Yayın gəlişi ilə Azərbaycanda həm də turizm sürətlə inkişaf etməyə başlayıb. Hələ ötən il prezident İlham Əliyev ölkədə turizmin inkişafı üçün lazımi tapşırıqlar vermişdi və ölkədə otel biznesinin , istirahət mərkəzlərinin yaradılmasına dəstək verildi. Amma bir tərəfdən dünya standartlarına cavab verəcək istirahət mərkəzləri yaradılırsa, digər tərəfdən isə insanların büdcəsinə əl uzadan, heç bir normalara cavab verməyən istirahət mərkəzləri də var. Bunlardan biri isə Novxanı çimərliyində yerləşən"Aquapark" istirhət mərkəzidir. "Unikal" qəzeti olaraq "Aquapark" İstirahət Mərkəzində insanların cibinə necə girmələrini, antisanitariyanın hansı səviyyədə olmasını araşdırmaq üçün mərkəzə yollandıq.
Zibilxanadan
"cənnətə" doğru
Novxanı çimərliyinin girişində görünən möhtəşəm binaya kənardan baxanda ən azından Las-Veqas cənnətinə düşəcəyinizi düşünməyiniz mütləq olacaq. Çünki kənardan gəl-gəl deyən bu bina Novxanının həmin ərazisində ki, ən böyük tikili təsiri bağışlayır. Digər insanlar kimi bizdə elə bu həvəslə istirahət mərkəzinə doğru gedirik. Və... aydın olur ki, "Aquapark"a getmək üçün ən azından bir skafandıra da almağa ehtiyac var imiş. Mərkəzin həndəvərində ki, zibilxanadan, tullantılardan yaranan iy və dözülməz görüntü istirahət mərkəzinə olan ümidləri yox edir. Yolun bərbad olmasından danışmağa isə dəyməz. Həmin an ani olaraq bir suala cavab tapmaq istəyirsən- bu qədər istirahət mərkəzində qazanılan milyonlardan cüzi qədərini ayıraraq bu xarabalıqları, zibilxanaları təmizləmək olmazmı? Ən azından dünya praktikasında mövcuddur ki, bu cür istirahət mərkəzləri fəaliyyət göstərdikləri ərazilərdə nümunəvi təşkilat hesab olunurlar və şəxsən özləri maraqlı olur ki, həmin ərazidə sanitariya qaydalarına ciddi əməl olunsun. Amma görünür pul hərisliyi "Aquapark" İstirahət Mərkəzinin rəhbərliyinin gözünü örtüb və istirahət mərkəzinin divarından kənarda mövcud olanlar onlar üçün maraqlı deyil. Bir sözlə iyli-qoxulu, dağılmış yollarla "Aquapark"a daxil oluruq. Daha doğrusu cəhd edirik.
15 manatlıq qapı
İstirahət mərkəzinə daxil olanda ilk qadağa qarşında dayanır. Söhbət içəri daxil olmaq üçün adambaşına 15 manatın ödənilməsidir. Qarşılığında nə qəbz verilir, nədə hansısa kassa görmək mümkün deyil. Yığılan pullar hansı əsasla alınır və hara ötürülür, bu suala mərkəzin rəhbərliyindən başqa heç kim cavab verə bilməz. Çünki yığılan pullar kassadan kənarda yığıldığı üçün sözsüz ki, vergidən yayınma var və deməli bu pullar heç də rəsmi büdcəyə daxil edilmir. Amma istirahət mərkəzi uşaqlarıda "nəzərə" alıb. Böyüklər üçün 15 manat tələb edilirsə, uşaqlar üçün 10 manat istənilir. Nə isə... 15 manatı ödəyib daxil oluruq istirahət mərkəzinə və bundan sonra ödədiyin 15 manatın həqiqətən havaya sovrulduğunu görürsən. Çünki istirahət mərkəzinin daxilində xidmət demək olar ki, sıfır həddindədir və üfunətdən, antisanitariyadan burada istirahət etmək sadəcə mümkünsüzdür. Sadəcə olaraq şəhərə yaxın olduğu üçün insanlar bura üz tutmağa məcbur olur.
