“Səhhətimlə əlaqədar olaraq heç yerə getmirəm, gəlmirəm. Televiziyadan zəng edib çəkmək istəyirlər, razılıq vermirəm. Səhhətim o qədər də yaxşı deyil. Heç nəyə həvəsim yoxdur. Sənətim haqda hamının məlumatı var da. Bilirəm ki, məni çox adam sevir. Təvazökarlıqdan uzaq olsa da bunları deməliyəm”
Bunu Moderator.az-a özəl açıqlamasında uzun müddətdir mətbuatdan uzaq düşən əməkdar artist Emma Məlikova deyib. O daha sonra əlavə edib:
“Teatrıma canım qurban. Mən teatrda canımı qoymuşam. İndi necə aktrisa olmuşamsa onu tamaşaçılar deyə bilər. Yaxşı yaxud da pis. Doğma teatrımdan hər zaman məni diqqətdə saxlayırlar. Gəlirlər, gedirlər, axtarırlar. İstər rəhbərlik, istərsə də aktyor-aktrisaların qayğısı Hamısı mənim, mən də hamısının xətrini istəyirəm. Teatrdan özüm çıxdım. İstirahətə ehtiyacım var idi. Daha qocalmışam, işləmək vaxtım çoxdan gedib. Ayaqlarımda da problem var. Yeriyə bilmirəm, gəzə bilmirəm. Teatr üçün burnumun ucu göynəyir. Teatrı həmişə sevmişəm, sevirəm, sevəcəyəm də. Teatr mənim canımdır, ciyərimdir” deyə aktrisa bildirib.
Emma Məlikova deyir ki, sənətdə arzuları həyata keçib.
“Arzuladığım rolların hamısını oynamışam. Elə bir rol olmayıb ki, onu istəyim amma oynamayım. Oynamadığım rol qalmayıb. Kinoya çox az çəkilmişəm, son illərdə rollar oynamışam. Kinoya çağırırdılar getmirdim. Həm səhhətimə görə, həm də vaxtım yox idi. Maddi vəziyyətim də pis deyil. Pensiya alıram, dolanıram. Övladlarım da işləyir. Ən böyük arzum budur ki, balalarım xoşbəxt olsun, ürəyim istəyən insanlar həmişə yaşasınlar. Teatr da yaşasın” deyə aktrisa bildirib.
Emma Məlikova mərhum aktrisamız Nəsibə Zeynalovanı da xatırlayıb:
“Mənim teatra gəlməyim elə onun adı ilə bağlıdır. Hər zaman Nəsibə xanımı izləyirdim, deyirdim ki, aktrisa olacam. Elə oldu ki, Allah qismət etdi onunla eyni teatrda çalışmaq nəsibim oldu. Hamı məni ona oxşadırdı, özü də elə deyirdi ki, sən mənim qızımsan. Nəsibə xanımdan sonra “Hicran” tamaşasında Qızbacı rolunu bir-iki dəfə oynamışam. Əlbəttə ki, onun kimi heç vaxt oynaya bilmərəm. Allah Nəsibə xanıma rəhmət etsin” deyə sənətkar bildirib.
