Mətbuat işçisinin hər hansı bir məlumata aydınlıq gətirilməsi məqsədi ilə dövlət orqanlarının, bələdiyyələrin, müəssisə və təşkilatların, qeyri-hökumət təşkilatlarının, siyasi partiyaların fəaliyyəti barədə düzgün informasiya almaq kimi hüququ var. Həmçinin də vəzifəli şəxslərdən istər yazılı sorğu etmək, istərsə də şifahi şəkildə məlumat almaq vəzifəsi var. Amma bəzən özünü ağıllı hesab edən bir çox vəzifəli şəxslər bunu başqa səmtə yönəldir, qabaqdangəlmişlik edərək güya şantaj olunduğunu iddia edirlər. Araşdırdıqda isə belə vəzifəllilərin daha çox qanun pozuntusuna yol verdikləri məlum olur. Qax rayonu Damazlıq İpəkçilik Stansiyasının direktoru Əkrəm Fətəliyev kimi.
Qeyd edək ki, Qax rayonu Damazlıq İpəkçilik Stansiyasında tut ipəkqurdu cins və hibridlərinin yüksəkkeyfiyyətli ilkin materialının hazırlanması və çoxaldılması işləri aparılır. Əsas məqsəd barama toxumu zavodlarının və kümçülərin ipəkqurdunun sənaye qrenası ilə yerli istehsal hesabına təmin etməkdir. Stansiya əsaslı şəkildə yenidən qurulub və 2018-ci ilin oktyabrında istifadəyə verilib. Kənd Təsərrüfatı Nazirliyi tərəfindən tender yolu ilə 2021-ci ildə 391.406 manat məbləğində tut ipəkqurdunun barama sarıma və hibrid tut ipəkqurdu toxumu istehsalı avadanlıqları alınıb, yaş baramanın qurudulması məntəqələrinin stellaj və jalüz tipli pərdələrlə təchizatına 1.349.840,94 manat xərclənib. Baramaçılığın inkişaf etdirilməsi məqsədi ilə Kənd Təsərrüfatı Nazirliyi tərəfindən hər il bu sahəyə külli miqdarda dövlət vəsaiti xərclənib. Təkcə bu ilin aprelində sözügedən nazirlik tərəfindən Çin Xalq Respublikasından 11 min qutu hibrid ipəkqurdu sənaye toxumu alınaraq Qax Damazlıq İpəkçilik Stansiyasına verilib. Göründüyü kimi bu sahəyə dövlət tərəfindən hərtərəfli diqqət göstərilir. Amma burada nöqsanlar da yox deyil.
Belə ki, Stansiyada zəruri mal-materialların və xidmətlərin satın alınması qanunla müəyyən olunmuş qaydada təşkil edilməmiş, nəzərdə tutulan malların və xidmətlərin alınmasını illik satınalma planlarına daxil edilmiş, açıq tender və kotirovka sorğularının keçirilməsini qanunla nəzərdə tutulan qaydada elan edilməmiş, E-tenderdə iddiaçılara heç bir elektron dəvət elanı yerləşdirilməmişdir. Lakin dövlət satınalmalarının vahid internet portalında barama qurdlarının yetişdirilməsində istifadə olunacaq ofset, qəzet, qraf və perqamentli kağızların satın alınması üzrə keçirilmiş kotirovka sorğularının və Stansiyasının ərazisində avadnlıqların yerləşdirilməsi üçün tavların tikintisinin aparılması üzrə keçirilmiş açıq tenderin nəticələri barədə məlumatlar verilmişdir.
Aktualinfo.org bu kimi anlaşılmazlıqlara aydınlıq gətirmək məqsədi ilə “Media haqqında” Qanunun 17-ci maddəsinin tələblərinə uyğun olaraq Qax Damazlıq İpəkçilik Stansiyasının Tender Komissiyasına elektron sorğu məktubu ünvanlamışdır. Məktubda qurumun Tender Komissiyasından aşağıdakı suallara aydınlıq gətirilməsi xahiş olunmuşdur.
Qax rayonu Damazlıq İpəkçilik Stansiyasının Tender Komissiyası 2020-2023-cü illər ərzində açıq tender və kotirovka sorğularının keçirilməsi barədə iddiaçılara heç bir dəvət elanı verməmişsə, bu prosedurları necə həyata keçirmişdir?
Satınalmalar üzrə iddiaçılara E-tenderdə elektron dəvət elanı verilməmişsə bu tenderin qalibi necə müəyyən edilib?
