“Dağlıq Qarabağ”ın keçmiş dövlət naziri Ruben Vardanyan Bakı məhkəməsində ifadə verməkdən imtina edib. Ağır cinayətlərdə təqsirləndirilən Ruben Vardanyanın barəsində cinayət işi üzrə məhkəmə prosesinin baxış iclası fevralın 25-də davam etdirilib.
R.Vardanyan aclıq aksiyası keçirdiyinə görə özünü yaxşı hiss etmədiyini söyləyib. Hakim təqsirləndirilən şəxsin həkim müayinəsindən keçməsi üçün fasilə elan edib. Fasilədən sonra məhkəmə iclasına sədrlik edən hakim Zeynal Ağayev cinayət prosesinin tərəflərinə məhkəmə istintaqında sübutların tədqiq edilmə qaydasını izah edib. Ardınca təqsirləndirilən şəxsə sərbəst ifadə vermək təklif olunub, lakin o, ifadə verməkdən imtina edib. Bundan sonra dövlət ittihamını müdafiə edən prokurorlar təqsirləndirilən şəxsə ittiham olunduğu cinayət əməlləri üzrə suallar verməyə başlayıb. Təqsirləndirilən şəxs Ruben Vardanyan ona verilmiş sualların heç birini cavablandırmayıb. Məhkəmənin növbəti iclası martın 4-nə təyin olunub.
Mövzu ilə bağlı “Sherg.az”a danışan siyasi şərhçi Azər Həsrət bundan əvvəl də Vardanyanın məhkəmə zamanı beynəlxalq və Azərbaycan prosessual qanunlarının pozulmasına etiraz olaraq aclıq aksiyası elan etməsini xatırladıb:
“Azərbaycan ərazisində separatçılıq və terrorçuluqda təqsirləndirilən və hazırda məhkəmə qarşısında dindirilən ermənilərin məhkəmə prosesini yaxından izləyirəm. Çalışdığım qədər detalları da təhlil edirəm. Bir vaxtlar asıb- kəsən, özlərini qondarma respublikanın sahibi elan edən bu şəxslərin məhkəmə qarşısındakı davranışlarına baxıram ki, quzuya dönüblər. Havadarlarının arxasına gizlənərək kükrəyib bizi hədələyən şəxslərdən əsər qalmayıb. Ağalarına söykənərək üstümüzə hürən köpəklər indi Azərbaycanın ədalət məhkəməsi qarşısında quyruqlarını qısıb bir küncdə çömbəliblər. Vardanyanın etirazı, ifadə verməkdən imtinası onun çarəsizliyindən qaynaqlanır. “Suda boğulan saman çöpündən yapışar”- deyirlər. Vardanyan məhkəmədə ifadə verməməklə nəyəsə nail olacağını, dünya ictimaiyyətinin diqqətini cəlb edəcəyini düşünür. Boş şeydir! Mən onun Qarabağa gəlməzdən əvvəlki fəaliyyətini də araşdırmışam. Guya humanitar əməllərlə məşğul olduğunu, Vardanyanın Qarabağa qanunsuz gəlməsini, özünü qondarma respublikanın dövlət naziri elan etməsini də yaxşı bilirik. Vardanyanın digər təqsirləndirilən şəxslərdən fərqi Azərbaycan respublikasının vətəndaşı olmamasıdır. İrəvanda doğulsa da, sonradan Rusiya vətəndaşlığını alıb”.
A.Həsrətin sözlərinə görə, Vardanyanın ifadə verməkdən imtinası hər nə qədər məqsədli olsa da, bizi narahat edəcək bir məsələ deyil:
“Məhkəmə boşuna qurulmayıb ki, Azərbaycan dövlətinin əlində kifayət qədər dəlil-sübutlar var. Vardanyan nə qədər istəyir özünü artistliyə qoysun, onsuz da heç bir nəticəsi olmayacaq. Onun üçün ən yaxşı yol, günahlarını etiraf edib, Azərbaycan məhkəməsindən aman diləməsidir ki, nisbətən cəzası yüngülləşsin. İfadə versələr də, verməsələr də, bütün cinayətkarlar Azərbaycan xalqına qarşı törətdiyi əməllərə görə qanun qarşısında cavab verəcəklər”.
