İyulun 14-də ABŞ Prezidenti Donald Tramp Ukraynadakı müharibə, Rusiyaya qarşı sanksiyalar və Amerika silahlarının tədarükü ilə bağlı bir sıra mühüm açıqlamalar verib. O xüsusilə qeyd edib ki, 50 gün ərzində atəşkəs razılaşması əldə olunmasa, Vaşinqton Rusiyaya qarşı 100 faizlik tariflər tətbiq etmək niyyətindədir.
Məsələyə öz analitik məqaləsində toxunan Ukrayna İctimai İnkişaf Mərkəzində siyasi və hüquqi proqramların rəhbəri, politoloq İqor Reyteroviç bildirib ki, Rusiya Prezidenti Vladimir Putin belə bir vəziyyətdə geri çəkilə bilməz. Onun sözlərinə görə, bu halda Kreml rəhbəri zəif görünəcək. Ona görə də, Putin xəbərdarlıqlara məhəl qoymadığını və əslində addınmlarını davam etdirdiyini göstərməlidir.
“Rusiyanın hansısa yolla Ukraynada irəliləmək cəhdləri çox güman ki, payıza qədər davam edəcək. Eyni zamanda, düşünürəm ki, uğur qazana bilməyəcəklər. Odur ki, ruslar və Putin müəyyən “geri çəkilmə” edə bilər və Kreml bir daha danışıqlar masası arxasına əyləşmək və faktiki olaraq nəyisə razılaşdırmaq istəyini ifadə edə bilər”, - deyə analitik qeyd edib.
Reyteroviç belə davam edib: “Hesab edir ki, indiki vəziyyətdən belə görünür ki, Putin çoxdan Trampa eyham vurur: “Sən axmaqsan, döyüşəcəm, hücuma keçəcəm”. Və Tramp deyəsən ona deyir: "Yaxşı, yaxşı, cəhd et, görək sən nə edə bilərsən. Ukraynaya qarşı addımlar atacaqsan, sonra sentyabrda sanksiyalar və bütün başqa şeylər tətbiq edəcəyik... Onda görəcəyik ki, sən necə cəsarətli görünürsən". Və Putinə iki ay vaxt verməsi ilə yanaşı, Tramp daha bir vacib məqamı nəzərdən keçirdi. Məsələ burasındadır ki, ona müharibənin davam etməsi lazımdır, təbii, bu qədər qəribə səslənsə də. O davamlı olaraq müharibəni mümkün qədər tez bitirməyin tərəfdarı olduğunu desə də, əslində savaşın hələlik davam etməsi lazımdır. Çünki onun üçün bu, Avropaya, xüsusən də Amerika tarifləri məsələsində ciddi təzyiq elementidir. Belə ki, o artıq NATO-nu silahların pulunu ödəməyə razı salıb. Ona görə də bu 50 gündə bu məsələdə Avropaya təzyiq edəcəyini düşünür”.
“Və daha bir məsələ: bəlkə də bütün bunlara Yaxın Şərq ölkələrində baş verən neft hasilatının artması dinamikası təsir edir. Amerikalıların açıqladığı hesablamalara görə, sentyabra qədər onlar elə göstəricilərə çatacaqlar ki, Rusiya geridə qalacaq və daha ona çata bilməyəcək”, - politoloq vurğulayıb.
Analitikin sözlərinə görə, hücumun davam etdirilməsinin digər səbəbi odur ki, bütün rusiyalı qondarma ekspertlər, müharibə müxbirləri, blogerlər, hətta hökumətyönlülər yekdilliklə deyirlər ki, indiki kimi şiddətli müharibə aparmaq üçün resurslar payıza, sentyabra qədər təmin ediləcək: “Sonra Rusiya Federasiyası səfərbərlik elan edilməsini tələb edəcək. Cəbhədə 100 min Şimali Koreyadan olan əsgərlərin olacağı gözləntilərinə baxmayaraq, onlar yekdilliklə bəyan edirlər ki, Rusiya üçün döyüşəcək heç kim yoxdur. Pul işləmir, itkiləri o qədər böyükdür ki, onları örtməyə vaxtları yoxdur. Ona görə də ya müharibəni bitirməli, ya da açıq şəkildə səfərbərlik etməli olacaqlar. Amma hər iki variant Putin üçün qəbuledilməzdir. Ona görə də bu iki ay ərzində Ukraynanın əsas vəzifəsi mümkün qədər müdafiədə dayanmaq və Rusiya hərbçilərini mümkün qədər məhv etməkdir”.
