdan “Xəzər Dəniz Gəmiçiliyi” QSC-də baş verənlər haqqında Rubrika.az saytı media üzərindən araşdırma aparıb. QSC-də baş verən qanunsuz faktlar barəsində əldə etydiyimiz məlumatları incələdikcə belə qənaətə gəlmək olar ki, deyəsən ölkəmizin qanunları Xəzərin qumsal sahillərindən dənizə doğru işləmir. Belə olmasaydı ölkədə belə inqilabi dəyişikliklərin baş verdiyi bir zamanda Azərbaycan bayrağı altında üzən gəmilərdə bütün bunlar baş verməzdi. Əldə etdiyimiz məlumatların ictimailəşdirilməsindən-saytımızda dərc olunmasından əvvəl məsələyə sizin münasibətinizi öyrənməyi məqsədəuyğun hesab etdik. Bu məqsədlə bir çox maraqlı suallara aydınlıq gətirmək üçün müraciətimizi sizin müəssisəyə ünvanladıq. Təəssüf hissi ilə bildiririk ki, müraciətimizdən xeyli vaxt keçməsinə baxmayaraq heç bir cavab ala bilmədik. Tək Mehman adlı şəxsin mətbuat xidməti olduğunu bildirərək suallarımızın cavablandırılacağını bildirmişdir. Lakin heç bir cavab olmadığı üçün suallarımızı sizə ictimai formada ünvanlayırıq.
Məlumatlardan aydın olur ki, Xəzərdə Azərbaycana məxsus gəmilərdə yüklərin daşınması prosesində sənədlər bu gün də saxtalaşdırılır, yükün həcmi bilərəkdən az göstərilir. Bu proses 2020-ci ilin fevral ayına qədər, yəni ölkələrdə karantin qaydaları tətbiq olunandək və neftin qiymətində kəskin ucuzlaşma baş verənədək plan üzrə davam etmişdir.Yəni,2013-cü ildən 2020-ci ilin fevral ayınadək yalnız, iş icraçıları dəyişmişdir. Yüklərin gizlədilməsi,sənədlərin saxtalaşdırılması əməliyyatları olduğu kimi qalmış,hətta bir az çoxalmışdır.Bunu Rauf Vəliyevin fəaliyyəti dövründə yükdaşımalarının həcminin birdən-birə kəskin azalması da təsdiq edir.
Əldə etdiyimiz məlumatlara görə, SOCAR rəhbərliyində təmsil olunan bəzi şəxslərin göstərişi əsasında hazırda da “Azərbaycan Xəzər Dəniz Gəmiçiliyi” QSC-nin balansında olan tankerlərdə Xəzər dənizində yük daşımaları tam şəkildə rəsmiləşdirilmir. Saxta sənədləşmə üzrə tankerlərdən istifadə zamanı gəmilərin icarə haqqı ödənilmir. Belə ki, QSC-nin tankerləri neft daşımaları ilə məşğul olsa da icarə haqqı ödənilməmişdir. Beləliklə də dövlət büdcəsindən milyonlarla manat vəsait yayındırılır.
1. İndiki həssas məqamda dövlətə qarşı belə bir iqtisadi sabotaj-cinayət əməlinə yol verilməsini necə izah edə bilərsiniz?
Əldə etdiyimiz məlumatlara görə, QSC-yə qəbul olunan işçilərin dərəcələr üzrə bölünməsi zamanı kütləvi qanunsuzluqlara yol verilir. Belə ki, iş stajı üzrə artmalı olan dərəcələr əslində rəhbərliyə yaxınlığına görə “verilir”. Əldə etdiyimiz informasiyaya görə, 40 il idarədə külüng çalanlar aşağı dərəcələr üzrə əmək haqqı alsalar da cəmisi bir neçə ildir ki, QSC-də işləyənlər ən yüksək dərəcələrə layiq görülürlər.
2. QSC-də işə qəbul prosesində hansı meyarlar əsas götürülür və necə olur ki, qısa müddət işləyənlər yüksək dərəcələrə layiq görüldüyü halda idarənin veteranları bu dərəcələri ala bilmirlər?
