Ukrayna Prezidenti Volodimir Zelenski ABŞ Prezidenti Donald Trampla gələn həftə görüşəcəyini təsdiqləməyib. Amma deyib ki, növbəti həftələrdə “diplomatiya çox intensiv ola bilər.”

Qeyd edək ki, Trampın fevralın 7-də dediyinə görə, o, ehtimal ki, gələn həftə Zelenski ilə görüşəcək. Amerika lideri bildirib ki, görüşün keçiriləcəyi yer “Vaşinqton ola bilər” və əlavə edib ki, “Kiyevə getməyəcək”.

Tramp həmçinin “yəqin ki, yaxın vaxtlarda Rusiya Prezidenti Vladimir Putinlə danışacağını” söyləyib, lakin vaxtı açıqlamayıb.

Bu gün isə ABŞ Prezidenti Rusiya Prezidenti ilə telefon danışığı olduğunu açıqlayıb. Tramp “New York Post”a müsahibəsində qeyd edib ki, Ukraynadakı müharibə ilə bağlı müzakirə aparıb. Telefon danışığının nə vaxt baş tutduğu məlum deyil. İki prezidentin neçə dəfə telefonla danışdığı sualına Tramp belə cavab verib: “Deməməyi üstün tuturam”.

Tramp deyib ki, “insanların döyüş meydanında ölməsinin dayandırmasını” istəyir. ABŞ Prezidenti həmçinin bildirib ki, onun müharibəni necə bitirəcəyi ilə bağlı dəqiq planı var: “Ümid edirəm ki, bu planı açıqlamaq tezdir. Onlar görüşmək istəyirlər”. Ehtimal ki, Amerika lideri Rusiya və Ukrayna liderlərini nəzərdə tutur.

“Amerikanın Səsi” yazıb ki, Zelenskinin sözlərinə görə, ABŞ prezidenti Putinlə görüşmədən əvvəl onun və Trampın şəxsən görüşməsi vacibdir.

“Gələcək həftələrdə diplomatiya çox intensiv ola bilər və biz bu vaxtın effektiv və məhsuldar olması üçün lazım olanı edəcəyik. Biz Prezident Trampla işləməyi həmişə yüksək qiymətləndiririk,” Ukrayna lideri çıxışında vurğulayıb.

“Biz həmçinin komandalar səviyyəsində görüşlər və danışıqlar planlaşdırırıq. Hazırda Ukrayna və Amerika komandaları detallar üzərində işləyir. Möhkəm, davamlı sülh daha da yaxınlaşacaq”, - Zelenski əlavə edib

ABŞ Prezidenti daha əvvəl Ağ Evdə etdiyi şərhlərdə Ukraynaya davamlı hərbi yardımı Ukraynanın xammallarına çıxışla şərtləndirməkdə maraqlı olduğunu təkrarlayıb: “Prezident Zelenski ilə nəzərdən keçirdiyimiz şeylərdən biri onların ehtiyatlarının təhlükəsizliyidir. Onların yeraltı ehtiyatları, nadir torpaq elementləri və başqa şeyləri var, lakin əsas olaraq nadir torpaq elementləridir".

“Biz Ukrayna ilə onlara verdiyimizə nadir torpaq elementləri və digər ehtiyatları ilə zəmanət verəcək bir razılaşma əldə etməyə çalışırıq”, Tramp qeyd edib.

Amerika lideri fevralın 7-də deyib ki, “Birləşmiş Ştatlar dəstəyi müqabilində eyni miqdarda nə isə” istəyir: “Biz onların tarazlamasını istərdik”.

Bir neçə növ nadir torpaq elementləri, nikel və litium da daxil olmaqla 40-dan çox mineral ABŞ iqtisadiyyatı və milli müdafiəsi üçün kritik hesab olunur. Ukraynada böyük uran, litium və titan yataqları var. Ukrayna keçən il müharibəni bitirmək planını təqdim edərkən kritik mineral ehtiyatlarını müttəfiqlərin sərmayəsinə açmaq ideyasını irəli sürüb və indi razılaşmaya açıq ola biləcəyinə işarə edib.

“Əgər biz razılaşmadan danışırıqsa, onda gəlin razılaşaq. Biz yalnız bunun tərəfdarıyıq” Zelenski fevralın 7-də Zelenski müharibənin istənilən həllinin bir hissəsi kimi Ukraynanın müttəfiqlərindən təhlükəsizlik zəmanəti almasına ehtiyac olduğunu vurğulayaraq deyib.

Ayna.az