ƏHALİYƏ XƏBƏRDARLIQ EDİLDİ
Bu il fevralın 15-də redaksiyamıza Masallı rayonunun Banbaşı kəndindən bir neçə orta yaşlı qadın gəlmişdi. Onların şikayəti Köhnə
Alvadı kəndindən bura gəlin gələn 27 yaşlı Məmmədova Ramilə İdris qızından və onun qardaşı molla Ələddindəndir.
Şikayətçilərin dediklərini onların öz dilindən təqdim edirik.
Əliyeva Gülqız Hidayət qızı:
- Banbaşı kəndində yaşayıram. Evdar qadınam, işləmirəm. Məmmədova Ramilə İdris qızı bir neçə il öncə Köhnə Alvadı kəndindən bizim Banbaşı kəndinə gəlin köçüb. 27 yaşı var, 3 uşaq anasıdır, bacısı mənim ilə qonşudur, Anar adlı şəxsin həyat yoldaşıdır. Qardaşı Ələddin də kənddə mollalıq edir.
Ötən ilin əvvəlində o, qonşum olan bacısı Nüşabəni götürüb bizə gəlmişdi. Ramilə mənə dedi ki, bacıma pul lazımdır. Qardaşı İrana gedib-gəldiyi üçün ona pul yığır. Məqsəd də odur ki, bizdə olan rus qızılı İranda bahadır. Onlar da bu qızılları toplayıb İranda baha satacaq, bunlar da qazanacaq, biz də. Məndən də qızıl və yaxud qızıl almaq üçün bir qədər əlavə pul istədi. Mən cavabında bildirdim ki, məndə qızıl yoxdur, amma pul var. Ona həmin gün 2 min manat pul verdim. Sonrakı günlər yenə də bizə gəlib əlavə pullar istədi. Üst-üstə 18000 manat pulumu aldı. Oğlumun biri müəllim işləyir. O biri oğlum da çörək qazanandır. Bütün bu vəsaiti isə oğlumu evləndirmək üçün toplamışdım. Onu da deyim ki, özüm 17 ildir bazarda xırda alveri edirəm. Yoldaşım pensiyaçıdır. Əlimdə olan bütün pulu verdim, indi qalmışam boşda. Oğlanlarımın yaşı 25-i keçib, evlənmək vaxtlarıdır. 80 baş qoyunu da biri 150 manatdan satıb toya hazırlaşırdım. Qoyunların pulunu və evdə qalan olan-olmaz pulu da məndən aldılar.
14 may 2012-ci ildə isə gəlib dedi ki, Gülqız xala, təcili qızıl lazımdır, qardaşım çıxacaq. Mən də gətirib öz oğlumun adına aldığım 34.2 qram qızılı da verdim ona. Mən özüm pensiya kartların qoyub 3 bankdan kredit götürmüşəm. Seyfullayeva Gülnaz Hüseyn qızı: - Banbaşı kəndindənəm, evdar qadınam. Yoldaşım rəhmətə gedib. Ailə başçısı özüməm. Uşaqları özüm saxlayıram. Şikayət eləmədiyimiz yer qalmayıb. Baş prokurorluğa, Daxili İşlər Nazirliyinə getmişik. Məndən 50 min manatlıq rus qızılımı alıb. 9 şahidim var. Mən 9 ildir ki, səyyarı alver edirəm. Özü mənimlə 2 ildir ki, qonşudur. Özünü o qədər mehriban, canayaxın aparmışdı ki, ona hədsiz dərəcədə inanırdım. Mən inanmazdım ki, belə gənc, 3 uşaq anası belə fırıldaqçılıqla məşğul ola. Qapımıza həyat yoldaşı ilə birgə gələrdi. İndi həyat yoldaşı deyir ki, onunla bacarmıram, tutdurun. İndi həyat yoldaşı Rusiyadadır. Deyir ki, mən ona yiyə durmuram, amma Rusiyadan qayıdanda yoldaşı ilə birlikdə olur.
Mən özüm ağır xəstəyəm, güclə danışıram. Ramilənin anası Səbircahan Məmmədova da bu yolun adamı olub. 35-40 yaşlarında Ramilə kimi belə əməllərlə məşğul olub. Qızı da baxıb anasına, olub onun tayı. Səbircahanı o vaxtı belə əməllərinə görə təndirə atırmışlar, ona olmaz təzyiq etmışdilər.
