Faktinfo.az saytına göndərilən müraciətdə deyilir:

Möhtərəm Cənab Prezident !

Ümummilli lider Heydər Əliyevin Azərbaycana rəhbərlik etdiyi illərdə ölkədə üzümçülük və onun emal sənayesinin inkişafına xüsusi diqqət yetirilmiş, yüksək inkişaf mərhələsinə keçid təmin edilmişdir.Heydər Əliyevin göstərişi və qərarları ilə üzüm bağlarının ümumi sahəsi genişləndirimiş, məhsuldarlıq artırılmış, üzümün keyfiyyəti ildən-ilə yaxşılaşmışdır.

Ulu Öndər Heydər Əliyevin üzümçülük sahəsinə göstərdiyi qayğı və diqqət nəticəsində Respublikada üzüm bağlarının ümumi sahəsi 286 min hektara çatdırılmış, üzüm istehsalı 2,136 milyon ton, hektardan məhsuldarlıq isə 100 sentner təşkil etmişdir. Ümummilli lider Heydər Əliyevin təşəbbüsü ilə Azərbaycanda üzümçülük və şərabçılıq sahəsinin elmi əsaslarla inkişafını təmin etmək üçün Nazirlər Sovetinin 1976-cı il,12 avqust tarixli 269 saylı sərəncamı ilə Üzümçülük və Şərabçılıq Elmi-Tədqiqat İnstitutu yaradılmışdır.Şərabçılıq və emal sənayesini mühəndis-texnoloq, mühəndis-mexanik kadrları ilə təmin etmək məqsədi ilə 1981-ci ildə Gəncə şəhərində Azərbaycan Texnologiya İnstitutunun yaradılması barədə keçmiş İttifaq hökuməti xüsusi qərar qəbul etmişdir.

Onu da qeyd etməliyəm ki,elmi pedaqoji fəaliyyətimlə əlaqədar üzümçülük və şərabçılığa dair hal-hazırda 300 elmi əsərin, o cümlədən 22 kitab, 4 broşur və 22 ixtiranın müəllifiyəm. Onlardan SCOPUS, AGRİS, РИНЦ kimi nüfuzlu nəşr bazalarının jurnallarında innovativ ideya və texnologiyaları özündə əks etdirən 60-dan çox məqaləm dərc olunub. Beynəlxalq konfrans və seminarlarda Azərbaycanı layiqincə təmsil etməklə Beynəlxalq Üzümçülük və Şərabçılıq Akademiyasının, Avropa Təbiət Elmləri Akademiyasının və İtaliya Şərabçılar cəmiyyətinin üzvü seçilmişəm. Beynəlxalq dərəcəli hakim-dequstator kimi İspaniya, İtaliya, Fransa, Portuqaliya, Çin XR, Türkiyə, Rusiya, Ukrayna, Moldova və digər ölkələrdə keçirilən dequstasiyalara dəvət olunaraq hər il Azərbaycana qızıl, gümüş medal qazandırmışam. Eyni zamanda, Azərbaycan Dövlət Aqrar Universitetində (ADAU) dissertasiya şurasının sədri olmuşam və Moskvada nəşr olunan “Üzümçülük və Şərabçılıq” jurnalının Redaksiya heyyətinin üzvüyəm. Son illərdə Üzümçülük və Şərabçılıq Elmi-Tədqiqat İnistitunun direktor vəzifəsində çalışmış və institutun fəaliyyətini, beynəlxalq əməkdaşlığını genişləndirmişəm.

Ümummilli lider “Heydər Əliyevin Azərbaycanda Üzümçülük, Şərabçılıq Strategiyası” kitabının müəllifiyəm. Kitabda cənab prezident İlham Əliyevin, birinci vitse-prezident Mehriban xanım Əliyevanın bu sahənin inkişafına dair apardıqları sistemli islahatlar, ölkə miqyasında qazanılmış uğurlar, Beynəlxalq üzümçülük və şərabçılıq təşkilatları ilə aparılmış sıx əməkdaşlığa dair məlumatlara geniş yer verilib. Kitabın daha geniş oxucu kütləsinə çatdırılması üçün, ingilis və rus dillərində nəşr olunub beynəlxalq ictimaiyyətə təqdim olunması üzərində iş aparıram.

Özümlə bağlı geniş məlumatı ona görə qeyd etdim ki, mənim yüksək peşəkar bir mütəxəssis, beynəlxalq dərəcəli hakim-dequstator kimi yetişməyimdə və qazandığım bütün naliyyətlərdə məhz Ümummilli lider Heydər Əliyevin, o cümlədən sizin rolunuz olmuşdur. Bu həm də o illərə təsadüf edir ki, düzgün və sistemli yeridilmiş siyasət nəticəsində üzümçülüyün inkişafı, Azərbaycan şərablarının Rusiya bazarlarında xüsusi payı öncül yerlərdə idi. Bu dövr həm istehsalda, həm də ixracatda ölkəmizin büdcə gəlirlərinin 20-25 faizini gətirən sahə kimi tarixə düşüb.

Möhtərəm cənab Prezident!

Sizin rəhbərliyiniz sayəsində üzümçülük və şərabçılığın inkişafına dair Dövlət Proqramı qəbul edilmiş və proqramdan irəli gələn işlərin daha geniş çapda həyata keçirilməsinə zəmin hazırladığımız bir şəraitdə 19 noyabr 2018-ci il tarixində Üzümçülük və Şərabçılıq Elmi-Tədqiqat İnistitunun direktoru vəzifəsindən məcburi şəkildə uzaqlaşdırılaraq Kənd Təsərrüfatı Nazirliyində Aqrar İnnovasiya Mərkəzinə gətirilmişəm.Mənim ölkəmizin üzümçülük və şərabçılıq sahəsinə daha çox töhfə verə biləcəyim təqdirdə, hazırda qeyri-spesifik sahədə fəaliyyət göstərirəm.Üzümçülük və şərabçılıq sahəsinin beynəlxalq tələblərə uyğunlaşdırılması,müasir texnologiyaların və texnoloji proseslərin tətbiqi, dünya bazarında Azərbaycan şərabına marağın artırılması, həmçinin əvvəlki bazar payının bərpa edilməsi üçün bu sahənin elmi əsaslarla tərəqqisinə zərurət vardır.Odur ki, Beynəlxalq təşkilatlarla əlaqələrimi, o cümlədən üzun illərin təcrübəsini və potensialımı nəzərə alaraq mənim Üzümçülük və Şərabçılıq Elmi-Tədqiqat İnistitunun direktoru vəzifəsinə qaytarılaraq əvvəlki qaydada fəaliyyətimi davam etdirməyim üçün müvafiq göstəriş verməyinizi Sizdən xahiş edirəm.Əmin edirəm ki, bu problemləri Sizin rəhbərliyinizlə qısa müddətdə aradan qaldıracağam və etimadınızı doğruldacağam.

Dərin hörmətlə,

texnika elmləri doktoru, professor,Tariyel Məhəmməd oğlu Pənahov