Əgər açıq tenderin keçirilməsi barədə əvvəlcədən qanunla müəyyən olunmuş şəkildə dövlət satınalmalarının vahid internet portalı vasitəsi ilə, elektron qaydada iddiaçılara dəvət elanı verilməmişsə bu satınalma prosedurları hansı üsullarla keçirilmişdir?
Suallara aydınlıq gətirilməsi məqsədi ilə Qax Damazlıq İpəkçilik Stansiyasının Tender Komissiyasının əlaqələndirici şəxsi ilə də əlaqə saxladıq. Oradan bu məlumatların dövlət satınalmalarının vahid internet portalının bazasında olmamasını saytın yenilənməsi ilə əlaqələndirdilər və bütün satınalmaların qanun çərçivəsində keçirildiyini bildirib, məktuba yaxın zamanda cavab veriləcəyini qeyd etdilər.
Lakin deyəsən sorğu məktubu Stansiyasının direktoru Əkrəm Fətəliyevi bərk narahat edib. Qabaqdangəlmişlik edərək onu şantaj etdiyimizi iddia edir. Nədən? Çünki biz ondan hər gün restoranlarda xərclədiyi pulların mənbəyini də soruşduq.
Bu respublikamızın şimal-qərb bölgəsindən redaksiyamıza daxil olan məlumatlarda barama qurdunun Şəki, Zaqatala Qax və Balakən rayonlarında kəndlərin icra nümayəndələrinə, bələdiyyə sədrlərinə və məktəb direktorlarına bir çox hallarda məcburən verildiyi bildirilir, bunun isə sakinlərin narazılığına səbəb olduğu söylənilir. Məlumatlarda Qax rayonu Damazlıq İpəkçilik Stansiyasının direktoru Əkrəm Fətəliyevin dövlətin baramaçılığın inkişafına göstərdiyi qayğıdan istifadə edərək son vaxtlar özünə var dövlət toplaması, hər axşamı restoran və müəyyən xanalarda keçirməsi də bildirilir. Biz də bir mətbuat orqanı olaraq araşdırma aparmağa başladıq ki, dövlətin kümçülərə pulsuz payladığı barama qurdlarında Əkrəm Fətəliyev necə gəlir əldə edir? Məlum oldu ki, Əkrəm Fətəliyevin rəhbərliyi altında Qax Damazlıq İpəkçilik Stansiyasında satınalmalar qanunla müəyyən olunmuş qaydalarda həyata keçirilmir. Bu isə şübhələnməyə əsaslar verir.
Qeyd edək ki, “Azərbaycan Respublikasında baramaçılığın və ipəkçiliyin inkişafına dair 2018–2025-ci illər üçün Dövlət Proqramı” çərçivəsində son illər bu sahəyə dövlət tərəfindən milyonlarla manat dövlət vəsaiti xərclənib. Görsənən odur ki, Dövlət Proqramı baramaçılığın və ipəkçilikdən daha çox Əkrəm Fətəliyevin işinə yarayıb. Yoxsa aldığı maaaşla hər axşam gününü restoran və müəyyən xanalarda necə keçirərdi? Təbii ki, restoranda oturub yeyib-içmək qəbahət deyil. Amma bunu hər axşam etmək üçün gərək imkanlı bir biznesmen olasan. Əkrəm Fətəliyev isə biznesmen deyil. Bəlkə də artıq özünə biznes qurub. Amma bu biznesi hansı maaşla qurub ki, hər axşam restoran və müəyyən xanalardadı?
Bu suallara Əkrəm Fətəliyev cavab verməkdən boyun qaçırdı və bizi onu şantaj etməkdə suçladı. Əslinə bu sualları hazırda Ali Məhkəmənin sədri olan İnam Kərimova vermək lazım idi. Axı respublikada baramaçılığın və ipəkçiliyin inkişafına bir islahatçı nazir kimi o başlamışdı. Baramaçılığın inkişafına ayrılan milyonlardan tenderlər yolu ilə kimlərin nə qazandığını da o yaxşı bilərdi. İndi yeni Kənd Təsərrüfatı naziri Məcnun Məmmədovdan soruşmaq istəyirik. Qax rayonu Damazlıq İpəkçilik Stansiyasının direktoru Əkrəm Fətəliyevin aylıq maaşı nə qədərdir ki, restoran və bəzi xanalarda hər axşam xərcləyə bilir?
Aktualinfo.org