Qurbağa üzən
hovuzlar
"Aquapark"da insanların üz tutduğu yer ilk növbədə hovuz olur. Və daxili qaydalara görə hovuza daxil olmamışdan öncə çimərlik kabinelərinə daxil olmalısınız. Şəkildə də gördüyünüz kimi burada nəinki yuyunmağa, heç nəfəs almağa da şərait yoxdur. Belə olan halda sual verilir, girişi 15 manat olan mərkəzdə nədən gigenik qaydalara əməl edilmir? Sözsüz ki, hər bir otel və istirahət mərkəzi üçün konkret şərtlər olur və bu şərtlərə cavab verən iaşə obyektlərinin işləməsi qanuni sayılır. Amma "Aquapark"da bir dənə də olsa diqqəti çəkəcək nümunə tapmaq mümkün deyil. Amma nədənsə istirahət mərkəzinə söz deyəcək, irad göstərəcək kimsəni tapa bilməzsən. Vətəndaşın özünə gəldikdə isə etdiyin şikayətə tək bir cavab verilir:- Xoşun gəlmir, çıx get. Vəssalam.
Yeri gəlmişkən bunu da qyed edək ki, bir dəfə "Aquapark"da istirahət üçün sərf olunan pulla Antaliyanın istənilən istirahət mərkəzində gedib rahat istirahət etmək olar. Çünki nəzarətsizlikdən burda hər gün hər şeyin qiyməti dəyişdirilir, insanların mərkəzə gəldiyini görə rəhbərlik qiymətləri bir saatın içində dəyişə bilir. Amma nədənsə xidmətdə keyfiyyət dəyişmir ki, dəyişmir. İstirahət mərkəzində olan zaman işçilərlə etdiyimiz söhbət zamanı buda aydın oldu ki, orda işləyənlərin əksəriyyətinin elementar əmək müqaviləsi belə yoxdur. Özlərinin dediyi kimi günəmuzd işləyirlər və pullarını admnistratorlar nəğdi ödəyir. Yəni burda da vergidən yayınmanın şahidi oluruq.
Bir stəkan çay və
həyatına nifrət
İndi isə gəlin istirahət mərkəzində verilən yeməklərin keyfiyyətinə diqqət ayıraq. Və başlayaq ilk növbədə çay süfrəsindən. El misalı ilə desək "imama bir bardaq suyu qıymayan yezid"-prinsipi burda da işləyir. Əlin cibində olmasa nəin ki, bir stəkan çay, heç bir stəkan suda tapa bilməzsən. Yox əgər içəri daxil olmaq üçün 15 manat verdiyinizi düşünüb, heç olmasa bir stəkan suyun pulsuz olacağını düşünürsünüzsə yanılırsınız. Çünki burda hər şey paranın başındadır və şəhərdə 20 qəpiklik suyu burda ən azı bir manata ala bilərsən. Çay məsələsinə gəldikdə isə adi çay tapmaq mümkün deyil. Mütləq çayın yanında nəsə olur və avtomatik olaraq 1 manatlıq çay 15 manata müştəriyə satılır. Heç bir etiraz isə qəbul olunmur. Çünki daxili qaydalar bunu tənzimləyir. Hansı qanunla, bax bu sualın cavabını heç istirahət mərkəzinin işçiləri də bilmir. O ki, qaldı yemək həvəsinə düşməyə, çalışın bu həvəsi anındaca başınızdan atın. Çünki "Aquapark" İstirahət Mərkəzində iki nəfərin yeməyinə sərf olunacaq vəsait , bir ailənin bir aylıq dolanışığı üçün lazım olan vəsait qədərdir. Bişirilən yeməklərin, kababların nə ətindən hazırlandığını isə tapmaq mümkün deyil.
Beləcə, müştərilərin daima "qulluğunda" dayanan "Aquapark" İstirahət Mərkəzi ilə vidalaşıb geri qayıdırıq. Amma anlaşılan budur ki, bura istirahət mərkəzi yox, cəhənnəm mərkəzi desək yaxşı olardı. Ən qəribəsi isə budur ki, bu cür antisanitariya mərkəzinə əlaqədər təşkilatların heç biri müdaxilə edə bilmir. Çünki görünür, bu cür qanunsuzluqları edənlər,kimlərəsə ümidlidilər və arxalarında dayanan o məhcul şəxslər "Aquapark" İstirahət Mərkəzinin rəhbərliyinə istədiyini etmək şansı veriblər.
