Almaniyanın ən böyük şirkətləri Ukraynada müharibənin mümkün bitməsinə və sanksiyaların ləğvinə baxmayaraq, Rusiyaya qayıtmağı planlaşdırmırlar. Bu barədə “Deutsche Welle” (DW) məlumat yayıb. Dünyanın ən böyük dəzgah istehsalçılarından biri olan “Trumpf”ın nümayəndəsi nəşrə bildirib ki, “hazırda heç bir halda Rusiya bazarına qayıtma məsələsi nəzərdən keçirilmir”.

“Volkswagen” avtomobil konserni də Rusiya bazarında yenidən işləməyi planlaşdırmadığını açıqlayıb. “Bosh” isə bildirib ki, hazırda belə planları yoxdur və onları müzakirə etmək "çox tezdir".

Rusiyada 170 il fəaliyyət göstərən və getməzdən əvvəl 2700 rusiyalını işlətmiş böyük sənaye konserni olan “Siemens”in sözçüsü "gələcək haqqında spekulyasiya edə bilmərik, lakin Rusiyaya dərhal qayıtma məsələsi yoxdur " deyə bildirib.

Ayaqqabı və idman geyimləri istehsalçısı “Adidas” Rusiyanı tərk etməyib, amma Rusiya ordusunun Ukraynaya hücumundan sonra bütün mağazalarını bağlayıb, onlayn ticarəti dayandırıb və ölkədəki sponsorluq fəaliyyətlərindən imtina edib. "Heç nə dəyişməyib" deyə şirkət nümayəndəsi DW-yə bildirib. O əlavə edib ki, “Adidas” Rusiya bazarı haqqında "bir saniyə belə" düşünmür. Rusiyada fəaliyyətini davam etdirən “Metro” mağazalarının və sürtkü yağları istehsalçısı “Fuchs”un nümayəndələri işlərində heç bir dəyişiklik planlaşdırmadıqlarını qeyd ediblər.

Bundan əvvəl “Washington Post” Amerika şirkətlərinin də Rusiya bazarına qayıtmağa tələsmədiyini yazıb. “Enerji sektorundan kənarda bizə deyən bir müştəri olmayıb ki, “aman Allahım, sizcə, nə vaxt Rusiya bazarına qayıdacağıq?”, deyə Vaşinqtonda yerləşən “Rock Creek Global Advisors” konsaltinq firmasının idarəedici direktoru Maykl Smart qəzetə bildirib. Qeyd edib ki, "bu, sadəcə olaraq verilməyən bir sualdır".

Bununla belə, hətta iri enerji şirkətləri də Rusiyaya qayıtmaya bilər. “Greenmantle” konsaltinq şirkətinin enerji direktoru Nik Kumleben, "onların bir çox başqa variantları var" deyə vurğulayıb.

“Halliburton”, “Baker Hughes” və SLB kimi neft sahəsində xidmət göstərən şirkətlər isə istisna ola bilər. Eyni zamanda, Rusiya ilə ABŞ arasında danışıqların iştirakçılarından biri, Rusiya Birbaşa İnvestisiya Fondunun (RDIF) rəhbəri Kirill Dmitriyev bildirib ki, o, bir sıra Amerika şirkətlərinin Rusiya bazarına hələ 2025-ci ilin ikinci rübündə qayıtmasını gözləyir.

İqtisadi İnkişaf Nazirliyinin rəhbəri Maksim Reşetnikov isə qeyd edib ki, Qərb şirkətləri informasiya sahəsində Rusiyaya qayıtmaq perspektivlərini araşdırır, lakin “bu günə qədər heç bir hüquqi müraciət olmayıb”.

Yale Universiteti İdarəetmə Məktəbinin hesablamalarına görə, müharibə başlayandan sonra 1000-dən çox transmilli korporasiya Rusiyada fəaliyyətini dayandırıb. Bəzi şirkətlər "suları sınaqdan keçirir", lakin geri qayıtmaq istəyən insanların "həvəsindən"ndan söhbət getmir. Bunu Rusiyadakı Amerika Ticarət Palatasının (AmCham Russia) rəhbəri Robert Eyji də təsdiqləyib. Eyni zamanda, o, etiraf edib ki, müharibənin başa çatması ilə bağlı danışıqlar uğurlu olarsa, ilin sonuna kimi 4-5 xarici şirkət Rusiya bazarında fəaliyyətini bərpa edəcək.