DİA.AZ tanınmış aparıcı Rahib Azərinin Milli.Az-a müsahibəsini təqdim edir.
- Rahib Əliyarzadə. Hər kəsin efirdən və radiodan çox gözəl tanıdığımız, sevə-sevə proqramlarının izləyicisi olduğumuz gözəl, nurlu simalı bir insan: Bəs bu dəfə özünüzü necə təqdim edərdiz?
- Oxucuları salamlayıram, hər vaxtınız xeyirli olsun, özümü adi bir insan hesab edirəm, sadəcə yurdumu və onun üçün gördüyüm işi çox sevirəm... Odur ki, Rahib Azəri, TV və radio aparıcısı, İçərişəhər DTMQİ-nin mətbuat katibi.
- Nə olmuşdu sizə?
- Ürəyimlə bağlı problemlər bir müddətdir məni narahat edirdi. Belə olanda, məndən yan keçər düşünüb, özümüzdən uzaqlaşdırırıq. Sentyabrın 16-da da krizis oldu və xəstəxanaya yerləşdirildim. Kardioloji xəstəxananın qəbul şöbəsində kliniki ölüm baş verdi... Üç dəqiqə ürəyim dayandı. Həkimlərin köməyi ilə görülən tədbirlər məni həyata qaytardı. Fürsətdən istifadə edib, o gecə məni həyata qaytaran Allahıma şükürlər, Rasim doktora və tibb personalına minnətdarlığımı bildirirəm! Həmçinin, Səhiyyə Nazirliyinin mətbuat xidmətinin rəhbəri Anar Qədirliyə təşəkkür etmək istəyirəm. Ürəyimdə əməliyyat aparan Mərkəzi Neftçilər Xəstəxanasının həkimi Abbasəli Abbasəliyevə də xüsusən minnətdaram!
- Niyə görə Azəri?
- Azər vaxtsız vəfat edən dəyərli ziyalı, əmim Azərin adıdır. Onu 1996-cı ildə özümə təxəllüs götürdüm. Bu, həm də məmləkətin adının bir hissəsidir.
- Maraqlıdır, ilk dəfə nə vaxt müsahibə vermisiz?
- İlk dəfə müsahibə verməyimi xatırlamıram. Düzünü desəm, bunu sevmirəm...
- Deyəsən, ixtisasınız heç humanitar sahədə olmayıb. Yəni, jurnalist deyilsiz...
- Mən Neft və Kimya institutunun energetika fakültəsini bitirmişəm. Özümü jurnalist hesab edə bilmərəm, mən aparıcıyam.
- Şəxsən mən sizi “Kiçik Qala 84” adlı televiziya verilişindən tanımışam. Qonaqlarınızdan əksəri köhnə bakılılar idi… İndi də “Sirdaş”sız.
- "Kiçik Qala" ilk televiziya layihəm deyildi, amma aparıcı kimi populyarlıq gətirən ilk böyük layihə idi... Əslində camaat arasında belə təəssürat yaranmışdı ki, əsasən bakılılar dəvət olunur, amma həqiqətən, bu veriliş bütün Azərbaycanın və azərbaycanlılığın təcəssümü idi.
- Siz həm də İçərişəhər DTMQ İdarəsinin mətbuat katibisiz. İçərişəhərdən nə xəbər?
- İçərişəhər bizim qəlbimizdir, o adi məkan deyil, alayi bir şeydir... Bunun nə olduğunu mən hələ də özüm tam dərk edə bilməmişəm... İçərişəhərlə bağlı gözəl xəbərlər hələ bizi gözləyir, inşallah.
- Sizcə, Bakıda tikilən göydələnlər əslində əsl Bakıdan bizi uzaqlaşdırmır? Deyəsən, zaman-zaman əsl Bakını itiririk axı.
- Əlbəttə, bir sıra hallarda göydələnlər köhnə, bir o qədər hündür olmayan binaların yerində tikiləndə, bu hətta ikrah hissi də oyadır. Şükür ki, bu kortəbiilik dövrü arxada qalıb. Bakı 19-cu əsrin sonu, 20-ci əsrin əvvəllərində də tikilib və bəzi hallarda yeni tikilən binalar camaat tərəfindən birmənalı qarşılanmayıb. Hər halda, arxitektura kanonları və yerli relyef nəzərə alınsa, yaxşı olar. O ki qaldı, Bakını itirməyimizə... Məncə, Bakı bizi itirib, çünki şəhəri şəhər kimi formalaşdıran onun sakinləridir...
- Bir az da olduqca geniş olan maraq dünyanızdan danışaq. Cazı hobbiniz saymaq olar?
- Mən musiqini çox sevirəm, yanvarın 9-u ilk efir günümün 19 ili tamam olacaq, inşallah. Əsasən milli musiqimiz və caz məni daha çox cəlb edir. Amma başqa müasir musiqi istiqamətlərini də, xüsüsən lanjı (lounge) çox bəyənirəm.
- Bakılılar və Bakı kəndləri sakinlərindən çox vaxt sizdən söhbət düşəndə “O, bizim kəndçidir” deyirlər…
- Mənim özümə də “siz bizim kəndçimizsiz” deyirlər. Belə olduqda, əvvəlcə maraqlanıram ki, hansı Bakı kəndindənəm... Əslində insanların məkanından asılı olmayaraq məni özlərininki hesab etmələri şərəfdir!
- Çox maraqlı bənzətmələriniz var. Beynəlmiləl sözləri mükəmməl şəkildə azərbaycanlaşdırırsız. Maraqlı sözlərdən bəzilərini deyərdiz, zəhmət olmasa…
- Belə tərcümələri çox sevirəm. Məsələn, internetə daxil olarkən uğursuz olduqda belə yazı görünür - Невозможно отобразить страницу... Mən bunu belə tərcümə edirəm – Stranitsanı otobrazə eləmək vozmojsuzdur. Hamınıza can sağlığı arzu edərək, diqqətinizə görə minnətdarlığımı bildirirəm. Həmişə sizinlə: Rahib Azəri.
