Bakı Apellyasiya Məhkəməsində avtomobillə piyadanı vuraraq onun ölümünə səbəb olmaqda təqsirləndirilən Fərid Sultanovun (soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Zəfər Əhmədovun sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İttihama görə, hadisə 2025-ci ildə saat 22:22 radələrində Xətai rayonu, A.Cəlilov küçəsində baş verib.

Belə ki, Fərid Sultanov idarə etdiyi “Hyundai Elantra” markalı avtomobillə həmin küçədə saatda 60 kilometr sürətlə hərəkətdə olarkən yol hərəkəti qaydalarını pozub.

Sürücü “Yol hərəkəti haqqında” Azərbaycan Respublikası Qanununun 54-cü maddəsinin 1-ci hissəsinin tələblərinə əməl etməyib. Həmin tələblərə görə, nəqliyyat vasitələrinin hərəkəti nizamlayıcı və ya işıqfor vasitəsilə tənzimlənməyən piyada keçidinə yaxınlaşan sürücü sürətini azaltmalı, yolu keçməyə başlamış piyadaları təhlükəyə məruz qoymamalı, piyada artıq yola daxil olduqda isə nəqliyyat vasitəsini dayandıraraq ona yol verməlidir.

Lakin Fərid Sultanovun hadisənin qarşısını almaq üçün texniki imkanının olduğu bildirilsə də, o, avtomobili dayandırmayıb və yolu soldan sağa doğru keçən piyada Ramin Əliyevi nəqliyyat vasitəsinin qabaq sağ hissəsi ilə vurub.

Zərbədən sonra piyada kəllə sümüklərinin çoxsaylı sınıqları, baş-beyinə qansızma və baş-beyin ödəmi daxil olmaqla, sağlamlığa ağır zərər vuran xəsarətlər alıb. O, hadisədən sonra Yeni Klinikaya yerləşdirilsə də, aldığı xəsarətlərdən 33 gün sonra orada vəfat edib.

Xətai Rayon Məhkəməsinin hökmü ilə Fərid Sultanov Cinayət Məcəlləsinin 263.2-ci maddəsi ilə təqsirli bilinib. Ona 2 il müddətinə nəqliyyat vasitələrini idarə etmək hüququndan məhrum edilməklə 4 il 6 ay müddətinə azadlıqdan məhrumetmə cəzası təyin olunub. Hökmə əsasən, məhkum cəzasını məntəqə tipli cəzaçəkmə müəssisəsində çəkməlidir.

Hökmdən narazı qalan təqsirləndirilən şəxsin müdafiəçisi apellyasiya şikayəti verib. Müdafiəçi cinayət işinə qismən məhkəmə istintaqı aparılmaqla yenidən baxılmasını və qanuni, ədalətli qərar qəbul edilməsini xahiş edib.

Mərhumun hüquqi varisinin nümayəndəsi dəhökmdən apellyasiya şikayəti verib. O, hökmün mülki iddia hissəsinin ləğv edilməsini və Fərid Sultanovdan Ramin Əliyevin hüquqi varisinin xeyrinə 87 676 manat məbləğində maddi ziyanın ödənilməsi barədə yeni qərar qəbul olunmasını xahiş edib.