Mən özüm 9 ildir ki, qızıl alveri ilə məşğulam. 1 nəfər məndən narazı qalmayıb. Halal haqqımı yığmışam. Ramilə də gəlib bütün qızıllarımı aldadıb apardı. Guya mənə mənfəət verəcək.
O, qardaşı molla Ələddinlə əlbir olub və bu fırıldaqları törədib.
Abdullayeva Şahnisə Səfər qızı:
- 53 yaşım var. 1-ci qrup əliləm. 6 min manatlıq qızılımı aldı. Dedim ki, birdən anan kimi aldadarsan ha.
Əri Anar dedi ki, ölərəm, o pulu qaytararam.
Sonra öyrəndim ki, Ramilənin molla qardaşı Ələddin Bakıda həmin pula ev alıb. Bu iş 9 aydır gedir. İşə əməlli-başlı baxmırlar. Babək Həsənov adlı biri var idi. Bu işi ədalətlə araşdırmadığı üçün onu işdən çıxartdılar. Qardaş, işə baxmaq istəmirdilər. Biri bir toyuq oğurlayanda, nə böyüklükdə həngamə yaradırlar. 100 min manatlıq pul mənimsənilib. Araşdırmaq istəmirlər. O vaxtı gördülər ki, özümüzü yandırmaq istəyirik, başladılar cinayət işi açmağa. İndi iş Masallı Rayon Polis Şöbəsinin əməkdaşı Nizami Canıyevdədir.
İnanmadıq ki, həmişə əlində Quran olan, kəndin ölülərini yerdən götürən şəxs belə fırıldaqçılıqla məşğul ola.
Digər kənd sakini Ağanisə Adıgözəlov bildirdi ki, bu qadın ondan 14 min manatlıq qızıl alıb. Babayeva Xavər isə həmin qadının ucbatından 6 min manat ziyana düşüb.
Qadınlar bildirdilər ki, aldadılan təkcə onlar deyil. Onlardan əlavə bu Ramilə 20-yə yaxın şəxsdən kiçik məbləğlərdə pul çırpışdırıb.
Daxili işlər Nazirliyində bir neçə şəxsin qəbulunda olandan sonra bu işi araşdırmağa başladılar. Masallı rayon prokuroru Fikrət müəllim deyir ki, mən deməmişdim ki, pullarınızı aparıb verin onlara. İcra başçısının 1-ci müavini isə bizə iztehza edir ki, desəydik, məktəbə bir xalça alın, almazdınız.
Bax, belə. Qalmışıq çabalaya-çabalaya. Bu qədər adamın borcunu necə verəcəyik. Özümü öldürməkdən başqa əlacım yoxdur. Onsuz da şikayətə baxan yoxdur. Yiyəsizlikdir. Neyləmişik? İnsan alveri, ya bəlkə, başqa oğurluqla məşğul olmuşuq? Niyə belə fırıldaqçılar ifşa olunmur, cəzalandırılmır? Niyə polis, prokurorluq belələrini himayə edir?
Redaksiyadan: Biz yazıda adları hallanan şəxslərlə əlaqə yaratmaq istəsək də, onların telefonları cavab vermədi. Amma onları da dinləməyə hazırıq.
Oxuculara isə məlumat üçün bildirək ki, artıq belə fırıldaqçılıq kütləvi hal almaqdadır. Hazırda Masallı rayon məhkəməsində 30 nəfərə yaxın şəxsin ünvanlı yardım, pensiya və sair adlarla aldadıb pulunu alan gənc qadının məhkəmə prosesi gedir. İş o həddə çatıb ki, tibb işçiləri də belə işlərlə məşğul olur. Ağ ciyər xəstəlikləri şöbəsinin həkimi, baş həkimin yaxın adamı olan həkim hətta Bakıdakı müəllimləri aldadıb. Elə həmin Banbaşı kəndindən bir qrup gənc QHT adı ilə min bir oyun çıxardıb. Biz bu materialları araşdırdıqdan sonra yaxın vaxtlarda sizə təqdim edəcəyik. \ CENUBXEBERLERİ.COM \
