Qubada xalq üsyanına səbəb olan keçmiş icra başçısı Rauf Həbibov Qubaya qayıdır. Bu dəfə itirdiyi postuna yox, qaytarılan mal-mülkünə sahib çıxmaq üçün. Aldığımız bu məlumatı dəqiqləşdirmək üçün ötən gün yolumuzu Qubaya saldıq.
“Qubanın yeni icra başçısı Mübariz Ağayev rayonun bir neçə küçəsində abadlıq işlərinin aparılması ilə bağlı göstəriş verib. Ancaq Quba yalnız bir-iki küçədən ibarət deyil. Yarım saat Qubanın mərkəzini gəzmək kifayətdir ki, bu rayonun hansı vəziyyətdə olduğunu biləsən”. Bunu bizə Quba avtovağzalında rastlaşdığımız taksi sürücüsü Məmmədli İsmayılov dedi. Onun sözlərinə görə, yeni icra başçısı “üstü bəzək, altı təzək” prinsipi ilə guya abadlıq-quruculuq işləri görür: “Bütün bunlar keçmiş icra başçısı Rauf Həbibovun vaxtında olmalı idi. Qubalıların çörəyini yeyib, sonra onları təhqir edən Rauf Həbibov rayona ayrılan milyonları dədə malı kimi mənimsəmişdi. Açığı, biz məlum hadisədən sonra onun həbs olunmasını gözləyirdik. Tam tərsinə oldu. Haqq səsini deyən, Qubanın namuslu, vicdanlı oğullarını şərləyərək həbsə atdılar. Bu hadisəyə elə don geyindirdilər ki, guya olay bir neçə nəfər arasında yaranmış münaqişə zəminində alovlanıb. Telekanallarda Rauf Həbibovun adı belə hallanmadı”.
Bir başqa Quba sakini isə rayonda heç nəyin dəyişmədiyini, turizm və kənd təsərrüfatı cəhətdən kifayət qədər potensialı olan bir rayonun əhalisinin faktiki olaraq süründüyünü söylədi: “Bütün sahələri inhisara alıblar. Bu gün gedin Qubanın kəndlərinə, camaat bir kilo alma çıxarıb sata bilmir. Səbəbi odur ki, məmurlar özünə bir soyuducu anbar açıb, kəndlidən məcburi şəkildə ucuz qiymətə almanı alaraq monopolistdə çevrilir. Elə bu səbəbdəndir ki, bu il meyvə-tərəvəz baha oldu”.
Quba sakinləri bildirdilər ki, yeni icra başçısının da nəqliyyat naziri Ziya Məmmədovun adamı olması dəyişiklik istəyən rayon əhalisinin ümidlərini öldürüb: “Mübariz Ağayev də Rauf Həbibovun yolunu davam etdirir. Rayon faktiki olaraq Ziya Məmmədovun yaxınları arasında bölünüb. Kimi kəndlinin əkin sahəsində villa tikir, kimisi də kasıbın evini başına uçurub obyekt açır”.
Rauf Həbibov Qubaya qayıdır
Qubada olarkən olduqca maraqlı bir məlumat əldə etdik. Rayon icra hakimiyyətində çalışan mənbəmiz keçmiş icra başçısı Rauf Həbibovun Qubaya qayıtdığını söylədi. Onun sözlərinə görə, bir müddət əvvəl sabiq icra başçısının Qubada olan bütün mal-mülkü özünə qaytarılıb. Nəqliyyat naziri Ziya Məmmədovla rayona gələn Rauf Həbibovu yandırılan villasının yanında işçilərə göstəriş verərkən görüblər. Qeyd edək ki, Quba olaylarından sonra Rauf Həbibovun mülkləri yeni icra başçısına verilmişdi. Sabiq icra başçısının qaytarılan mülkləri isə bunlardır:
M.Qorki küçəsində 3 mərtəbəli bina;
R.Həbibovun 4 mərtəbəli yarımçıq binası;
Qələduz kəndində Qudyalçay üzərində 1,5 milyon manatlıq villa və qarşısında 4 hektar sahə;
Olimpiya-idman kompleksinin qarşısında villa;
2 saylı konserv zavodunun arxasında 1 hektar torpaq sahəsi;
Bestujev-Marlinskinin büstünün yerində Tələbə Qəbulu üzrə Dövlət Komissiyasının adına tikilmiş bina;
Quba liseyinin arxasındakı 8 sot torpaq sahəsi;
Quba texnikumunun arxasında 20 sot torpaq sahəsi;
Keçmiş kənd-kimya binaları və 2 hektar torpaq sahəsi;
Şəhərin mərkəzində yerləşən parkın sahəsi və Beynəlxalq Banka illik 250 min manata icarəyə verilən bina.
