Son zamanlar Azəriqaz İstehsalat Birliyində müşahidə olunan YENİLİKLƏR sözügedən qurumun işçiləri tərəfindən etirazla qarşılanmaqdadır. Hər halda, aydın olanı odur ki, baş verən yinliklər KÖHNƏDƏN yaxşı nə var idisə - onu hədəfə aldığından sıravi işçilərin sosial durumu əslində, günü gündən pisləşməkdə davam edir.
"DİA-AZ" xəbər verir ki, bu barədə davamlı olaraq məsələ qaldıran və əlaqədar qurum və şəxslərdən hesabat tələb edən Neftçilərin Hüquqlarının Müdafiəsi Təşkilatının (NHMT) sədri, tanınmış hüquq müdafiəçisi Mirvari Qəhrəmanlı bu dəfə "Azəriqaz"ın sahə üzrə ekspertlərindən birinə istinadla yazır:
"Metrologiya üzrə mühəndislərin ixtisas dəyişdirilməsi narahatlıq doğurur...
Son dövrlərdə rayon qaz istismarı sahələrində 10–15 il və daha çox təcrübəsi olan, ümumilikdə 400-ə yaxın metrologiya üzrə mühəndisin böyük əksəriyyəti xidmətin satış şöbəsinə, bir hissəsi isə müayinə və istismara qəbul xidmətinə, digər hissəsi isə qəza-bərpa xidmətinə usta kimi yönləndirilir. Bu dəyişikliklər çox vaxt əməkdaşların razılığı olmadan, məcburi ərizələr vasitəsilə həyata keçirilir.
Qaz təsərrüfatı üzrə mütəxəssislər bildirirlər ki, bir metrologun yetişdirilməsi uzun illər tələb edir və bu sahə yüksək dəqiqlik, məsuliyyət və texniki biliklər tələb edən mürəkkəb peşədir. Qaz istismar xidmətində fəaliyyət göstərən mühəndis metroloqlar əsasən 8-9-10 cu dərəcədən yuxarı olmayan ştatlarda fəaliyyət göstərirdilər
Hazırda sayğacların qəbulu və istismarı xidmətində, həmçinin nəzarət ölçü cihazları və avtomatika üzrə ixtisaslaşmış mühəndislər və çilingərlər demək olar ki, xidmətlərdə qalmayıblar. Bu isə qaz təsərrüfatında texniki təhlükəsizlik, dəqiqlik və nəzarət mexanizmlərinin zəifləməsinə gətirib çıxaracaq.
Aldığımız digər məlumata görə, yerlərdə qaz sayğaclarının kütləvi şəkildə əvəzlənməsi – yəni istismar müddəti 5 il və daha çox olan sayğacların dəyişdirilməsi – bağlanmış rəsmi müqaviləyə əsasən “Təmiz Qaz” QSC tərəfindən həyata keçiriləcək. Müqaviləyə görə, bir sayğacın dəyişdirilməsi (mal və material xərcləri daxil olmadan) 16.00 AZN məbləğində qiymətləndirilib. Halbuki, bundan əvvəl 9-cu dərəcəli, aylıq əməkhaqqı 800 manat olan bir mühəndis-metrolog gün ərzində 30–40 sayğacın əvəzlənməsini yerinə yetirirdi..."
