“ABŞ-da güc getdikcə daha çox az sayda super zəngin insanların əlində cəmləşir ki, bu da demokratiyanı təhdid etməyə başlayır”. Bu sözləri ABŞ Prezidenti Co Bayden xalqa vida çıxışında deyib.
“Bu gün Amerikada oliqarxiya yaranır, onun böyük sərvəti, gücü və nüfuzu demokratiyamızı, əsas hüquq və azadlıqlarımızı və hər bir insanın uğur qazanmaq imkanını təhdid edir. Bunun təsiri Amerikanın hər yerində hiss olunur”, - Bayden bildirib.
Postunu təhvil verməkdə olan Prezidentin fikrincə, hakimiyyətin və sərvətin cəmləşməsi vətəndaşların “birlik və ümumi məqsəd hissini” korlayır, cəmiyyətdə “inamsızlıq və parçalanma” yaradır: "Biz milyarderlərə ən böyük vergi güzəştləri verməklə deyil, onları ədalətli paylarını ödəməyə başlamağa məcbur etməklə vergi məcəlləsində islahatlar aparmalıyıq. “Qaranlıq pullar”a – seçki kampaniyalarının gizli maliyyələşdirilməsinə nəzarət etmək lazımdır”.
Bayden heç bir prezidentin vəzifədə olarkən törətdiyi cinayətlərə görə məsuliyyətdən qaça bilməməsi üçün ABŞ Konstitusiyasına dəyişiklik etməyi də təklif edib: “Prezidentin səlahiyyəti qeyri-məhdud deyil. Bu, mütləq deyil və bu baş verməməlidir".
Keçən il ABŞ Ali Məhkəməsi Donald Trampa qarşı irəli sürülən ittihamlardan sonra qərar verib ki, prezidentlər ofislərinin əsas vəzifələri olan hərəkətlərə görə mütləq toxunulmazlığa malikdirlər.
Prezidentliyi dövründə əldə etdiyi nailiyyətləri sadalayan Bayden administrasiyasının NATO-nu gücləndirdiyini, Ukraynanın azadlığını müdafiə etdiyini, Qəzza razılaşmasını təsdiqlədiyini və Çinlə qarşıdurmada uğur qazandığını bildirib. Bundan əlavə, 17 milyona yaxın yeni iş yeri açılıb və səhiyyə xidmətlərindən istifadə imkanları genişləndirilib.
Eyni zamanda, Prezident Rusiyadan və ya Vaşinqtonla Moskvanın münasibətlərindən bəhs etməyib: “Nailiyyətlərimizin təsirini hiss etmək üçün vaxt lazımdır. Lakin toxumlar əkilib və onların cücərtiləri yaxın onilliklərdə böyüyəcək”.
Bayden Trampa hakimiyyətin sülh yolu ilə ötürülməsini təmin etdiyini qeyd edib və yeni administrasiyaya uğurlar arzulayıb.
Xarırladaq ki, ABŞ-ın yeni Prezidenti Donald Trampın andiçmə mərasimi yanvarın 20-də olacaq.
/Ayna.az
