ABŞ Prezidenti Donald Tramp hətta seçki kampaniyası zamanı Ukraynadakı münaqişəyə 24 saat ərzində son qoymaq imkanından danışmışdı. Üstəlik, demək olar ki, vəzifəsinin icrasına başlayandan dərhal sonra Amerika lideri Moskva ilə Kiyevi danışıqlara çağırıb və özünü mümkün vasitəçi adlandırıb. İndi Tramp bu vədlərin hamısını həyata keçirməyə çalışır, baxmayaraq ki, bunu etməkdə çoxlu çətinliklərlə üzləşir. Bununla belə, Tramp yəqin ki, nikbindir, çünki daim danışıqlar prosesində irəliləyiş olduğunu qeyd edir.

Məlumdur ki, Ukraynada münaqişənin başlamasından sonra Tramp Rusiya Prezidenti Vladimir Putinlə danışıqların zəruriliyindən danışmağa başlayıb. Eyni zamanda, o özünü Rusiya lideri ilə ünsiyyət qura bilən siyasətçi kimi təqdim edib.

“Vladimir Putinlə danışacaq heç kimimiz yoxdur, əvvəl belə bir insan var idi - mən Donald Tramp ABŞ-ın 45-ci prezidenti”, - deyə bildirmişdi.

Bundan əlavə, hərbi əməliyyatların ilk aylarında Tramp Rusiya və Ukraynanı dərhal danışıqlara başlamağa çağırmışdı və özünü tərəflər arasında “ən yaxşı vasitəçi” adlandırmışdı. Demişdi ki, ABŞ Prezidenti Co Baydüen yox,o olsaydı, Ukraynada münaqişə baş verməyəcəkdi. Eyni zamanda, Tramp dəfələrlə bildirib ki, Ukrayna münaqişəsi Üçüncü Dünya müharibəsinə çevrilə biləcər və bu barədə xəbərdarlıq edib.

“İndi də Rusiya ilə Ukrayna arasında münaqişə var. Müharibəyə sülh yolu ilə son qoymaq üçün dərhal danışıqlara getməliyik. Əks halda, Üçüncü Dünya müharibəsinə şahidlik edəcəyik”, - Tramp hələ prezident olmamışdan əvvəl vurğulamışdı.

“Reuters” Trampın prezident seçkiləri kampaniyası zamanı Ukrayna üzrə sülh danışıqlarına çağırışlarını yenidən xatırladıb. Belə ki, o, 2023-cü ilin yayında qələbə qazanacağı təqdirdə danışıqlar prosesini şəxsən təşkil edəcəyinə söz verib: “Seçkidə qalib gəlsəm, ilk işim Putinlə əlaqə saxlamaq, Zelenski ilə əlaqə saxlamaq olacaq. Mn onların hər ikisini çox yaxşı tanıyıram və əmin olun ki, onlar sülh sazişinə razı olacaqlar. Həm Vladimir Putin, həm də Volodimir Zelenski ilə yaxşı anlaşıram və onların hər biri ilə razılığa gələ bilərəm. Ən nəhayət, Ukraynadakı münaqişəni 24 saat ərzində dayandıra bilərəm”.

Tramp onu da demişdi ki, “Ukraynanın sülhə nail olmaq üçün bir sıra ərazilərdən imtina etməli olacağı mümkündür”.

Nəticədə, ABŞ-da Tramp həqiqətən də seçildikdən dərhal sonra Rusiya və Ukrayna arasında danışıqları təşkil etməyə qadir siyasətçi hesab olunmağa başladı. Lakin Trampın qələbəsi və andiçmə mərasimindən sonra Ukraynada münaqişə bitmədi. Amerika lideri tezliklə 24 saat ərzində sülhün əldə olunması ilə bağlı əvvəlki sözlərindən imtina etdi və bunun aylar çəkəcəyini etiraf etməyə başladı.

“Bunu bir az istehza ilə demişdim. Əslində demək istədiyim o idi ki, bu məsələni həll etməyə qadirəm”, Tramp bildirdi.

Eyni zamanda, Tramp daim qeyd edirdi ki, həm Rusiya, həm də Ukrayna danışıqlara hazırdır. Lakin o Ukraynanın mövqeyi ilə bağlı fikrini sonradan dəyişdi: məsələn, Zelenski ilə görüşdən sonra Amerika lideri bəyan edib ki, “Ukrayna prezidenti sülhə hazır deyil”.

Digər tərəfdən, Tramp Putinin danışıqlar aparmaq istəyini şübhə altına almayıb. O, həmçinin Rusiya lideri ilə şəxsən əlaqə saxlamağa hazır olduğunu və həqiqətən də onunla bir neçə telefon danışığı apara bildiyini vurğulayıb. Eyni zamanda, həmçinin Rusiya prezidenti ilə şəxsən görüşmək niyyətində olduğunu bildirib.

“Putinlə danışacağıq. Və ümid edirəm ki, biz fərq yaradacaq bir şey edəcəyik. Biz münaqişəni dayandırmaq istəyirik”, - deyə Tramp qeyd etmişdi.

Tramp Putinə etibar etməyə hazır olduğunu, lakin kor-koranə etməyəcəyini bildirdi və dedi ki, Putin çox ağıllı və hiyləgər bir insandır. O etiraf etmişdi ki, Rusiya Prezidenti danışıqları gecikdirə bilər, lakin əlavə edib ki, o uzun illər ərzində müxtəlif müqavilələr bağlayarkən bunu edib.

Dünən isə Amerika lideri indi deyir ki, Ukrayna üzrə danışıqlar artıq “kritik mərhələyə” daxil olub. Tramp danışıqlar prosesinə çox vaxt itirməməyə və mümkün qədər tez nizamlanmaya nail olmağa çağırıb. ABŞ lideri münaqişədən sonra Ukraynanın 2014-cü il sərhədlərinə qayıtmasının mümkün olmadığını deyib. Bununlıa yanaşı, Tramp qeyd edib ki, danışıqlar uğurlu olarsa, anti-Rusiya sanksiyalarının yumşaldılması və hətta ləğvi məsələsini nəzərdən keçirməyə hazırdır. O Ukraynanın NATO-ya üzv olmaqdan imtinası ilə razılaşıbВё Rusiya və Ukraynanın sülhə razı olmadığı təqdirdə, bunun bütün dünya üçün yaxşı nəticə verməyəcəyinə diqqət çəkib.

“İnanıram ki, razılıq əldə olunacaq və biz orada baş verən qanı dayandıra biləcəyik”, - deyə Amerika lideri vurğulayıb.

Ayna.az