"Adil Kərimli və dostları Azərbaycan Respublikası Mədəniyyət Nazirliyi ni niyə bu vəziyyətə salıb?" "DİA-AZ" xəbər verir ki, bunu özünün sosial şəbəkə hesabında yazan jurnalist Fərid Şahbazlı daha sonra ilginc iddialar səsləndirir. Jurnalistin yazısını təqdim edirik:

"Azərbaycan dövləti mədəniyyət sahəsini hər zaman cəmiyyətin inkişafı və yaradıcı potensialın təşviqi üçün strateji prioritet kimi görür. Prezident İlham Əliyev və Birinci vitse-prezident Mehriban xanım Əliyeva bu sahənin inkişafını daima dəstəkləyir, yaradıcı təşəbbüsləri himayə edir və ölkədə mədəni irsin qorunmasını dövlət siyasətinin əsas istiqamətinə çevirib.

Lakin təəssüflə qeyd etmək lazımdır ki, Mədəniyyət Nazirliyinin fəaliyyəti bu dövlət dəstəyinə adekvat deyil və sahədə ciddi idarəçilik boşluqları müşahidə olunur.

9 noyabr Bayraq Günü münasibətilə Mədəniyyət Nazirliyinin rəsmi paylaşımında Azərbaycan bayrağının təhrif edilməsi bu qurumun fəaliyyətini yenidən gündəmə gətirdi.

Bayrağımızın təhrif edilmiş formada paylaşılması birmənalı şəkildə qətiyyən texniki səhv deyil. Bu fakt nazirliyin laqeydliyi və məsuliyyətsizliyini açıq şəkildə ortaya qoyur. Nazirlik faktiki olaraq ölkəmizin milli rəmzlərini bütün dünyada təbliğ etməli olduğu halda ən vacib gündə belə ciddi səhvə yol verir. Bu nazirlikdəki işgüzar mühitin səviyyəsini bir daha ortaya çıxarır.

Üstəlik, bu nazirliyin təşkilatçılığı ilə baş tutan tədbirlərdə bayrağımızla bağlı yaşanan ilk qalmaqal deyil.

Ardıcıl baş verən problemlər göstərir ki, nazir Adil Kərimlinin diqqəti daha çox şəxsi işlərə və “dost-tanış klubu”na yönəldiyi üçün əsas vəzifələr yetərincə yerinə yetirilmir.

Gəlin, baxaq: Kitabxanalar və mədəniyyət mərkəzləri faktiki olaraq fəaliyyət qabiliyyətini itirib. Regionlarda və paytaxtda yerləşən bu müəssisələr əsasən formal tədbirlər təşkil edir, lakin onların ideoloji və mədəni məqsədləri reallıqda yerinə yetirilmir. Xaricdə fəaliyyət göstərən mədəniyyət mərkəzləri də, kiçik istisnalarla oxşar problemlərlə üzləşir və dövlətin mədəniyyət siyasətini effektiv şəkildə təbliğ edə bilmir.

Son dövrlərdə Mədəniyyət Nazirliyi strukturlarında müəllim və mədəniyyət işçilərinin “imtahan” adı altında kütləvi işdən çıxarılması dövlətimizin sosial siyasət kursu ilə tamamilə ziddir. İşdən çıxarılan kadrların yerinə təyin edilən şəxslərin kimlikləri və əlaqələri araşdırılarsa bu imtahanların əsl məqsədi daha aydın bəlli olar.

Ölkə miqyasında keçirilən kitab sərgiləri ancaq qalmaqallarla yadda qalır. Yerli nəşriyyatlara laqeyd münasibət göstərilir. Eyni çevrələr hər dəfə üstünlük qazanır, yaradıcı gənclər və yeni ideyalar isə kənarda saxlanılır.

Tender və qrantların verilməsi prosesinin şəffaflıqdan uzaq olması ilə bağlı çoxsaylı əsaslı iddialar var. Şəxsi maraqlar, maddi ehtiyaclar və dost-tanış münasibətləri prosesin əsas tərkib hissəsinə çevrilib. Bu isə mədəniyyət sahəsində innovasiyanın və yaradıcılığın qarşısını alır.

Əslində isə mədəniyyət xalqın həmrəyliyini və dəyərlərini qoruyan sahədir. Təəssüf ki, Mədəniyyət Nazirliyindəki idarəçilik boşluqları sahənin bu funksiyasını yetərincə yerinə yetirməsinə imkan vermir. Nazirlik dərhal peşəkar kadrları önə çıxarmalı, layihə və tədbirləri şəffaf şəkildə təşkil etməli və mədəniyyətimizə real nəticələrlə töhfə verməlidir".