ZAQATALADA NƏLƏR BAŞ VERİR?
DİA.AZ: - Keçən günlərdə Zaqatala Elektrik Şəbəkə Müəssisəsinin direktoru Eldəniz Hacıyevin fəaliyyətində yol verdiyi çeşidli qanun pozuntularına dair mətbuatda müəyyən informasiyalar yer almışdı. DİA.AZ-a bu barədə daxil olan məlumatlarda bildirilir ki, bu müəssisənin fəaliyyəti mütəmadi olaraq müxtəlif qanun pozuntuları ilə müşayiət olunur. İlk növbədə sakinlərin narazılıqlarına səbəb olan amil kimi sərf olunan elektrik enerjisinin pulunun sakinlərdən şəbəkənin əməkdaşları tərəfindən yığılması göstərilir.
Məlumdur ki, “Azərenerjinin” təlimatlarına uyğun olaraq bu ödənişlər müvafiq bank şöbələri vasitəsilə həyata keçirilməlidir. Lakin Zaqatalanın əksər kəndlərində bu proses hələ də köhnə qaydalarla davam edir. Təbii ki, məsələnin belə qoyuluşu ciddi mənimsəmələrə yol açır. Həm də əksər hallarda problemli vəziyyət yaranan zaman zərər çəkən tərəf yenə də enerji istehlakçısı olur.
Məlumatlarda xüsusilə vurğulanan daha bir cəhət istehsal və kommersiya obyektləri ilə şəbəkə rəhbərliyi arasında bağlanan qeyri-rəsmi və qeyri-qanuni razılaşmalardır. İddia olunur ki, bu razılaşmalara görə həmin müəssisə rəhbərləri aylıq “haqq” ödənişləri etməklə sayğacdankənar qoşulmuş xətlərlə elektrik enerjisindən istifadə edirlər. Bu isə təbii ki, dövlət vəsaitlərinin mənimsənilməsi ilə bərabər, həm də digər istehlakçıların mənafeylərinə ziddir.
Bu barədə danışan mənbə DİA.AZ-a bildirir ki, bu kimi hallar hətta “Azərenerji”nin müvafiq qurumlarının bir müddət əvvəl Zaqatala rayonu üzrə həyata keçirdiyi yoxlama reydləri zamanı da aşkar olunmuşdur. Çoxsaylı şikayətlərə əsas verən daha bir məqam da elektrik enerjisinin nəql olunduğu xətlərə nəzarət olunmaması ilə bağlıdır. Şikayət məktublarında bildirilir ki, E.Hacıyevin rəhbərlik etdiyi şəbəkənin əməkdaşları onun göstərişlərinə əsasən yalnız “razılaşmalarda” iştirak edən qurumları enerji ilə təchiz edən xətlərin saz vəziyyətdə saxlanılmasına nəzarət edirlər. Təbii ki, bu da digər istehlakçıların hüquqlarının kobud şəkildə pozulması deməkdir.
Xatırlayırsınızsa, hələ ötən ayın əvvəllərindsə dərc olunmuş bir materialda əməkdaşlarımızın Zaqatala RİH-nin başçısı Mübariz Əhmədzadə ilə telefon əlaqəsi saxladıqlarını xəbər vermişdik. Söhbət zamanı Mübariz müəllim dərc olunmuş materiallara münasibət bildirərək, Eldəniz Hacıyevə qarşı irəli sürülən ittihamların əksəriyyətinin öz təsdiqini tapdığını söyləmişdi. Daha sonra başçı bildirmişdi ki, işində yol verdiyi nöqsanlara görə artıq may ayının 20-dən etibarən E.Hacıyev tutduğu vəzifədən azad ediləcək.
Lakin sonradan aldığımız məlumatlarda isə şəbəkə rəisinin xəstəlik kağızı (bülleten) alaraq müvəqqəti işə çıxmadığı, həm də bu addımı məhz Şəki Regional Elektrik Şəbəkə MMC-nin rəhbəri Elşad Məmmədovun məsləhəti ilə atdığı bildirilirdi. Halbuki bizimlə olmuş telefon danışıqları zamanı Elşad müəllim də şəbəkə rəisinin mütləq işdən azad olunacağını dəfələrlə bəyan etmişdi. Amma 04 iyul tarixinədək xəstəlik bəhanəsi ilə işə çıxmayan Eldəniz Hacıyev bu günlərdə yenidən öz işinə qayıtmışdır. Bu xüsusda yerli mənbələr isə bildirmişdilər ki, Eldəniz Hacıyev mövcud durumdan qətiyyən narahat deyil. Əksinə, yaxın ətrafının əhatəsində vəziyyəti müzakirə edən şəbəkə rəisi bəyan edib ki, onu tutduğu vəzifədən azad etməyə Mübariz Əhmədzadənin nə səlahiyyəti, nə də gücü yetməz..
Maraqlıdır ki, mənbələr Elşad Məmmədovun bu günlərdə Ramin Heydərov adlı bir işçini, abonentdən aldığı 100 manat məbləğində işıq pulunu kassaya bir gün gec vurması səbəbilə, işdən çıxarmağı barədə məlumat təqdim ediblər. Bəs görəsən hansı səbəbdən Şəki Regional Elektrik Şəbəkə MMC-nin rəhbəri yalnız seçilmiş vəziyyətlərdə prinsipiallıq nümayiş etdirir? Bu sualı cavablandırmağa çalışan yerli mənbələr isə E.Hacıyevin Elşad Məmmədova qarşı hansısa təsir vasitələri əldə edə bildiyi ehtimalını irəli sürüblər. Əks halda Regional Elektrik Şəbəkənin rəhbəri öz vəzifələrinin öhdəsindən gəlməyən, rüşvətxor bir məmuru hər vəchlə vəzifədə saxlamaq naminə RİH-nin rəhbərliyi ilə açıq qarşıdurmaya girmək riskini göz altına almazdı. Qeyd olunduğu kimi bir müddət əvvəl “Azərenerji” ASC-nin əməkdaşları tərəfindən Zaqatala Elektrik Şəbəkənin fəaliyyətində bir cıra ciddi nöqsanların aşkar edilməsinə baxmayaraq, ASC-nin sədri Etibar Pirverdiyev də Eldəniz Hacıyevin vəzifədə qalıb-qalmamasına dair yaranmış “fikir ayrılığında” məhz Elşad Məmmədovun mövqeyini dəstəkləyir.