Məlumata görə “Xəzər Dəniz Gəmiçiliyi” QSC-nin balansında olan gəmilər nədənsə ancaq sizin qohumlarınızın və yaxınlarınızın adına rəsmiləşdirilən “Xəzər GEX” MMC-də təmir olunur. Özü də nədənsə bu təmir prosesləri tez-tez baş verir və hər dəfə dövlətə yüklü məbləğdə vəsaitə başa gəlir.
3. Maraqlıdır ki, dövlətin Zığda, Bibiheybətdə gəmi təmiri zavodları olduğu halda nədən böyük məbləğdə “təmir prosesləri” məhz sizin yaxınlarınızın müəssisələrində baş tutur?
İnformasiyala görə, dövlət vəsaitlərinin mənimsənilməsi və talanması təkcə bu yolla baş tutmur. Rəhbərlik etdiyiniz QSC-də baş tutan “tender oyunları” barəsində də əldə etdiyimiz ilginc məlumatlar olub. Maraqlıdır ki, ölkəmizdə azad bazar iqtisadiyyatı, rəqabət mühiti olduğu halda nədənsə “Xəzər Dəniz Gəmiçiliyi” QSC-nin bütün tenderlərini sizin və müavinlərinizin özünün və dolayısıyla yaxınlarınızın adına rəsmiləşdirilən müəssisələri qazanırlar. Bu yolla hər il dövlət büdcəsindən milyonlarla vəsait mənimsənilir.
4. Maraqlıdır ki, necə olur ki, bu ölkədə sizin və müavinlərinizin, eləcə də yaxınlarınızın adına olan müəssisələrdən qeyri gəmiçilikdə heç bir şirkətin fəaliyyəti baş tutmur ? Tender əməliyyatlarına sərf olunan milyonlarla vəsaitin hansı şəffaflıqla xərclənməsinə təminat verə bilərsiniz? Nəhayət həyata keçirilən tenderlər cəmiyyət üçün hansı şəffaflıq və aşkarlıq şəraitində həyata keçirilib?
5. “Xəzər Dəniz Gəmiçiliyi” QSC-nin baş idarəsi ilə yerli şöbələrində fəaliyyət göstərən işçilərin əmək haqqları arasında kəskin fərqin olması hansı qanunlarla tənzimlənir? Necə olur ki, eyni idarənin iki fərqli yerdə işləyən və eyni vəzifəni daşıyan əməkdaşı bir-birindən kəskin fərqlənən əmək haqqları alırlar? Bu hansı əmək müqaviləsi ilə tənzimlənir və bu fərqlər nədən qaynaqlanır? İşçilər arasında belə kəskin fərq qoyulması Konstitusiyanın maddələrinin kobud şəkildə pozulması deyilmi?
6. Əldə etdiyimiz məlumatlarda QSC-nin təchizat məsələlərində müdhiş korrupsiya faktlarının olması göstərilir. Rəhbərlik etdiyiniz müəssisəyə inventarların, eləcə də digər əmlakın alınması zamanı dəhşətli qiymət şişirtmələrinin olduğu və beləliklə milyonlarla vəsaitin silindiyi bildirilir. Adi bir məhsulun dəyərindən 10-20 dəfə yüksək qiymətə rəsmiləşdirildiyi və alqı-satqı prosesinin yenə də sizə və müavinlərinizə yaxın müəssisələr vasitəsilə həyata keçirildiyi aldığımız məlumatlar sırasındadır. Bütün bunların dövlətə neçə milyona başa gəldiyini nəzərə alsaq məsələyə sizin münasibətiniz çox maraqlıdır.
​​​​​​​
​​​​​​​7. Əldə etdiyimiz məlumatlara görə, tabeçiliyinizdə olan “Xəzər Dəniz Gəmiçiliyi” QSC-də böyük vəzifə tutan şəxslər qanunlara məhəl qoymadan açıq şəkildə biznes fəaliyyəti ilə məşğul olurlar. Hətta rəsmi olaraq vergi ödəyiciləridir.
KİV haqqında qanunları əlimizdə əsas tutaraq müraciətimizi bu günlərdə SOCAR-ın Müşahidə Şurasının sədri cənab Mikayıl Cabbarova da ünvanlayaraq onun da bu faktlara münasibətini öyrənmək istəyirik. Hesab edirik ki, cənab M.Cabbarov da yuxarıda sadalanan məsələlərin həllinə biganə qalmayacaq.
Nicat Mahmudov
Rubrika.Az