Rauf Həbibovun qonşuları evlərini satıb köçür
Quba üsyanının səbəbkarı, sabiq icra başçısının yandırılan villasına baş çəkdik. Ərazidə olarkən yandırılan villada təmir-tikinti işləri gedirdi. Tikintiyə rəhbərlik edən şəxs bir neçə gün öncə təmir işlərinə başladıqlarını söylədi. Yanan villa ilə bərabər yaxınlıqdakı yarımtikilidə də işlər aparılırdı.
Rauf Həbibovun qonşuluğunda olan evlərdən bir neçəsinin qapısında isə “satılır” elanı ilə qarşılaşdıq. Evini satışa çıxaranlardan Əli adlı Quba sakini bildirdi ki, evini satmaqda məqsədi var: “Mən özümə sığışdıra bilmərəm ki, bizi təhqir edən biri ilə qonşuluq edim. Bu biz qubalılara yaraşan hərəkət deyil. Evimi satışa çıxarmışam. Rauf Həbibovun gəlib burada yaşaması ilə qubalılar heç cürə barışa bilməz”.
“Mübariz Ağayev işçilərin pulunu vermir”
Quba bazarında olarkən bir qrup fəhlə jurnalist olduğumuzu bilib, yeni icra başçısından şikayətləndi və problemlərini qəzetdə yazmağımızı xahiş etdilər. Onların sözlərinə görə, təxminən 50-yə yaxın fəhlə icra hakimiyyəti tərəfindən həyata keçirilən təmir-tikinti işində çalışıb. Əsasən yol kənarındakı hasarların çəkilişində çalışan fəhlələr dörd aydır maaş ala bilmədiklərini söylədilər. Onların sözlərinə görə, bir neçə dəfə icra başçısının müavini ilə görüşdə olublar, pullarını tələb ediblər. M.Ağayevin müavini hər dəfə vəd verərək bir neçə günə pullarının veriləcəyi ilə başlarını aldadıb. Pullarını ala bilməyən fəhlələr bildirdilər ki, bu həftə ərzində pulları ödənməsə, Bakıya gələrək Prezident Administrasiyası qarşısında oturaq aksiya keçirəcəklər: “Dörd aydır ki, bizi get-gələ salıblar. Başçı Mübariz Ağayev bizi qəbul etmir. Müavini də bu gün, sabah deyərək aldadır. Ölkə başçısına məktub yazdıq, baxılması üzrə icra başçısına göndərildi. Seçki qabağı Qubadakı bütün sahibkarlardan pul yığan başçı nəyə görə 50 nəfər fəhlənin 300 manatlıq aylıq məvacibini verə bilmir?”
Məsələ ilə bağlı Quba Rayon İcra Hakimiyyətinə üz tutduq. İcra başçısı Mübariz Ağayevlə görüşmək istədiyimizi bildirsək də, başçının bizi birinci gün qəbul edə biləcəyini söylədilər. Buna baxmayaraq, qarşı tərəfin də mövqeyini öyrənib dərc etməyə hazırıq. \ Qaynar.info \
